మన 'ఇంటెలిజెన్స్ '
ప్రపంచంలోకెల్లా 'అత్యుత్తమమైన ' ఇంటెలిజెన్స్ యంత్రాంగం మనదేనంటే, మీరేమంటారు?
'అతిశయోక్తి కి ఉదాహరణ ' -- అనా?
'ఈ శతాబ్దపు గొప్ప జోక్ ' -- అనా?
'అబ్బ! మీరు మరీనూ' -- అనా?
'నీ మెదడుకూడా వాళ్ళలాగే పుఱ్ఱెలోకాక ఇంకెక్కడో వుందా' -- అనా?
మీరేమన్నా, నేను ఆశ్చర్యపోను! ఎందుకంటే, అది జగమెరిగన సత్యం! (ఒక్క మన గవర్నమెంటోళ్ళకి తప్ప).
ఏది? పై స్టేట్ మెంటు కి నిజం పూర్తి వ్యతిరేకమని!
లేక పోతే, ఎంత పెద్ద సిటీలోనైనా, ఎక్కడ, ఏ మూల, ఏ వీధిలో, ఏ ఇంట్లో ఏమి జరగినా, అది బహిరంగ రహస్యమే! కాని పక్కవాళ్ళు పట్టించుకోరంతే! చిన్న పట్టణాల్లోనూ, పల్లెల్లోనూ అయితే ఇంకా బాగానే పట్టించుకుంటున్నారు. మరి అలాంటప్పుడు, ఏమాత్రం కళ్ళూ, ముక్కూ, చెవులూ వున్న యంత్రాంగానికైనా ఈ బహిరంగ రహస్యాలు తెలియవంటే మనమేమనుకోవాలి?
తీవ్రవాదులూ, నక్సలైట్లూ, మవోయిష్టులూ, ఎలక్ట్రానిక్ మీడియాకి మెసేజ్ లు పంపిస్తు వుంటారు! విలేఖరులు వాళ్ళని ఇంటర్వ్యూలు కూడా చేస్తూ వుంటారు! వీరప్పన్ ని సహితం, ఇంటర్వ్యూలు చేసి ఫొటోలతొ సహా ప్రచురించేవారు! (కాని వారి ప్రొఫెషనల్ ఎథిక్స్ పాటించి పోలీసులక్కాని, ఇతరులక్కాని వాళ్ళ అచూకీని చెప్పేవారు కాదు! అది వేరే సంగతి.)
మరి మహా పేరుగొప్ప ఇంటలిగెన్స్ వారు చెయ్యవలసిన పని, అలాంటి రహస్యాలని తెలుసుకోవడమే కదా! మరి ఓపెన్ సీక్రెట్లు కూడా తెలుసుకోలేని ఇంటలిజెన్స్ ఉంటే యేం, ఊడితే యేం!
మరి ఇప్పటికైనా దాన్ని సంస్కరిస్తాయా మన గవర్నమెంటులు? చూద్దాం!
