కబుర్లు - 35

అవీ, ఇవీ, అన్నీ

ఇవాళ (29-03-11) "ఈనాడు" మొదటిపేజీ కార్టూన్ "అవేకానంద"; "కిరణ్"; "ముద్దు" ల హావభావాలని చక్కగా ప్రకటించింది. "ఇదీ సంగతి" కార్టూన్ కూడా బాగుంది.

అన్నిటికన్నా అద్భుతం--కిరణ్ వగైరాలు "అసెంబ్లీ మీద ప్రజలకి నమ్మకం పోయేలా వుంది" అని వాక్రుచ్చడం! అక్కడికేదో ప్రజలకి నమ్మకం వొలికిపోతున్నట్టు!

అసెంబ్లీ అనేది ప్రజా ప్రతినిధులు ఆడుకునే క్రీడా స్థలం అనీ, డబ్బులు తీసుకుని మరీ ఆడుకుంటారనీ, జనాలెప్పటినించో నవ్వుకుంటున్నారు! (పైగా యేడాదికోసారో యెప్పుడో మళ్లీ క్రీడా మైదానాల్లో క్రికెట్ వగైరా కూడా ఆడతారు--వాళ్ల ఆటవిడుపుకోసం!)

రాశ్శేఖర్రెడ్డి "నాలో కోపం నరం యెప్పుడో తెగిపోయింది" అనీ, "వానదేవుడు మా పార్టీలో చేరాడు" అనీ, "ఇడుపులపాయకి బస్సుల్లో వెళ్లి, నెమళ్ల క్రేంకారాలు వినండి" అనీ అంటున్నప్పుడుకూడా, చంద్రబాబు వగైరాలు "వెకిలిగా నవ్వుతున్నాడు" అన్నారు తప్పితే, మీదపడి బాదెయ్యలేదు కదా! నిజంగా వాళ్లు చాలా గొప్పవాళ్లు కదూ!

మధ్యాహ్న భోజనం తరవాత నిద్రలో నాకో కల వచ్చింది. గొల్లపూడి వారు దశాబ్దాలక్రితం యెప్పుడో జీవనకాలం లో వ్రాసిన "ప్లాస్టిక్ బొమ్మల వ్యాపారం" ప్రభావమేమో మరి.

అసెంబ్లీ సమావేశాలు ప్రారంభం కావడానికి ఓ రోజు ముందు బీయేసీ (బిజినెస్ అడ్వైజరీ కమిటీ) సమావేశం జరుగుతుంటే, అన్నిపక్షాలవాళ్లూ యేకగ్రీవంగా చెప్పారట--మామూలు వాయిదా తీర్మానాలని తిరస్కరించడం, ప్రభుత్వం ప్రకటనలు చెయ్యడం, ప్రశ్నోత్తరాల కార్యక్రమం లాంటివి రద్దు చెయ్యాలి. వాటి బదులు "(మీ కోపాన్ని)......వదిలెయ్యండి" అనే కార్యక్రమం సరిపోయినంతసేపు ప్రవేశపెట్టాలి--అని.

మర్నాడు సమావేశం మొదలవగానే, "వదిలెయ్యండి" మొదలన్నమాట. స్పీకర్ ప్రక్కనే ఓ పెద్ద అలమారు వుంటుంది. ముందు యెవరు చెయ్యెత్తితే వాళ్లకి స్పీకర్ ఆ అలమారులోంచి ఓ రబ్బరు కర్ర (సినిమా కుర్ర హీరోలు విలన్ అనుచరులని బాదడానికి వుపయోగించే ఇంతలావు సర్వీ కర్రలలాంటివి--అవి బాదుతున్నప్పుడు వంగిపోవడం కూడా సినిమాల్లో బాగానే చూపిస్తారు!) అందిస్తాడు. దాంతో సభలో తాను యెవరి మీద కక్ష తీర్చుకోవాలనుకుంటున్నాడో వాడిని ఇష్టం వచ్చినట్టు బాదెయ్యచ్చు!

ఇలా అందరు సభ్యులూ చేశాక, జీరో అవరూ వగైరా మామూలే!

మార్షల్స్ కి కూడా ఫైబర్ గ్లాస్ తో తయారు చేసిన నిలువెత్తు షీల్డులూ, పాతకాలం లో సైనికులు ధరించే ఓ పాతిక కేజీలో యెంతో బరువుండే శిరస్త్రాణాలూ, కవచాలూ ఇస్తారన్నమాట. 

మీడియా పాయింటులో మాట్లాడేవాళ్లకి కూడా ఇలాంటివే ఇస్తారు--అక్కడ కూడా రబ్బరుకర్రల అలమారు ఇంకోటి వుంటుంది--వాళ్లని బాదడానికి అనుగుణంగా!

అప్పుడు అసెంబ్లీ పరువు యెంతగా పెరుగుతుందో ప్రభుత్వం వారు ఆలోచించాలి.

క్రికెటానందం లో మనవాళ్లు పాకిస్థాన్ నించి వచ్చే అభిమానులకి వుచితంగా ఆతిథ్యం ఇస్తున్నారట. ప్రభుత్వంవారు కొన్నివేల వీసాలు ఇస్తున్నారట. 

పాక్ నెగ్గితే టపాసులు పేల్చి పండుగచేసుకొనీ పాక్ అభిమానులున్న మనదేశంలో, పాక్ వోడిపోతే షాపులు తగలబెట్టీ, దొరికినవాళ్లని పొడిచీ కక్ష తీర్చుకొనే పాక్ అభిమానులున్న మనదేశంలో--ప్రస్తుత సుహృద్భావ చర్యలు వికటించవనే ఆశిద్దాం!

ఇప్పుడింక కరెంటు డిపార్ట్ మెంట్ వాళ్లు "జీపీయెస్" ఆథారిత, టీసీయెస్ వాళ్లిచ్చే సాఫ్ట్ వేర్ తో క్షణాల్లో యే ఇంట్లో కరెంటు పోయినా, వచ్చేసి బాగు చేసేస్తారట. దీనికోసం వినియోగదారులందరికీ ఓ "తొమ్మిది అంకెల" సంఖ్య కేటాయిస్తారట! (ఇంకానయం--కార్డులిస్తామనడంలేదు!) అలాగే, ఓ ప్రాంతం లో యెన్ని కొత్త కనెక్షన్లు ఇవ్వచ్చు, యెక్కడ యెక్కువ కరెంటు వినియోగం జరుగుతోంది వగైరాలు కూడా, ఆఫీసులో కూర్చొని కనిపెట్టేస్తారట! రాజుల సొమ్ము రాళ్లపాలు, మన ప్రభుత్వాల సొమ్ము కార్డులూ, సంఖ్యలూ, సాఫ్ట్ వేర్ల పాలు అనుకోవాలేమో మనం!

అన్నట్టు, బ్లాక్ బెర్రీలు (వినియోగదారులకి) చాలా సురక్షితం అని, చాలా ప్రభుత్వాలు వాటిని నిషేధించాయట. ఇప్పుడు అమెరికా "వుద్యమకారులకి" ఇంకా సురక్షితమైన కొత్తరకం సెల్ ఫోన్లు కనిపెట్టిందట. వాటిని అరబ్ దేశాల్లో వుద్యమాలు చేస్తున్నవాళ్లకి అందిస్తారట. వాటిని యెలా వాడినా, తరవాత పోలీసులు వాళ్లూ యేమీ పీకలేరట! యెంత బాగుందో కదా!

సుప్రీం కోర్టు హసన్ ఆలీ కేసులో విచారిస్తూ, ఈడీ సమర్పించిన నివేదికలో ఓ బడాస్థాయి దళారి (పవర్ బ్రోకర్) పేరు చదివి, న్యాయ మూర్తులు "దిగ్భ్రాంతి" వ్యక్తం చేశారట! ఆ పేరు యెప్పటికి బయటికి వస్తుందో మరి!