కృష్ణశ్రీ--"ఓసామా...."

కబుర్లు - 82

2011-12-21T21:18:00.000-08:00

అవీ, ఈవీ, అన్నీ

(చాలా రోజులుగా బయటికి సణగడానికి వీల్లేకుండా పోయింది. మళ్లీ ఇప్పుడు మొదలు.)

లోక్ పాల్ స్థానం లో “జోక్ పాల్” బిల్లు
“కోడిపందాలు” జరిపించుకోవచ్చు అని తీర్పిచ్చిన చెన్నై హైకోర్టు.
హైవే మీద బైక్ గుద్దేసి, “చిరుతపులి” హతం!
ఒకావిడ పొట్టలో పాతికేళ్లు కాపురం చేసి, ఇప్పుడు బయటికి వచ్చి, “వ్రాస్తూనే వున్న” పెన్ను!
“తృటిలో తప్పిన” విమాన ప్రమాదం.
తితిదే వారి "లడ్డూల" గోల.

జోక్ పాల్ బిల్లు సిధ్ధం అయ్యిందట—“....అదియునూ, నీవడిగినవి తక్క….” అని ప్రభుత్వం హుంకరిస్తూండగా!

లోక్ పాల్ నియామకంలోగానీ, కార్యకలాపాల్లోగానీ ప్రభుత్వ జోక్యం, ఆధిపత్యం వుండకూడదు అంటే, ముఖ్యంగా దానికే ప్రాథాన్యం ఇస్తున్నారు. ప్రథాని మీద ఆరోపణలు వస్తే, ఆయన పద్మవ్యూహం మధ్యలో వుండేలా జాగ్రత్తలు తీసుకొన్నారు.

సిటిజెన్స్ ఛార్టరూ, సీబీఐ, చిన్న వుద్యోగులూ వగైరాలన్నీ మసిపూసి మారేడుకాయ చేస్తున్నారు!
మరో పోరాటం తప్పదు. అన్నా సిధ్ధం అవుతున్నాడు. మనమూ సిధ్ధమేనా?

చెన్నై హైకోర్టు మదురై బెంచ్ వారు విజ్ఙత ప్రదర్శించారు! జే జహంగీర్ అనే ఆయన “కోడి పందాలు” నిర్వహించుకోడానికి అనుమతి అడిగితే, “అలాగే” అనేశారు.

ఆయన అంతకుముందు కలెక్టరుగారినడిగితే, ఆయన ఇంకా సమాధానం ఇవ్వకపోవడంతో, కోర్టుకి వచ్చారట.
ఆ పందాలు—స్థానిక పోలీసు ఈన్స్ పెక్టర్, పశు వైద్యాధికారి సమక్షంలో జరగాలి అనీ, కోడి పుంజులకి మత్తు పదార్థాలేవీ తినిపించ/తాగించ కూడదు అనీ, దేనికీ యే విధమైన గాయాలు తగల కూడదు అనీ, కాళ్లకి కత్తులూ అవీ కట్టకూడదు అనీ, వేళ్లకి విషాన్ని పూయకూడదు అనీ, పోలీసులకీ, పశువైద్యాధికారికీ ఖర్చులని నిర్వాహకుడే భరించాలి అనీ, ఈ షరతులకి లోబడతామని అఫిడవిట్ దాఖలు చెసి, నిక్షేపంగా ఆ పందాలు నిర్వహించుకోవచ్చు అనీ—తీర్పు ఇచ్చింది న్యాయ స్థానం.
చిలకమర్తి వారి గణపతి రోజుల్లో, పేకాట పాకల్లో “ఖూనీ”లు జరిగాయని, పేకాటనీ, కోడి పందాల్లాంటివాటినీ శాంతి భద్రతల సమస్యగా తలపోసి, వాటిని నిషేధించారు. ఇప్పుడు, సాయంత్రం పూట, ముసలాళ్లు కాలక్షేపం కోసం క్లబ్బుల్లో చిన్న చిన్న పందాలతో పేకాట ఆడుకున్నా, అరెస్టు చేసి కేసులు పెట్టి, క్లబ్బులని మూయించేస్తున్నారు.
స్టాక్ మార్కెట్, ఫార్వార్డ్ ట్రేడింగ్, డెరివేటివ్ ట్రేడింగ్, లాంటివన్నీ జూదాలు కావు!
ఇకనైనా, ప్రభుత్వమూ, పోలీసులూ తమ బీసీ నాటి ఆలోచనలని మార్చుకొంటే బాగుంటుంది కదూ?
నిన్న విశాఖపట్నం శివారు జాతీయ రహదారిపై, ఓ బజాజ్ బైక్, రోడ్డుని దాటుతున్న “చిరుతపులి”ని గుద్దేసి వెళ్లిపోయిందట. పాపం ఆ చిరుత చచ్చిపోయింది!

మరి ఆ చిరుతని గుద్దేసి వెళ్లిపోయిన ఆ “ధైర్యస్తుడు” యెవరో, వాడి మానసిక స్థితి ఆ సమయంలో యెలా వుందో (బహుశా తాగేసి వుంటాడు—అంటున్నారు కొందరు!) యెవరైనా పరిశోధిస్తే బాగుండును!
ఓ పాతికేళ్ల క్రితం, అద్దం ముందు నిలబడి, ఓ పెన్నుతో తన గొంతులోని “టాన్సిల్స్” యెలా వున్నాయో చూసుకొంటూ, క్రిందపడిపోయి, అదాటున ఆ పెన్ను మింగేసిందట ఒకావిడ! అప్పటినుంచీ యేమీ ఇబ్బంది లేదుగానీ, ఈ మధ్య కడుపులో నొప్పి రావడంతో ఆసుపత్రికి వెళితే, ఆ పెన్నుని గుర్తించి, శస్త్ర చికిత్స చేసి, బయటికి తీశారట!
ఆవిడకిప్పుడు 76 యేళ్లట! విశేషం యేమిటంటే, “నాపెన్నూ ఇప్పటిక్కూడా శుభ్రంగా రాస్తోంది, నేనూ శుభ్రంగా వున్నాను!” అందటావిడ.
ఈవిడని యేమి “జయురాలు” అనాలి?
చెన్నైలో మొన్న సోమవారం 19న, హైదరాబాదునుంచి రాత్రి 8.40 కి వస్తున “స్పైస్ జెట్” విమానం దిగబోతూంటే, ఓ “కింగ్ ఫిషర్” విమానం, తన విశ్రాంత స్థలం నుంచి—సరదాగా—రన్ వే పైకి ప్రయాణం మొదలెట్టిందట! చెమటలు పట్టిన ఏ టీ సీ అధికారులు, స్పైస్ ని “అట్టే….అట్టే….” అంటూ, కాసేపు ఆకాశం లోనే చక్కర్లు కొట్టమని, కింగ్ ని తోక ముడిపించి, యెట్టకేలకు ఊపిరి పీల్చుకున్నారట.

ఏటీసీలో ఓ మంచి వుద్యోగి వున్నాడు కాబట్టి సరిపోయింది. లేకపోతేనా…….!
ఇప్పటికైనా, వేలంవెర్రిగా విమాన సర్వీసులని పెంచేస్తూ, భద్రత గురించి పట్టించుకోని ప్రభుత్వాలకి కళ్లు తెరుచుకుంటాయా?
తితిదే వారు కంప్యూటర్ల ద్వారా, ఇన్నేళ్లనుంచీ--సేవలమూలంగా, లడ్డూ ప్రసాదాలు యెన్ని యెలా దుర్వినియోగమయ్యాయో నిర్ధారించుకున్నారట! ఫలితంగా, రోజూ కళ్యాణోత్సవం లడ్డూల విక్రయం 1500 నుంచి 620 కీ, వడల సంఖ్య 1400 నుంచి 550 కి పడిపోయాయట!

మిగిలిన ప్రసాదాల సంఖ్య కూడా గణనీయంగా తగ్గిందని వేరే యెవరైనా చెప్పాలా?
మరి మిగిలిన సౌకర్యాల, దర్శన విధానాల సంస్కరణ యెప్పుడో…..ఆయనకే తెలియాలి!

కబుర్లు - 81

2011-11-18T08:30:00.001-08:00

అవీ, ఇవీ, అన్నీ

"మిగిలిన సరుకుల రేట్లు తగ్గించకుండా, కిలోరూపాయికి--అవీ ముక్కిపోయిన బియ్యం ఇస్తే యెవడికి కావాలి?" అంటూ టీవీల్లో చెరిగేస్తున్న ఆడవాళ్లకి సమాధానంగా, ఇప్పుడిస్తున్న కాస్త కందిపప్పూ వగైరాలతో ఓ ప్యాకేజీ గా ఓ కిలో చింతపండూ, ఓ కిలో వుప్పూ కూడా ఇస్తేబాగుంటుందనుకుంటున్నారట.

ఓ కిలో యెండు మిరపకాయలు కూడా.....అనుకొని, మళ్లీ దాని రేటు స్థిరంగా వుండదు....ములిగిపోతామేమో అని సందేహిస్తున్నారట! అయినా నెలకి కిలో చింతపండూ, కిలో వుప్పూ యేంచేసుకుంటారట?

యెలాగూ ఓ మంత్రిగారన్నట్టు, "వండిపెట్టే" పథకం గురించి ఆలోచిస్తే ఇంకా బాగుండునుకదా?

యెలాగూ రైతులకీ, మహిళలకీ "వడ్డీ లేని" ఋణాలు అంటున్నారాయె! అదేదో "వుచిత భోజన కూపన్లు" ఇచ్చేసి, వండి వార్చి, వొడ్డించేస్తే పోను కదా?

"అయ్యవారేం చేస్తున్నారు?" అంటే, "చేసిన తప్పులు దిద్దుకుంటున్నారు!" అన్నట్టు, మంత్రి డీ ఎల్ రవింద్ర (వండిపెట్టే పథకం గురించి చెప్పినది కూడా ఈయనేననుకుంటా!), "వందల కోట్లు ఆసుపత్రులకి ఖర్చు పెట్టారు. డాక్టర్లు లేరు, మందులు లేవు! అలాంటి పరిస్థితుల్లో నాకు వైద్య ఆరోగ్య శాఖని నాకిచ్చారు! (2009 లోనే ఇచ్చారేమో!) అప్పటినుంచీ చేసిన తప్పులు ఇప్పుడు దిద్దుకుంటున్నాను. (కాబట్టి జనాలు నన్నేమీ అనొద్దు!) అన్నాడట.

బహుశా 2014 వరకూ పడుతుందేమో--ఆ తప్పులు దిద్దుకోడానికి--అప్పటివరకూ ఆ మంత్రి పదవీ, ఆ ప్రభుత్వమూ వుంటే.....!

డీ జీ సీ ఏ వాళ్లు, "విమాన చార్జీలు పెంచి వసూలు చేస్తే వూరుకోం" అని కళ్లెర్రజేశారట--మిగిలిన కంపెనీలని--కింగ్ ఫిషర్ సర్వీసులు రద్దవడంతో.

పాపం సంపన్న శ్రేణి వినియోగదారులమీదా, ప్రభుత్వ వున్నతోద్యోగులమీదా యెంత ప్రేమో వారికి!

ఓ ప్రక్క "తృటిలో తప్పిన" ప్రమాదాలు జరుగుతూనే వున్నాయి. గన్నవరం, రాజమండ్రి, విశాఖ లాంటి చోట్ల సరైన యేర్పాట్లే లేవు! గన్నవరం నుంచి సర్వీసు ప్రారంభించినరోజే, వాతావరణం బాగాలేక రద్దు చేశారు ఎయిర్ ఇండియాది! నిన్న ఓ విమానం, రెక్కకి పక్షి తగిలి, అద్దం పగిలిపోతే, అప్పటికే ల్యాండ్ అవడం వల్ల వూపిరి పీల్చుకొన్నారు! మొన్నెప్పుడో ఓ విమానమైతే తగలబడేపోయింది అక్కడెక్కడో. ఇవన్నీ వాళ్ల బాధ్యతలు కావన్నట్టు వాళ్లు పట్టించుకోరు!

"చికెన్" నారాయణ ఓ వజ్రం లాంటి మాటన్నాడు. మనపొరుగు రాష్ట్రం తమిళనాడులో "నాయకులు" జైళ్లకి వెళుతుంటే, మన రాష్ట్రంలో "అధికారులు" మాత్రమే వెళ్లడం మొదలెట్టారు--అని!

అవున్నిజమేకదా? అయినా, రాజకీయం కాకపోతే, ఆ తేడా యేమిటో ఆయనకి తెలీదనుకోవాలా?

ఆదికేశవుడూ, కృష్ణారావూ వుండగా, తి తి దే వారికి బంగారం రాగానే, పేపర్లో ప్రకటించేసేవారు. క్రొత్తవారు, రిస్కెందుకు అనుకున్నారేమో, ఇప్పుడు వొకేసారి, గత మూడు నెలలలో రూ.2.11 కోట్ల విలువైన బంగారు ఆభరణాలు 'వితరణగా' అందాయి అని ప్రకటించారు. అదీ, ఈ సంవత్సరం మొదటి మూడు నెలల్లో (ఏప్రిల్ నుంచి జూన్ వరకూ) అన్ని ఆలయాలకీ కలిపి అనీ, శ్రీవారికొక్కరికే ఆ సమయంలో రూ.1.53 కోట్ల బంగారం వచ్చింది అనీ, జువెలరీ విభాగం వారు లెఖ్ఖలు కట్టారట!

బెటర్ లేట్ దేన్ నెవర్ అన్నారు కదా? వాకే!

కబుర్లు - 80

2011-11-15T10:47:00.001-08:00

అవీ, ఇవీ, అన్నీ

హమ్మయ్య! శుభవార్త వెలువడింది! రాష్ట్రాల్లో రేషన్ కార్డులున్నవాళ్లందరికీ ఆథార్ సంఖ్య కేటాయించడం చెల్లదని, ఆథార్ సంఖ్యని "జనాభా లెఖ్ఖల" శాఖ మాత్రమే జారీ చేస్తుందనీ, ఆ ప్రక్రియ ఇంకా మొదలవలేదనీ, మిగిలిన యే "సంఖ్యలూ" చెల్లవు అనీ ప్రకటించేశారు!

మరి ఇన్నాళ్లనుంచీ, ప్రైవేటు యేజన్సీలని నియమించి, మందల్లా జనాలని తోలి, దరఖాస్తులని జారీ చేసి, మిగిలినవాళ్లకి 2013 వరకూ దరఖాస్తులే జారీ చెయ్యడం కుదరదనీ.......ఇలా వేషాలేసిన రాష్ట్రాలకీ, ప్రభుత్వాలకీ.....ఇంకా.....ఆ "కార్డు" లేకపోతే....మీకు 'రేషన్' రాదు; 'గ్యాస్' రాదు; 'పెన్షన్లు' రావు; మీరు ఈ దేశ వోటర్లేకారు.....ఇలా బెదిరించి "దండుకున్న" వారికి యేదీ శిక్ష?

"మూడీస్" అనే "ఇంటర్నేషనల్" (మా జార్గాన్ లో మోసగాళ్లనీ, ఓవరాక్షను చేసేవాళ్లనీ క్రమంగా "తాలూకాగాడు; జిల్లాగాడు; రాష్ట్రగాడు; నేషనల్ గాడు; ఇంటర్నేషనల్ గాడు....ఇలా వ్యవహరించేవాళ్లం!) రేటింగు యేజన్సీ, భారతీయ బ్యాంకుల రేటింగుని "కొంత" దించేసిందట! బ్యాంకులన్నీ బాధపడిపోతున్నాయట! (నిజంగా వాళ్ల పేరుకి తగ్గట్టు వాళ్లు "మూడీసే"....అంటే వాళ్ల మూడ్ కి తగ్గట్టు ప్రవర్తిస్తారు!)

ఇంకో రేటింగ్ యేజన్సీ "స్టాండర్డ్ & పూర్" వాళ్లు, అదే రేటింగుని, ఆ మర్నాడే 'కాస్త' పెంచారని సంతోషిస్తున్నాయట బ్యాంకులు! (వీళ్లకో స్టాండర్డ్ లేదు; వీళ్లు పూరూ కాదు! సత్యం రామలింగరాజు ఆడిటర్లు వీళ్లేనట.)

మొన్న ప్రణోబ్ ముఖర్జీ, నిన్న రంగరాజన్ కూడా, బ్యాంకులు తమ "మౌలిక రంగ" (రోడ్లు, విద్యుత్తు, విమానయాన వగైరా); వాహన; గృహనిర్మాణ; వ్యక్తిగత ఋఅణ రంగాల్లో "జాగరూకత" వహించాలని చెప్పారు(ట!)

నేను మూడేళ్లనుంచీ చెపుతున్నాను--ఈ రంగాలు "ములుగుతున్నాయి" అని! అయినా, అలా "వెల్లవేసి" వాటిని కాపాడుకొస్తున్న ప్రభుత్వాలు మాత్రమే దీనికి బాధ్యులు అంటాను నేను!

మళ్లీ బ్యాంకులు "వుత్పాదక రంగ" ఋణ వితరణకి మాత్రమే పరిమితమైతే తప్ప, మన బ్యాంకులనీ, మన ఋణ వ్యవస్థనీ కాపాడగలిగేవాడు యెవడూ లేడు. వృధ్ధి రేటంటారా.....నా కాలిక్రింద బలాదూర్!

విజయ్ మల్లయ్య, యెప్పుడూ ఓ నలుగులు అందగత్తెల మధ్య (గాంధీగారు పాపం ఇద్దరు 'బెన్ ' ల భుజాలమీదే చేతులు వేసేవారు....వాళ్లు కూడా అందగత్తెలు అంటే మన కళ్లు పోతాయి!), చేతిలో ఓ షాంపేన్ గ్లాసుతో కనిపిస్తాడు! దేశంలోని "బీర్బల్"లకీ, మందుభాగ్యులకీ తగినంత "సరుకు" అందించిన ప్రజా సేవకుడూ, టిప్పు సుల్తాన్ ఖడ్గాన్ని వేలంలో సొంతంచేసుకొని, మన దేశానికి తీసుకువచ్చిన (అది ఆయన పెర్సనల్ లాకర్లో వుందేమో ఇప్పుడు!) "దేశ భక్తుడు"! అలాంటివాడు, ఈ రోజున నా "బీర్ బ్రాండు" ఎయిర్ లైన్స్ కష్టాల్లో వుంటే.....యెందుకు ఆదుకోరూ? అని ప్రభుత్వాన్ని ప్రశ్నిస్తున్నాడు!

ఇంకో స్పైస్ జెట్ వాడో యెవరో, "ప్రైవేటు" విమాన సంస్థలకి ప్రభుత్వం యెందుకు సాయం చెయ్యాలి? అనడుగుతున్నాడు.

బ్యాంకులేమో, ఇప్పటికే 8 వేలకోట్లిచ్చాం. ఇంకా కావాలంటే, ఓ 8 వందల కోట్లు (నీ మద్యం ఫ్యాక్టరీలలోంచి) మళ్లించు...అంటున్నారట! చేస్తాడో......దేన్‌దార్దాన్‌దే అంటాడో!

అసలు వీటన్నింటికీ కారణమైన "ప్రఫుల్ పటేల్" హాయిగా వున్నాడు! (ప్రపంచమందరికీ అన్ని విషయలూ తెలుస్తున్నా, వాళ్లు "అదిగో పులి" అని చెపుతున్నా, గుడ్డి గుర్రాలకి పళ్లు తోముతూ కాలక్షేపం చేసిన) సీబీఐ వాళ్లేమైనా చెయ్యగలరా వాడిని?

చూద్దాం!

కబుర్లు - 79

2011-11-05T08:13:00.000-07:00

అవీ, ఇవీ, అన్నీ

మొన్న మన్మోహనుడు గవర్నర్ల సదస్సును వుద్దేశించి ప్రసంగించారట.

గవర్నర్ల వ్యవస్థ రాజ్యాంగబధ్ధంగా యేర్పడింది. వాళ్లకి ఈయన సందేశాలివ్వడం యెమిటో?

అదేమీ తప్పు కాదేమోగానీ, ఆయన వువాచలు రాజకీయ వాసన కొడుతున్నాయి మరి! అవినీతి నిర్మూలనకి ఇదే సమయం అనీ, అందుకోసం రాష్ట్రాలు కూడా చర్యలు తీసుకొంటే ఫలితాలు మరింత బాగుంటాయి అనీ, గవర్నర్లు "కేంద్రానికి కళ్లమాదిరిగా" వుండాలనీ, అభివృధ్ధి కార్యక్రమాలని పర్యవేక్షించాలనీ 'సూచించార' ట. దేశానికి "రెండో హరిత విప్లవం" అవసరమన్నారట! పండిన పంటకీ, కుళ్లిపోతున్న ధాన్యాలకీ దిక్కులేదుగానీ.......! ఆ విప్లవం కూడా గవర్నర్లే తేవాలని ఆయన వుద్దేశ్యమేమో మరి! బాగుంది.

మొన్నెప్పుడో, 'ఇండియన్ మినర్వా' వ్యాఖ్యకి సమాధానమిస్తూ, రైల్వే వెబ్ సైట్ గురించి నేను వ్రాసిన విషయమ్మీద, (http://osaamaa.blogspot.com/2011/09/74.html) ఈనాడువారు దృష్టి సారించి, అక్టోబర్ 29న వార్త వ్రాశారు!

అన్నట్టు, ఈనాడులో వివాహ వార్షికోత్సవ శుభాకాంక్షల ప్రకటనల్లో, "వివాహ 5వ" అనే ప్రచురించడం మొదలెట్టారు. కానీ, మధ్య మధ్య మళ్లీ "16వ వివాహ" అని కూడా అప్పుడప్పుడూ వస్తున్నాయి.

ఇంక, "ఒడుదొడుకులు" ని "ఒడిదుడుకులు" అని సవరించారు. (అని సంతోషించినంతసేపు పట్టలేదు.....మళ్లీ నాల్రోజుల్లోనే, ఒడుదొడుకులు....అంటూ పెద్ద హెడ్డింగు!).

ఇంకా, మా ఎంబెరుమన్నార్ కోవెలని, "ఎంబెర్ మానార్" అనడం మానేశారు. "ఎంబెర్ మన్నార్" అంటున్నారు. సంతోషం.

కానీ, "ఎంబెరు మన్నార్" అన్నది సరైన పదం. అదికూడా మారిస్తే, ఇంకా సంతోషం.

అలాగే, "నిర్ధారణ" ని "నిర్ధరణ" అని వ్రాస్తున్నారు. అది అర్థం లేని మాట. సవరిస్తే సంతోషం!

తెలుగుని తెలుగులాగే బ్రతికించండి!

మొన్న అక్టోబరు 29నే, ఈనాడులో, సంపాదకీయం ప్రక్కన ముఖ్య వ్యాసంగా, "ఇందిరాగోపాల్" ఓ వ్యాసంవ్రాశారు--"నియంతా...నీవెంత" అంటూ.

ముందు అమెరికాని సపోర్టు చేస్తున్నట్టు అనిపించినా, తరవాత చక్కని హెచ్చరికల్తో ముగిసింది ఆ వ్యాసం.

చదవకపోతే చదవండి.

(యమర్జెంటు) కబుర్లు - 78

2011-10-11T11:04:00.000-07:00

.....అవే!

పిచ్చిదంబరం ఇదివరకోసారి "ఆ రెండుపార్టీలూ (కాంగీ; తెదేపా) తమ అభిప్రాయం చెప్పేవరకూ......." అన్నాడు. మొన్న మళ్లీ, "ఆ నాలుగుపార్టీలూ (ఎం ఐ ఎం నీ, వై యెస్ ఆర్ నీ కలిపాడు!).........." అన్నాడు. రేపు నేనో కొత్త పార్టీ పెడితే, "ఆ ఐదు పార్టీలూ......" అంటాడేమో! బాగానేవుంది.

ఆజాద్ యేదో నివేదిక ఇచ్చాడట! "మీనీ కోర్ కమిటీ" సంప్రదింపులు పూర్తి అయ్యాయట. "మెగా కోర్ కమిటీ" ఇంకా మాట్లాడుకోవాలట.

ఈలోపల, "సకలజనుల సమ్మె విరమింపచేసే బాధ్యత" కి కు రె కి అప్పజెప్పారట.

గవర్నరోడూ, ముక్కుమంత్రోడూ, చిరంజీవీ వగైరాలూ--రాష్ట్రపతి పాలనకి అవకాశమే లేదు--"శాంతీ, భద్రతా" భద్రంగానే వున్నాయి, (యెప్పుడో) యెన్నికకాబడిన, ప్రసిధ్ధమైన ప్రభుత్వం పనిచేస్తుంది--అని సెలవిచ్చేశారు!

ఇంకోప్రక్క, వుద్యోగులు--మేము సమ్మె చేసుకుంటాం, మాజీతాలు ఒకటో తారీక్కల్లా ఇచ్చేయాలి, పండుగ అడ్వాన్స్లు ఇవ్వాలి, మూడు నెలలజీతం ముందుగానే ఇచ్చెయ్యలి".....ఇలా మొదలెట్టారు.

ఆర్టీసీ వాళ్లేమో, కొన్ని వందల బస్సులు నడిపిస్తున్నాం అంటారు. వాళ్ల గుర్తింపు పొందిన సంఘం, అనేక "లాభకరమైన" హామీలని పొంది, సమ్మె విరమిస్తున్నాము అన్నారు. అదేదో "ఫోరాన్ని" రద్దు చేశాము అన్నారు.

మళ్లీ టీవీలనిండా, బస్సులు తిరగడంలేదు అని గోల! రైళ్ల సంగతి దేవుడికే యెరుక!

గద్దరోడు కార్మికులకి కొన్ని అడ్వాన్సులూగట్రా ఇప్పించాడు. మళ్లీ ప్రభుత్వం "థూచ్" అందట!

ఇంకో ప్రక్క, "తెలంగాణా + నెల్లూరు, అనంతపురం, చిత్తూరు - హైదరాబాదు" అనీ, "ఆంధ్ర + ఖమ్మం - శ్రీకాకుళం, విజయనగరం" అనీ, "రాయల - నెల్లూరు, అనంతపురం, చిత్తూరు + మహబూబ్ నగర్" అనీ, కోస్తాంధ్ర/సర్కార్లు - నెల్లూరు, చిత్తూరు, గుంటూరు" అనీ, ఇలా యెవడికితోచిన పిచ్చివాగుళ్లు వాళ్లు వాగేస్తున్నారు!

మరి పరిష్కారం యెలా?

'69; '73 లోల్లా పూర్తిస్థాయి సీ ఆర్ పీ ఎఫ్; మిలిటరీ దళాలు దిగాలి!

పిరికోళ్లు "పండుగుల సందర్భంగా విరామం; పరీక్షల సందర్భంగా విరామం; పంటచేతికొచ్చేదాకా విరామం......"ఇలా వుద్యమాన్ని, "అహింస ముసుగులో" యెగదొయ్యలేకపోతూంటే, అక్కడ కేంద్రం సంప్రదింపులమీద సంప్రదింపులకి పోతూంటే, "జనజీవనం" మాత్రమే అస్థవ్యస్థం అవుతోంది!

నాకైతే, యే ప్రభుత్వమూ లేకుండా, "అంధేరా ప్రదేశ్"లోనే, నివశిస్తే బాగుండును అనిపిస్తోంది! మన రాష్ట్ర బడ్జెట్ ఓ రెండేళ్లక్రితమే లక్ష కోట్లు దాటింది. ఇప్పుడు లక్షా ఇరవై వేల కోట్లో యెన్నో. మన రాష్ట్ర జనాభా ఓ ఫది కోట్లనుకుంటే, "తలకి" 12 వేలు వస్తుంది. {పావలా వడ్డీలూ, కిలోరూపాయి బియ్యాలూ (తెలుగుమాటేనండి....ఒరియాకాదు) అఖ్ఖర్లేదు}......ఒక్కొక్కరికీ పంచేస్తే, "ఓ రాష్ట్ర ప్రజలారా! మీకింకేవిధమైన పన్నులూ వుండవు. పైగా మీ ఖాతాలకి సంవత్సరానికి 12 వేలు బదిలీ చెయ్యబడుతుంది. ఇంకా కేంద్ర గ్రాంటులు వస్తే, మీకు బోనస్ కుడా గిట్టుబాటవుతుంది! (ప్రభుత్వం నడపడానికీ, ప్రాజెక్టులు వగైరాలకీ ప్రపంచ బ్యాంకు వుండనే వుంది!)" అని యే "కశెన్నగాడో" ప్రకటిస్తే, మనవోట్లన్నీ వాడికే వేశెయ్యమూ!?

భలే బహ్లే! మంచి పరిష్కారంకదూ????!!!!

వెధవలు వోటర్ల లిస్టులో నా పేరు చేర్చడంలేదుగానీ, చేరుస్తేనా, బృహన్నలలకి వోటెయ్యకుండా, ఇలాంటి హామీ ఇచ్చేవాళ్లనే యెన్నుకొనేలా చేసేవాణ్ని!

యేం చేస్త్రాం!

కబుర్లు - 77

2011-10-05T09:01:00.000-07:00

అవీ, ఇవీ, అన్నీ

సకలజనుల సమ్మె చేసుకుంటున్నారు......తమ ప్రజలకి వ్యతిరేకంగా తామే! అని సంతోషిస్తున్నారా? రేపు యే పిచ్చిదంబరమో ఇంకో ప్రకటన చేసేవరకూ గాజులు తొడుక్కొని కూర్చుంటారా? ఇప్పుడే మీ సత్తా ప్రకటిస్తారా? తేల్చుకోండి! అంటున్నాడట కోడెల.

యేదీ, యెవడబ్బ సొమ్మూ కాదు! "ఈ దరిద్రం వదలాలంటే, వాడు అడిగిన తెలంగాణా ఇచ్చేస్తే పోను కదా......హైద్రాబాదు తప్ప"....అని సామాన్య జనాలు అంటున్నారంటే, యెంత విసిగిపోయారో ఓ సారి ఆలోచించండి!

కేసీఆర్ తన తోక తాను లేపలేకపోయినా, జానా రెడ్డి ని "తెలంగాణా వస్తే, ముఖ్యమంత్రివి నీవే" అని యెగదోసి, తెలంగాణా కాంగ్రెస్ మంత్రులనీ, ఎమ్మెల్యేలనీ, నాయకులనీ "వూతకర్రలుగా" చేసుకొని, తానో మహాత్ముడి స్టేజికి యెదగాలని వాడి స్ట్రేటజీ! దానికి పిల్లిగడ్డమోడొకడు మధ్యవర్తి! ఇప్పుడు, "తెలంగాణా ఇచ్చేస్తే, మా పార్టీని మీ పార్టీలో విలీనం చేసేస్తా"నంటాడా? "నీ విలీనం యెవడికి కావాలి--చిరంజీవి సపోర్టు మాకుండగా!" అని కాంగీవాళ్లంటూంటే, కొందరు మాత్రం, "బలేమామా బలే! అదే మన తక్షణ కర్తవ్యం" అంటున్నారు! ఇంకో ప్రక్క, కురువృధ్ధ జైపాల్ రెడ్డిని 'మీ నాయకత్వం అవసరం ' అంటున్నారు. మరి ఇంక బొర్రముక్కోడూ, మిడి గుడ్లోడూ, అంతమందిని బలిపెట్టి యేమి సాధించినట్టు?

మామూలుగా కాకపోతే, కుంచం తిరగేసి కొలవమన్నారు--అన్నాడు గిరీశం.

"ఆటునుంచి నరుక్కురమ్మన్నారు" అని కూడా అన్నాడు!

గాంధీ మార్గం ఫలితాన్నివ్వకపోతే, శివాజీ మార్గం ఆదర్శం అవుతుందన్నారు "అన్నా హజారే"! ఇప్పుడు అదే మార్గం పడుతున్నారేమో! "నీవు నేర్పిన విద్యయే నీరజాక్షా" అని చెప్పి, "వచ్చే యెన్నికల్లో కాంగీలకి వోటు వెయ్యొద్దు" అని ప్రచారం చెయ్యడానికి బయలుదేరుతానన్నాడు! దెబ్బకి దిమ్మతిరిగి, బొమ్మ గూట్లో పడింది......సల్మాన్ ఖుర్షీద్ అప్పుడే ప్రకటించేశాడు......"వచ్చే పార్లమెంటు సమావేశాల్లోనే "లోక్ పాల్" బిల్లుని ప్రవేశపెట్టి, ఆమోదింపచెయ్యడానికి ప్రయత్నిస్తాము" అని!

జై గాంధీ మార్గం! జై శివాజీ మార్గం! జై జై అన్నా హజారే!

సెన్సెక్స్ 16 వేలకన్నా క్రిందికి పడిపోయింది. ఇదివరకోసారి, 8 వేలకన్నా పడిపోతే సంతోషిస్తాను అని వ్రాశాను. యెందుకంటే, అది బలుపు కాదు వాపు అని ఖచ్చితంగా చెప్పాను. ఇప్పుడు నిజం అవుతోంది కదా? మూడీస్ ఎస్ బీ ఐ రేటింగుని తగ్గించేసింది. పిచ్చిదంబరం అనవసరంగా మార్కెట్లని వాచేలా చేసి, అదంతా బలుపు అనుకోమన్నాడు!

"నిరర్ధక ఆస్థుల" కాన్సెప్ట్ వచ్చినప్పటినుంచీ, యెలాగో అలా మేనేజి చేసి, (ఆడిటర్లకి ఆడీ కార్లు కొనిచ్చి) బ్యాంకులన్నీ తమకి నిరర్ధక ఆస్థులు దాదాపు లేవు అని ప్రకటించుకుంటూవస్తున్నాయి. ఇప్పుడు, మానవ ప్రమేయం లేకుండా, కంప్యూటర్లే ఈ ఆస్థుల నిర్ధారణ చేస్తున్నాయి. రేపు మార్చికి చూడాలి--ఈ బ్యాంకుల పరిస్థితి! యెన్నింటి గోడలూ, పునాదులూ చెదలు తినేశాయో!

ఇంకో ప్రక్క, "ఇంక కీలక రేట్లని పెంచొద్దు మహాప్రభో" అంటున్నారు పారిశ్రామిక వేత్తలు! దువ్వూరివారూ....ఆలకించకండి. మరోసారి వీళ్లకి పెద్ద యెత్తున షాక్ ఇవ్వండి! వృధ్ధి రేటు యేనెలకానెల జీరో అయినా, వృధ్ధి అంటూ జరక్కమానదు!

ప్రణొబ్ ముఖొర్జీ, తన కార్యాలయంలో దొంగ కెమేరాలు పెట్టించారు అని మొత్తుకొంటే, "దానితో వాడికి సంబంధం లేదు" అన్నారు. వాళ్ల శాఖ అప్పుడెప్పుడో వాడికి లేఖ వ్రాసింది అంటే, ఇప్పుడు "వాళ్లిద్దరూ ఫ్రెండ్స్!" అని షేక్ హేండులిప్పించేశారు! అసలు అది వాళ్ల మధ్య సమస్యా? మొత్తం దేశం సమస్యా?

ఇప్పుడు నెమ్మదిగా బయటకొస్తూంది......ఈ దరిద్రాలన్నింటికీ కారణం "అధిష్టానమే" అనీ, అక్కడ నేషనల్ ఎడ్వైజరీ కౌన్సిల్ పేర ఓ 17 మందితో "సూపర్ కేబినెట్" నడుస్తూంది అనీ, మంత్రులనీ, శాఖలనీ, పార్లమెంటులో బిల్లులనీ చదరంగంలో పావులని కదిపినట్టు ఆడిస్తోంది అనీ!

అరుణారాయ్ అనే ఆవిడ (తన సొంత లోక్ పాల్ బిల్ ఫేం) అందులో ముఖ్యురాలట. ఇంకా, హర్ష్ మందిర్ అనే మాజీ ఐయేఎస్ అధికారి ఓ సూపర్ కాప్ ట (బీజేపీని యెదుర్కొనే సత్తా వాడికే వుంది అని ఆవిడ నమ్మకంట)--ఆ కౌన్సిల్లో!

ఇంక రాజ్యాంగం యెందుకూ, మంత్రివర్గం యెందుకూ......అన్నీ కూడా యెందుకూ? పోనిద్దురూ!

కబుర్లు - 76

2011-10-03T08:29:00.000-07:00

అవీ, ఇవీ, అన్నీ

ప్రణాళికా సంఘం వారేదో, పట్టణాల్లో "తలకి" 32 రూపాయలూ, పల్లెల్లో "తలకి" 26 రూపాయలూ--"రోజుకి" సంపాదించేవాళ్లందరూ "దారిద్ర్యరేఖకి" పైనున్నట్టే అని నిర్ధారించి, కోర్టువారికి చెపితే, భాజపావారు, మన్మోహన్ సింగ్ పేరనొకటీ, సోనియాగాంధీ పేరనొకటీ రూ.32/- చొప్పున రెండు డీడీలు తీసి పంపించి, "ఈడబ్బులతో మీరు ఒక రోజు బ్రతికి చూపించండి!" అని సవాలు విసిరారట! (పాపం వాళ్లా డీడీలు మార్చుకోడానికి కూడా భయపడి మానేశారట!)

యోగాగురు 'బారాందే' "నల్లధనానికి వ్యతిరేకంగా" వుద్యమించి, బొక్కబోర్లా పడ్డాడు. ఇంకా వుద్యమం కొనసాగుతోంది అని ప్రకటిస్తున్నాడు! దానికి బదులు, దేశంలోని భక్త ప్రజలనబడే వారందరికీ "భక్తిపేరుతో మీ వేలంవెర్రుల్ని తగ్గించుకోండిరాబాబూ!" అని ఒక్క పిలుపిస్తే, సంతోషించేవాళ్లలో మొదటివాడిని నేను.

ఇంకా, నల్లధనాన్ని చాలావరకూ వెలికితీసే మార్గం నాకోటి తోచింది. అదేమిటంటే......గణపతి నవరాత్రులతో మొదలెట్టి, భారీ విగ్రహాలూ, భారీ లడ్డూలూ లాంటివే కాకుండా, కొత్తగా "కరెన్సీ" నోట్లతో అలంకరించడం అనే వెర్రి బాగా ముదురుతోంది! దసరా సందర్భంగా, పెద్ద పెద్ద అమ్మవారి గుళ్లేకాదు, వేంకటేశ్వర మొదలైన ఆలయాలేకాదు, పుంతలో ముసలమ్మదగ్గరనించీ, పెంటమీది పేరమ్మ వరకూ కనీసం పదో పదిహేనో లక్షలతో అలంకరిస్తున్నారు!

ఈమధ్య కొన్నిచోట్ల యేకంగా కోట్లలోకి కూడా చేరింది! నిన్నెక్కడో ఒకచోట కోటీ పదకొండు లక్షల పదకొండు వేలతో, ఇంకో రెండుమూడు చోట్ల కోటికి పైగా, అలంకరించారట!

ఈ డబ్బు యే ఖాతాల్లోంచి వస్తోంది, యే బ్యాంకుల్లోంచి వస్తోంది, ఒకవేళ పాతనోట్లు ఇచ్చి, కొత్తనోట్లు గ మార్చుతున్నారంటే, యే బ్యాంకు అధికారులకి భక్తి యెక్కువై అలాంటి పనులు చేస్తున్నారో.....ఇలాంటి విషయాలు వెలికి తీస్తే సరి! చాలా కష్టం అంటారా! అఖ్ఖర్లేదు. ఇలాంటి వివరాలన్నీ స్థానిక పోలీసు ఐ డీ పార్టీ కానిస్టేబుళ్లు సేకరించి, పై అధికారులకి పంపిస్తూనే వుంటారు. వారినే ఇంకొన్ని వివరాలు సేకరించమంటే సరి! యెలా వుంది అవిడియా?

మొన్న ఓ రోజు, చిన్నతిరపతి లో ఓ పెద్దమనిషి, ఖద్దరు చొక్కా, ఖరీదైన కళ్లజోడూ వగైరాలతో "నేను హైదరాబాదులో పెద్ద వ్యాపారిని. ఇక్కడ ఓ కల్యాణమండపం కట్టించడానికి 30 లక్షలు విరాళం ఇవ్వాలని నిశ్చయించుకున్నాను. ప్రస్తుతానికి, అన్నదాన పథకానికి గానూ ఓ లక్ష కి చెక్కు ఇస్తున్నాను" అనగానే, ఆలయ అధికారులు యెందుకైనా మంచిదని దేవస్థానం ఛైర్మన్ కి ఫోను చేసి మరీ....రాచమర్యాదలతో శ్రీవారి అంతరాలయ దర్శనంతోపాటు, పెద్దమొత్తంలో ప్రసాదాలూ వగైరాలన్నీ చదివించి, సాగనంపారట. ఆయన మళ్లీ ఓ పదిరోజుల్లో కల్యాణమండం గురించి మాట్లాడ్డానికొస్తానని చెప్పి మరీ వెళ్లాడట.

తీరా బ్యాంకుకి వెళ్లి చూస్తే, చెక్కుజారీ చెయ్యబడిన ఖాతాలో రూ.16/- మాత్రమే వున్నాయి అనీ, అంతకు ముందుకూడా ఆ ఖాతాలో ఐదువేలకి పైబడి లావాదేవీలు జరగలేదనీ తేలి, మింగలేక, కక్కలేక అధికారులందరూ సతమతమయ్యారట!

అవునుకదూ.....యెవరినైనా.....మెడలో కుక్కల గొలుసుల్లాంటివివేసుకొని, దానికి వేళ్లాడవలసిన "ఐడీ" కార్డులని చొక్కాజేబులో దాచుకొనే వాళ్లనైనా, అవి చూపించమని అడగడానికి మనవాళ్లకి అదేంటో....సిగ్గో, భయమో!

ప గో జి, కాళ్ల మండలం, పల్లిపాలెం గ్రామంలో, మొన్న ఓ యేడేళ్ల బాలుడు "విషపుటీగల" బారిన పడి మృతిచెందాడట. దాంతో, రెవెన్యూ అధికారులు, కొందరు గ్రామ సహాయకులతో (ఇంగ్లీషు సినిమాలు చూడడంలో నిపుణులేమో!) "ఆపరేషన్ రెస్క్యూ" నిర్వహించారట.

ఆ వూరి రామాలయం గోపురంలో ఆ విషపుటీగల "తుట్టె" వుండడంతో, బ్రహ్మాండమైన ప్లాను వేసి, సిబ్బంది "ఫైర్ ప్రూఫ్" దుస్తులు ధరించి, ముందుగా గోపురానికి నాలుగుప్రక్కలా వున్న రంధ్రాలని బంకమట్టితో పూడ్చేశారట.

తరవాత, ఇంకో రంధ్రంద్వారా, "మొనోక్రోటోఫాస్" పిచికారీ చేశారట. తరవాత, సిధ్ధంగా వుంచుకొన్న "పెట్రోలు" ఆ రంధ్రంగుండాపోసి, నిప్పంటించారట!

ఇంకేముందీ! ఆపరేషన్ సక్సెస్, బట్ పేషంట్ డెడ్ అన్నట్టు, పెద్ద విస్ఫోటం సంభవించి, ఆ గోపుర శిఖరం విరిగిపడి, ఒకతనికి తీవ్రగాయాలవగానే క్రిందకు దూకేసి, మిగిలినవాళ్లకి కూడా గాయాలై, ఆసుపత్రిలో చికిత్స పొందుతూ, అధికారులతోపాటు.... "హమ్మయ్య! విషపుటీగలని సమూలంగా నిర్మూలించాం!" అని సంతోషిస్తున్నారట.

ఇలాంటి "ఆపరేషన్" సరియైన భద్రతా చర్యలు లేకుండా, ప్లాను చేసినవాళ్లకీ, నిర్వహింపచేసినవాళ్లకీ మీరు యే యెవార్డు ఇప్పిస్తారు?

కబుర్లు - 75

2011-09-28T10:47:00.000-07:00

అవీ, ఇవీ, అన్నీ

"ఆండిముత్తు రాజా"....ఇంత సత్యసంధుడని యెవరూ అనుకోలేదు! ఆయన చెప్పినవన్నీ 'సత్యాలే' అని ఒక్కొక్కటీ బయటపడుతున్నాయి.

మొన్న ఆగస్ట్ 24న ఆయన కోర్టులో యేమన్నాడో చదవండి--"2జీ స్పెక్ ట్రం ద్వారా ప్రభుత్వానికి యెలాంటి నష్టం వాటిల్లలేదు. ఈ విషయాన్ని ఋజువు చేసేందుకు ప్రథాని మన్మోహన్ సింగ్, అప్పటి ఆర్థిక మంత్రి పి చిదంబరం, ప్రస్తుత టెలికం మంత్రి కపిల్ సిబల్ లను విచారించాలి.....నష్టం వాటిల్లలేదని ప్రథాని, ప్రస్తుత టెలికం మంత్రి పార్లమెంటులోనే ప్రకటించారు. వాళ్లని విచారిస్తే, నష్టం వాటిల్లలేదు అని ఋజువు అవుతుంది. అప్పుడు నామీద కేసేలేదు!" అన్నారు!

ఇప్పుడు వరుసగా బయటికి వస్తున్న "నోట్"లూ, లేఖలూ వగైరాల వల్ల, అంతా ప్రథానికీ, చిదంబరం కీ, ప్రణోబ్ కీ, తెలిసే జరిగింది అని నిరూపితమవుతోంది.

(ఇవి బయటపడడం కూడా స హ చట్టం వల్లేనట! జనలోక్ పాల్ అంటేనే ఈ మంత్రులందరూ యెందుకు వుచ్చలుపోసుకొంటున్నారో అర్థం అవుతోంది కదా?)

బుకాయింపుల పర్వం బాగానే సాగుతోంది. "మా అతివిలువైన సహచరుడు" ని అరెస్టు చెయ్యక్కర్లేదు, విచారించక్కర్లేదు అంటాడొకడు. మా నోట్ గురించి, 'నిపుణుల అభిప్రాయం' తీసుకున్నాకే మాట్లాడతానంటాడు పైగా!

నికమ్మా ప్రథాని అయితే, ఆయనమీద నాకు పూర్తి నమ్మకం వుంది అంటాడు....యెవడడిగాడనో! కాయితాలమీద వున్న విషయం గురించి మాట్లాడమన్నారుగానీ, నీకు యెవరిమీద నమ్మకాలున్నాయి అనడిగారా?

సంకీర్ణధర్మం పేర, అందర్నీ వీలైనంత దోచుకోడానికి చూసీ చూడనట్టు వ్యవహరించడం అనే నేరం చేశారాలేదా? అనడుగుతున్నారు! కరుణానిధికి, "మా తమిళనాడు మంత్రులెవరూ (యేపార్టీ వాళ్లయినా) రాజీనామా చెయ్యాల్సిన అవసరం లేదు. చెయ్యరు." అనే ధైర్యం వాడికి యెలా వచ్చింది?

"ప్రతిపక్షం మధ్యంతర యెన్నికలు రుద్దడానికి ప్రయత్నిస్తోంది(ట)!" వొద్దుబా....బూ! యే యెన్నికలూ వద్దు...మంత్రులందరూ జైళ్లలో కూచున్నా; ఆఫీసులకి రాకుండానే జీతాలు తీసుకుంటున్నా, పరిపాలనంటూ లేకపోయినా, రైళ్లూ బస్సులూ నడవకపోయినా, యెవరెలా పోయినా, యెన్నికలు మాత్రం వద్దు! మీ కుర్చీలు మీరు వదలొద్దు. అంతే!

ఒక్క నోటీసుతో, దిమ్మతిరిగి పట్టపగలే చుక్కలు కనిపించి, లిఖితపూర్వకంగా క్షమాపణ అడిగాడట--అన్నా హజరేని 'నువ్వు నిలువెల్లా అవినీతిపరుడివి ' అని దూషించిన మనీష్ తివారీ అనే ఓ కాంగీ అధికార ప్రతినిధి! చిరునవ్వుతో క్షమించేశాడట అన్నా! ఇంకెవరెవరు యేమేమి అంటారో చూడాలి.

సినిమాలో తప్ప బయట యెక్కడా వినిపించని పాటలు వున్నట్టు, యెవరూ పట్టించుకోని వార్తలు కొన్ని వుంటాయి--అవి యెంత ముఖ్యమైనవైనా!

ప్రభుత్వం వివిధ సందర్భాల్లో "స్వాధీనం చేసుకున్న ఆయుధాలు" గత పాతికేళ్లలో, 750 మంది "ఎం పీ" లు "కొనుక్కొన్నారు"ట! (ఇది కూడా స హ చట్టం క్రింద ప్రభుత్వం వెల్లడిచేసిన రహస్యమేనట!)

అలాంటి ఆయుధాలని, "సిట్టింగు" ఎంపీలకు మాత్రమే, మొదట అడిగినవారికి మొదట ప్రాతిపదికన "విక్రయించవచ్చు" అని రూలట!

అలా కొనుక్కున్నవాళ్ల లిస్టులో కొన్ని పేర్లు చూడండి.....యూపీ ముఖ్యమంత్రి మాయావతి; కాంగీ నేత జనార్దన్ ద్వివేది; భాజపా నాయకుడు షానవాజ్ హుస్సేన్; కేంద్ర మంత్రులు జయంతీ నటరాజన్; ప్రణీత్ కౌర్; విన్సెంట్ పాలా; మాజీ యెన్నికల ప్రధానాధికారి ఎమ్మెస్ గిల్; ప్రస్తుత సీ ఎం లు భూపీందర్ సింగ్ హుడా; శివరాజ్ సింగ్ చౌహాన్; ఇంకా నాయకులు జగదీష్ టైట్లర్; వీకే మల్ హోత్రా; మదన్ లాల్ ఖురానా; సజ్జన్ కుమార్; సీపీయెం సీనియర్ నేత సుభాషిణీ ఆలీ; ప్రస్తుతం జైలు శిక్ష అనుభవిస్తున్న మాజీ ఎంపీలు అతీక్ అహ్మద్; సురేష్ కల్మాడీ; బాబూభాయ్ కటారాలు కూడా అలా కొనుక్కొన్నారట!

మరి వీళ్లకి ప్రజలడబ్బు తగలేసి జడ్ కేటగరీ; జడ్ ప్లస్; జడ్ ప్లస్ ప్లస్ అంటూ భద్రత కల్పించడం యెందుకో?

పోనీ ఆ విషయం ప్రక్కన పెట్టినా; వాళ్లలో యెంతమంది మళ్లీ ఆ ఆయుధాలని ఇతరులకి యెన్ని లక్షలకి విక్రయించారో; ప్రస్తుతం అవి యెవరిదగ్గర వున్నాయో, వాటికి లైసెన్స్ లు వున్నయోలేదో, మళ్లీ అవి యెప్పుడైనా స్వాధీనం అయ్యాయేమో--ఇలాంటి సమాచారం కోసం యెవరైనా ఇంకో స హ దరఖాస్తు చేశారంటారా? చేసే వుంటారు.....!

ప్రథాన యెన్నికల కమీషనరుగా ఎస్ వై ఖురేషీ నియామకమే తప్పుడు వ్యవహారం అన్నారందరూ.

ఇప్పుడు వాడేమంటున్నాడో చూడండి.....హజారే అన్నట్టు ఎంపీల రీకాల్ భారత్ లాంటి పెద్ద దేశం లో ఆచరణ సాధ్యం కాదుట. వ్యవస్థ అస్తవ్యస్థంగా తయారవుతుందిట. అనేక సమస్యలకి దారి తీస్తుందిట. అలాగే, అభ్యర్థులందరినీ తిరస్కరిస్తున్నాం అని బ్యాలెట్లో ఆప్షన్ ఇస్తే కూడా బోళ్లు సమస్యలు వచ్చేస్తాయట.

ఒకవేళ వోటర్లందరూ అందరు అభ్యర్ధులనీ తిరస్కరిస్తే, యేం చెయ్యాలి అనే సమస్య వస్తుందిట! ఇంటింటికీ తిరిగి చేసే ప్రచారం కూడా మంచిది కాదుట!

పెద్ద దేశం అని యెన్నికలు నిర్వహించడమే మానేస్తామా? వీడి సందేహాలకి చిన్నపిల్లాడు కూడా సమాధానాలు చెప్పగలడు. అయినా సమస్య వచ్చినప్పుడు యేంచెయ్యాలో ఆలోచించచ్చుగా? ముందునుంచీ అన్నీ వ్యతిరేకించడం యెందుకు? "అమ్మ చెప్పిందీ......" గనుకా?

సకలజనుల సమ్మెవల్ల యెవరికైనా యేదైనా మేలు జరిగిందో లేదోగానీ, పరోక్షంగా కొందరికి మేలు జరిగిందేమో అనిపిస్తూంది! యెందుకంటే, "ఏపీబీసీఎల్" డిపోల నుంచి దుకాణాలకి మద్యం సరఫరా నిలిచిపోయిందట! మొత్తం 38 డిపోలుంటే, అందులో 17 తెలంగాణాలో వున్నాయట! అవి మూతపడడంతో, ప్రక్క జిల్లాల నుంచి యెలాగోలా తెప్పించి సరఫరా చేసినా, యేమాత్రం సరిపోవడం లేదట! ఇంక అది కూడా సాధ్యం కాకపోవడంతో, "ప్రభుత్వానికి కోట్లలో నష్టం వస్తూంది....."అనిమాత్రమే....చింతిస్తున్నారట ప్రభుత్వం వారు!

మొన్న జేపీ ఢిల్లీలో అదేదో సంఘం ముందు తన అభిప్రాయాలు వెల్లడించాక, తను చెప్పిన విషయాలు మీడియాకి వెల్లడిస్తే, ఆయన చెప్పిన వాటితోపాటు, "జనలోక్ పాల్" ఓ రాజ్యాంగేతర శక్తి అవుతుంది అనికూడా అన్నాడు అని రిపోర్టు చేశారు--ఈనాడుతో సహా! నిన్న ఆయన నేను అనని మాటలని మీడియా వాళ్లు కావాలనే ప్రచారం చేశారు అన్నాడు! నమ్ముదాం మరి.

వీళ్లకి పదవులివ్వడమే దండగ అనుకొంటే, ప్రతీ వూళ్లోనూ వాళ్లకి సన్మానాలూ, పేపర్లో శుభాకాంక్షల ప్రకటనలూ, కత్తో, గదో, కిరీటమో, యెద్దుకొమ్ములో బహూకరించడాలూ.....ఇవన్నీ అవసరమా??

యేమంటారు?

కబుర్లు - 74

2011-09-21T10:08:00.000-07:00

అవీ, ఇవీ, అన్నీ

బస్సుల్లో రిజర్వేషన్లకి వెయిటింగ్ లిస్ట్, సగం మంది మిగిలినా ఇంకోబస్సూ--ఇలా సంతోషించినంతసేపు పట్టలేదు--మళ్లీ మెలికలు పెట్టారు. ఇలా ప్రత్యేకంగా వేసిన బస్సుల్లో 50శాతం రుసుం అదనంగా వసూలు చేస్తారట! గరుడ బస్సుల్లో వెయిటింగులిస్ట్ అంటూ 5 టిక్కెట్లే ఇస్తారట. అలా 20 మంది దాటినా గరుడ బస్సులని మాత్రం ప్రత్యేకంగా వేయరట! మరి కేన్సిలేషన్లేవీ లేకపోతే, వెయిటింగ్ లిస్ట్ వాళ్ల గతేమిటో! సూపర్ లగ్జరీలకి అయితే, వాళ్లకి యే బస్సులో సీటు కేటాయించారో, ఎస్ ఎం ఎస్ పంపిస్తారట!

Indian Minerva పొరపాటున Indianrailways.gov.in లోకి వెళ్లి వుంటారు.

అనేకసార్లు "వెబ్ పేజ్ నాట్ అవైలబుల్" అని, యెప్పటికో వోపెన్ అవుతుంది. వెబ్ సైట్ ప్రారంభమైనప్పటినుంచీ, దాదాపు మూడునెలలకిపైగా "ఈ టికెటింగ్ ఫెసిలిటీ హేస్ బీన్ టెంపరరిలీ స్టాప్డ్...." అనే చూపిస్తోంది.

మిగిలిన ప్యాసెంజర్ సర్వీసెస్ లో, జర్నీ ప్లానర్, పీ ఎన్ ఆర్ స్టేటస్, ఎరైవల్/డిపార్చర్ లు బాగానే పని చేస్తాయి మన అదృష్టం బాగుంటే!

టికెట్ రిజర్వేషన్ కి మాత్రం ఇంకా ఐఆర్ సీటీసీనే బాగుంది.

మొన్ననే, కి కు రె మన రాష్ట్రంలో "స్త్రీనిధి" అని ఓ బ్యాంకులాంటిది--1098 కోట్లతో ప్రారంభించాడు. దీని వుద్దేశ్యం--డ్వాక్రా సంఘాల సభ్యులు, సూ ఋ సంస్థల బారిని పడకుండా, తమకి తామే అప్పులు ఇచ్చుకొంటూ, తీర్చుకొంటూ 'అభివృధ్ధి' చెందడానికట.

మరి అభివృధ్ధికల్లా మూలం యేమిటి? ఇంకేమిటి--రాష్ట్ర వ్యాప్తంగా 925 సంఘాలకీ, 925 కోట్లతో "కమ్యూనిటీ" భవనాల నిర్మాణం(ట). మిగిలే కోట్లతో, ఒక్కో సభ్యురాలికీ రూ.15,000/- మాత్రమే ఋణంగా ఇవ్వడం(ట).

లక్షల్లో అప్పులుచేసి, బంగారాలు కొనేసి, వాయిదాలు కట్టడానికి మళ్లీ వాటిని "ముత్తూట్"; "మణుప్పురం" లలో తనఖాపెట్టి, అవీ తీర్చలేక, ఇవీ తీర్చలేక కాదూ--మహిళలు విషవలయం లో చిక్కుకున్నది? వీళ్లకి 15 వేలు యేమూలకి?

ఇంక "వాళ్లేమో" బంగారాన్ని కరిగించేసి, లక్ష్మీదేవి బొమ్మతోనూ, మేరీమాత బొమ్మతోనూ.....ఇలా నాణాలు తయారుచేయించి, (అప్పట్లో తక్కువరేటుకి 'పడేసుకొన్న' బంగారాన్ని, ఇప్పటి యెక్కువరేటుతో అమ్ముకొని,) కొన్ని వందల కోట్లు కేరళకి తరలించుకుపోతున్నారు! ఆర్బీఐ యేమో ఇప్పుడు "ఎన్ బీఎఫ్ సీ"లకి కొన్ని నిబంధనలు విధించడం గురించి ఇంకా 'ఆలోచిస్తూంది!'(ట).

సరేలెండి. బాగానే వుంది కదా.

ఇంక, ఓ "క్రీడాధికారి" మొన్నంటాడూ--క్రీడలకి 'ఇతోధిక' ప్రోత్సాహం ఇవ్వడానికి, 923 కోట్లో యెంతో పెట్టి, అన్ని గ్రామాల్లో, "క్రీడా ప్రాంగణాలు" నిర్మిస్తారట! (ప్రాంగణాలంటే స్టేడియం లు కాదట--ప్రత్యేక భవనాలేమో!)

ఇంకో మంత్రంటాడూ, యేలూరులో యెప్పుడో నిర్మించిన "స్టేడియం" శిధిలమైపోయింది, దాన్ని త్వరలో, కొన్ని కోట్లతో పునర్నిర్మిస్తాము అని! (ఆ స్టేడియం నిర్మించాక ఒకటో రెండో రంజీ మ్యాచ్ లు తప్ప, అక్కడ యేక్రీడా జరగలేదు--మదన కామ క్రీడలు తప్ప!)

యెవరూ 1000 కోట్ల గురించి మాట్లాడడంలేదు చూడండి! అలా మాట్లాడితే, సీబీఐ వాళ్లు వెంట తరుముతారో యేమో ఖర్మ!

అసలు ఈ రానాలు మట్టినీ, ఇసుకనీ, సిమెంటునీ, కంకరనీ ఇలా తినేసి, అరిగించేసుకొంటూ, పొట్టలు పెంచేసుకొంటూ వుండగా, గాలో యెవడో ఇనుముని డెభ్భైనాలుగో యెన్నో కిలోల బంగారంగానూ, 23 యెన్నో కోట్ల నగదుగానూ మార్చుకున్నాడని యేడవడం యెందుకు???!!!

ఇంక మన ఆర్ టీ యే లగురించి యెంత తక్కువ మాట్లాడుకుంటే అంత మంచిది. దశాబ్దాల క్రితమే "బ్రోకర్ల" వ్యవస్థ రద్దు చేసినా, మనం యేదైనా పనిమీద అక్కడికి వెళితే, అక్కడ అసలు వుద్యోగులు వుండరు--వాళ్లు నియమించుకున్నవాళ్లు వాళ్ల పని చేసేస్తూ వుంటారు. వాళ్లు "మీ బ్రోకరు యెవరు? అతన్ని పంపించండి" అంటారు. అక్కడి "హెల్ప్ డెస్క్"లు బ్రోకర్లకీ, వుద్యోగులకీ మధ్య సూపర్ బ్రోకర్లుగా మారాయి!

ఇంక, కోట్లతో టెస్ట్ ట్రాక్ లూ, సిమ్యులేటర్లూ యేర్పాటు చేస్తున్నాం, ఆన్ లైన్ లో అవి చేస్తాం, ఇవి చేస్తాం అంటారు గానీ, కొన్ని వందల ట్రాఫిక్ సిగ్నల్స్ లో యే రెండో మూడో అడిగి, లైసెన్స్ ఇచ్చేస్తారు! కొన్న బైక్ స్పీడ్ యెంత, సరిగ్గా బ్రేక్ వెయ్యగలడా, పార్కింగ్ చెయ్యడం వచ్చా, ఓవర్ టేకింగ్ యెలా చేస్తున్నాడు--ఇలాంటివన్నీ పరీక్షించరు! అలా జరిగి వుంటే, ఓ "అయాజ్" బలయి వుండేవాడుకాదు పాపం!

అన్నట్టు మన గవర్నరు గారు, స హ చట్టం మంచిదే గానీ, అది దుర్వినియోగం అయిపోతోంది....దానిపేరు చెప్పి అధికారులని బెదిరించేస్తున్నారు....అని వాపోయారట! తోలుమందం అధికారులని అలా "బ్లాక్ మెయిల్" చేసినా తప్పులేదంటాను నేను. మరి ఆయనకి అంత బాధ యెందుకు వచ్చేసిందో!

కబుర్లు - 73

2011-09-20T00:33:00.000-07:00

ఆవీ, ఇవీ, అన్నీ

(పేర్ల మార్పుల గురించి)-- ఇంకా, వుత్తరప్రదేశ్ నుంచి విడిపోయిన రాష్ట్రం "వుత్తరాంచల్" ని 2007 లో "వుత్తరాఖండ్" గా మార్చారట. ఆంచల్ అన్నా, ఖండ్ అన్నా భాగమేకదా? మరి ఇదెందుకో!

పాండిచ్చేరి పేరుని సుమారు 130 యేళ్లు పాలించిన ఫ్రెంచి వాళ్లు పెట్టారుట. దాన్ని తరువాత పుదుచ్చేరి (కొత్త గ్రామం) అని మార్చారట. ఆ గ్రామం అసలు పేరు అదేననీ, దాన్ని పలకడం ఫ్రెంచివాళ్లు పాండిచ్చేరి అనేవారనీ చెప్పలేదెందుకో!

"ఆస్సాం" ని అసోం గానూ, "ఓరిస్సా"ని ఒడిశా గానూ మార్చారు. గుజరాత్ లోని "వడోదర" పట్టణాన్ని, ఆంగ్లేయులు నోరు తిరగక, బరోడా అని పిలిచారట. దాన్ని తిరిగి 1974లో వడోదర గా మర్చారట. "వటోదర" అంటే మర్రిచెప్పు పొట్టలొంచి పుట్టిన పట్టణమట!

కేరళలోని "త్రివేండ్రం" ని అనంత పద్మనాభుని పేరిట, తిరువనంతపురంగా మార్చారట. (అంతకు ముందు దాన్ని "తిరువాన్‌కూరు" అనీ, ఇంగ్లీషువాళ్లు "ట్రేవన్‌కూరు" అనీ; ఇప్పటికీ ఆ రాజులని, వాళ్ల సంస్థానాన్నీ "తిరువాన్‌కూరు" సంస్థానం అనీ యెందుకు వ్యవహరిస్తున్నారో, ఆపేర్లు "గాలికి" యెందుకు కొట్టుకుపోయాయో; కొట్టుకుపోకుండా యెందుకు వున్నాయో--యెవరైనా చెప్పగలరా? జయలలిత తన పేరుని జయలలితా అనే వ్రాయమంటే జీ హుజూర్ అన్న మీడియా, పురందరేశ్వరిని--పురంధేశ్వరి; పురంధరేశ్వరి; పురంధ్రేశ్వరి అనీ ఇలా ఇష్టం వచ్చినట్టు వ్రాయడం యెందుకో--అందుకే!)

ఇంకా అక్కడి "కొచ్చిన్" ని కొచ్చి గానూ; "కళ్ళికోట" కాలికట్ గా మార్చబడ్డ పట్టణాని కోజికోడ్ అనీ; "అలెప్పీ" ని అళప్పుజ గానూ మార్చారట. తమిళనాడులోని "కంజీవరం" ని కాంచీపురంగానూ, "కేప్ కోమరిన్" ని కన్యాకుమారిగానూ మార్చారట.

ఇంక మన రాష్ట్రంలో 1970లో ఒంగోలు జిల్లా యేర్పడిందిట. దాన్ని 1972లో ప్రకాశం జిల్లాగా మార్చారట.

1978లో హైదరాబాదు "రాష్ట్రం" హైదరాబాదు రూరల్; హైదరాబాదు అర్బన్ అనే రెండు జిల్లాలుగా విడిపోతే, రూరల్ కి కొన్ని ఇతర ప్రాంతాలు కలిపి, అప్పటి ముఖ్యమంత్రి మర్రి చెన్నారెడ్డి మామగారైన "కే వీ రంగారెడ్డి" జిల్లాగా మార్చారట. అది ఇప్పుడు "రంగారెడ్డి" జిల్లాగా వ్యవహరించబడుతూంది. (ఆయన ప్రఖ్యాత "పిడతల రంగారెడ్డి" కాదు).

ఇటీవల నెల్లూరు జిల్లాని "పొట్టి శ్రీరాములు నెల్లూరు జిల్లా" అని మార్చారట. ఇంకానయం, "మనుమసిధ్ధిపాలించిన విక్రమసిమ్హపురం అనే నెల్లూరుని మార్చిన పొట్టి శ్రీరాములు జిల్లా" అనలేదు!

ఇంకా మొన్నమొన్న, కడపజిల్లా పేరుని "వై ఎస్ ఆర్ కడప జిల్లా" అని మార్చారట! (డిటో....దేవునిగడప అనబడిన కడప అనబడిన వై ఎస్.....అనలేదు!)

అసలు విషయమేమిటంటే, రాష్ట్రాలు యెన్ని పేర్లు మార్చినా, కొన్ని అప్పటప్పటి "ఆక్ట్"లకి లోబడి, పేర్లు మార్చడం అసాధ్యమట! అందుకే, "బోంబే హైకోర్టు"; "బోంబే స్టాక్ ఎక్స్చేంజి"; "మెడ్రాసు హైకోర్టు"....ఇలా కొనసా....గిస్తున్నారట!

ఇవన్నీ బాగానే వున్నాయిగానీ, "అల్లాహ్"ఆబాద్; "ఔరంగ్"ఆబాద్; "హైదర్"ఆబాద్; "సికిందర్"ఆబాద్; "నిజాం"ఆబాద్; "ఆదిల్"ఆబాద్; "తుగ్లక్"ఆబాద్ వగైరాలనీ; "వరంగల్"; "కరీం"నగర్ ఇలాంటి వాటినీ యెందుకు మార్చరు?! (మారిస్తే, కాంగీవారి ఓ జాతికి చెందిన సోదరులు ఆగ్రహిస్తారనీ, వోట్లు వెయ్యరనీ భయమా?! యేమో! మీరే చెప్పాలి.

మిగతా......మరోసారి!

కబుర్లు - 72

2011-09-17T00:41:00.000-07:00

అవీ, ఇవీ, అన్నీ

ఇంక పేర్లమార్పు గురించి మొన్న (11-09-2011) ఈనాడు ఆదివారంలో ఓ వ్యాసం వచ్చింది.

పోర్చుగీసువాళ్లు వాళ్ల భాషలో, "బోం బహియా" (మంచి తీరం) అని పిలిస్తే, అది "బోంబే" గా మారిందనీ, స్థానికులు పూజించే "ముంబాదేవి" పేరుమీద దాన్ని 1996లో "ముంబాయిగా" మార్చారు అనీ వ్రాశారు. (మొదటిదానికి ఆథారాలేమిటో నాకు తెలీదు).

మద్రాసు అసలుపేరు "మదరాసు" అనీ, ఈస్ట్ ఇండియా కంపెనీవాళ్లు అక్కడికి వచ్చాక, సమీపంలో స్థానికులు "చెన్నపట్టణం" యేర్పాటు చేసుకున్నారు అనీ, దాన్నే తమిళులు "చెన్నై" అనేవారనీ, తరవాత, ఆ రెంటినీ కలిపి, మద్రాసు అనే వ్యవహరించేవారు అనీ, తరవాత తమిళతంబిలు దాన్ని "చెన్నై" గా మార్చారు అనీ వ్రాశారు.

"కాళీకా తా" అంటే కాళీమాత అని అర్థంట. ఆ పేరుమీదే కోల్కతా అని పిలిచేవారట. బ్రిటిష్ వాళ్లు దాని క్యాల్కట్టా అని పలికితే అదే స్థిరపడింది. 2001 లో దాన్ని "కోల్కత్తా" అని మార్చారు మన బంగబంధులు. (వీళ్లకి అనవసరంగా "ఓకారాలు పెట్టడం" ఓ ఆనవాయితీ). దీనికి సంబంధించి ఓ తెలుగు జోకు:

కట్టమంచి రామలింగారెడ్డిగారు ఆంధ్రా యూనివర్సిటీ వైస్ ఛాన్సెలర్ గా వున్న రోజుల్లో, ఓ బంగాయన ఇన్స్ పెక్షన్ కో దేనికో వచ్చి, రెడ్డిగారు ఆయన గదిలో లేకపోవడంతో, "వేరీజ్ రోమలింగారెడ్డి?" అని చిందులు తొక్కుతూంటే, అప్పుడే అక్కడికి వచ్చిన రెడ్డిగారు, "రోమలింగారెడ్డి, యోనివర్సిటీని వదిలి వెళ్లడులెండి!" అని సముదాయించాడట!

అలాగే, మన మంగళంపల్లివారు, దశాబ్దాలుగా మెడ్రాసులో వుంటూ, బాగా సాంబారు తాగడంవల్లేమో, నోరు బాగా సాగదీసుకొని, "పెలుకే బెంగారమాయెరా.....అందాల రేమ...." అని పాడతారు. పాపం అది ఆయన పధ్ధతి!

(ఇదంతా రోమాయణంలో పెడకలవేటలెండి!)

ఇక, బెండకళూరు--అంటే వుడికించిన బీన్స్ (దొరికే ప్రాంతం) కాబట్టి 14వ శతాబ్దంలో ఆ పేరు వచ్చిందిట. అప్పట్లో, హొయసల రాజు "బళ్లాలుడు" ఈ ప్రాంతంలో వేటకు వచ్చి, ఆకలితో అలమటిస్తుంటే, ఒకామె, ఆ బీన్స్ పెట్టిందట. అందుకాయన ఆ ప్రాంతానికి ఆ పేరు పెట్టాడట. (దీనికాథారాలు యేమిటో, తరువాత అది బెంకళూరుగాకాక, బెంగుళూరుగా యెందుకు మారిందో నాకు తెలీదు). దాన్నే ఇప్పుడు బెంగళూరు అని మార్చారు కన్నడ కస్తూరివారు.

నాకయితే, అటు టిప్పు సుల్తాన్ కీ, ఇటు బహమనీ సుల్తానులకీ, ఇటు బ్రిటిష్, ఫ్రెంచ్, పోర్చుగీసు వాళ్లకీ అనేక "బెంగలు" కలిగించినందుకే దాన్ని "బెంగల వూరు" అన్నారనీ, అదే బెంగళూరుగా మారిందనీ ఓ నమ్మకం.

ఇంకా ఆ బళ్లాలుడి అరి అంటే శత్రువు స్థాపించిందే నేటి వార్తల్లో వున్న "బళ్లారి" అనీ, అక్కడ వున్న కోట నిన్నో, మొన్నో కట్టినంత క్రొత్తగా వుంటుంది అనీ నా వుద్దేశ్యం.

మిగతా........మరోసారి!

కబుర్లు - 71

2011-09-16T10:12:00.000-07:00

అవీ, ఇవీ, అన్నీ

నా కబుర్లు - 70 మీద ఓ అన్నోన్ వ్యాఖ్యానించారు--".....రద్దు అనగానే......'సూట్ కేసులు '....." అంటూ.

నిజానికి ఇప్పుడంత సీన్ లేదండి! రెండేళ్లకి పైగా వ్రాయబడుతున్న టపాల లింకులని కొంతమంది సహృదయులు రైల్వే అధికారులకి పంపించీ, పేపర్లలో వాళ్లని కడిగేసేలా వ్యావాసాలు వచ్చీ, విజిలెన్స్ దాడులూ అవీ జరిగీ, ఇప్పటికి కొంత మంచి జరుగుతోంది. అందుకని, మనం నిర్భయంగా వుండొచ్చు.

ఇంక Indian Minerva, కబుర్లు బాగున్నాయి అంటూ, "విశేషాధికారాలు" గురించి, మిగతా విషయాలగురించీ వ్రాశారు.

మనరాజ్యాంగం, న్యాయసూత్రాలూ ప్రకారం, ఓ ముద్దాయికి "మరణ శిక్షని" ఖాయం అని ఓ న్యాయస్థానం తీర్పు ఇచ్చాక (అది దేశ అత్యున్నత న్యాయస్థానమే అవనక్కరలేదు.), ఆ ఖైదీ రాష్ట్రపతికి క్షమాభిక్షకోసం దరఖాస్తు చేసుకోవచ్చు. రాష్ట్రపతి మళ్లీ ఆ దరఖాస్తుని కేంద్ర మంత్రివర్గానికి పంపించి, మీ అభిప్రాయం చెప్పండి అంటారు.

అక్కడ జరుగుతోంది లండాచోరీ.

మనదేశ ప్రథమ ప్రథాని నెహ్రూ నుంచి, దేవెగౌడ గాడిదాకా, అక్కణ్నించీ మన్మోహన్ దాకా, అందరూ రోజుకి 18 గంటలూ, ఇంకా అత్యవసరమైతే 20 గంటలూ శ్రమపడినా, అంతకు ముందు నానవెయ్యబడిన "రోకళ్లు" యెంతవరకూ నానాయో చూసుకోవడం, ప్రతిరోజూ వచ్చే ఓ పదో యెన్నో రోకళ్లని క్రొత్తగా నానెయ్యడం లాంటి పనులకే ఆ సమయం సరిపోవడంలేదు!

ఇంక కేబినెట్ సమావేశానికి ఆ క్షమాభిక్ష దరఖాస్తు చేరాలంటే, ప్రథానమంత్రి కార్యాలయం నుంచి అది ప్రయాణిస్తూ, హోం శాఖద్వారా, న్యాయ శాఖ ద్వారా, అవసరమైతే విదీశీ వ్యవహారాల శాఖ ద్వారా....ఇలా ప్రయాణించి, చేరాలి.

తీరా అక్కడికి చేరేటప్పటికి, వాళ్లు మళ్లీ దీన్ని ఓ క్రొత్త రోకలిగా నానేస్తారు. అది చర్చకి వచ్చినప్పుడు, ఖైదీ యే అఫ్జల్ గురునో అయితే, మంత్రులకి తమ ఓజాతి సోదరులూ, రాజీవ్ హంతకులు అంటే మరోజాతి సోదరులూ, యే గ్రాహం స్టెయిన్ హంతకులో అంటే, ఇంకోజాతి సోదరులూ, యే తందూరి హత్యాపాతకులో అంటే, వేరేరకం సోదరులూ......ఇలా గుర్తుకు వచ్చి, "రోకలి నాననివ్వండి.....అప్పుడు చూద్దాం!" అనేస్తారు.

ఇలాంటి పెద్దకేసులు కాకుండా, యే ఫేక్షన్ హత్యల కేసో, పరువు హత్యల కేసో అయితే, రోకలి బాగా నానిన తరవాత, "మరణశిక్ష ఖాయం" అని రాష్ట్రపతికి సిఫార్సు చేస్తారు.

ఆ దస్త్రం, మళ్లీ వైకుంఠపాళీలో నిచ్చెనలూ, పాములూ దాటుకుంటూ రాష్ట్రపతికి చేరినా, రాష్ట్రపతి కూడా--పుణ్యక్షేత్రాలు దర్శిస్తూ, అనేక ప్రదేశాల్లో విశ్రాంతి తీసుకొంటూ, విదేశ అతిథులని ఆహ్వానించడం, బహుమతి ప్రదానోత్సవాలూ, కాన్‌ఫరెన్సుల్లో 'పిలుపులు ఇవ్వడం ' లాంటి కార్యక్రమాలతో, రోజుకి 20 గంటలు పనిచేస్తూ, ఈ దస్త్రం దగ్గరికి రావాలా?

ఈ మధ్యలో, యెప్పుడో ఆదస్త్రం మీద "ఫలానా తేదీలోపల, జైలువారికి అనుకూలమైన సమయంలో మరణశిక్ష అమలుపరచండి" అనే క్రింది అధికారి నోట్ మీద, రాష్ట్రపతి సంతకం అనే అఫీషియల్ రబ్బర్ స్టాంప్ పడుతుంది. రొటీన్ గా ఆ విషయం పత్రికలవాళ్లకి తెలియజెయ్యబడుతుంది.

అప్పుడు మళ్లీ, "ఆ శిక్ష మీద స్టే మంజూరు చెయ్యాలి" అంటూ పిటిషన్లు దాఖలు అవుతాయి--సుప్రీం కోర్టులో. డిఫెన్సు లాయరు యే రాం జేఠ్మలానీయో అయితే, వెంటనే స్టే లభిస్తుంది. ఆ కేసు, మిగిలిన కొన్నివేలకేసులతోపాటు, కొన్ని సంవత్సరాలుగా వాయిదాలు పడుతూ పోతూ వుంటుంది!

యేతావాతా తేలేదేమిటంటే, కోటికి పడగెత్తిన ధనవంతుడైనా, అమానుషుడైన హంతకుడైనా, సామాన్యమానవుడైనా, వాడికి భూమ్మీద నూకలు పూర్తిగా చెల్లేంతవరకూ, శివుడాజ్ఞ అవదనీ, అప్పటివరకూ వాళ్లని చీమైనా కుట్టలేదనీ, మన రాజ్యాంగమూ, మనమూ అందరూ నిమిత్తమాత్రులమేననీ!

అదండీ సంగతి!

మిగతా విషయాలమీద మరోసారి.

కబుర్లు - 70

2011-09-15T09:20:00.000-07:00

అవీ, ఇవీ, అన్నీ

రాజీవ్ హంతకులకి మరణశిక్షని నిలుపుదల చేస్తూ, మద్రాస్ హైకోర్టు స్టే విధించిందట మొన్నెప్పుడో. సుబ్రహ్మణ్యం స్వామి ఆ కేసుని తమిళనాడులో కాకుండా, వేరే రాష్ ట్రంలో విచారణ జరపాలంటూ సుప్రీం కోర్టుకి వెళతానంటున్నాడు.

అసలు వీళ్లందరూ మరిచిపోతున్నది--వాళ్లు ఒక్క రాజీవ్ హంతకులే కాదు--గొల్లపూడివారన్నట్టు, మారణహోమం సాగించి, మరో 17 మందినో యెంతమందినో (వాళ్ల పేర్లు కూడా దొరకడం లేదట ఇప్పుడు--ఇదీ ఆయనన్నమాటే!) పొట్టన పెట్టుకొని, కొన్ని పదులమందిని క్షతగాత్రులనీ, వికలాంగులనీ చేసినవాళ్లు అని! (వాళ్ల పేర్లగురించీ, వాళ్ల ప్రస్తుత స్థితిగురించీ తెలుసుకోడానికి యెవరూ ప్రయత్నించినట్టులేదు.)

మా చిన్నప్పుడు హైస్కూల్లో "బాయ్ స్కౌట్స్" "గర్ల్ గైడ్" శిక్షణలుండేవి. (సర్ బేడెన్ పౌల్ అనే ఆయన స్థాపించాడు స్కౌట్స్ ఆర్గనైజేషన్ ని.) ఆ శిక్షణలో భాగంగా, విరామ సమయల్లో "యెల్" అని కొత్త కొత్త రైమ్‌స్ లాంటివి నేర్పించేవారు. (యెల్ అంటే, "కేక"/"పిలుపు" అని అర్థం. అసలు మన తెలుగులో ఓ విచిత్రమైన పదం ఈ కేక. "సాయంత్రం సినిమాకి వెళతాను" అని ఒకడంటే, "నువ్వేళ్లేటప్పుడు కేక పెట్టరా, నేనూ వస్తాను" అంటాడింకోడు!)

ఇంతకీ ఒక యెల్ యెందుకో జ్ఙ్ఞాపకం వచ్చింది. అది:

వర్షమురానీ,
తుఫానురానీ,
ఆటలు ఆడగ,
పాటలు పాడగ,
తయారు మేన్!
హ హ్హ హ్హ హ్హ!

ఇప్పుడదెందుగ్గుర్తొచ్చిందంటారా! వస్తున్నా....అక్కడికే!

వర్షమురానీ,
తుఫానురానీ,
యెండలు మండనీ,
చలిపులి కొరకనీ,
హెలికాప్టరెక్కనునేను,
హ హ్హ హ్హ హ్హ!

అనేశాడు మన కి కు రె. ఇవాళ (15-09-2011) ప గో జి పర్యటనకి బయలుదేరి, ఓ ముష్టి జెట్ ఎయిర్ వేస్ విమానంలో రాజమండ్రి బయలుదేరితే, మధురపూడి విమానాశ్రయంలో మబ్బులు దట్టంగా వుండి, విమానం చాలాసేపు గాలిలో చక్కర్లు కొడుతూ, చివరికి హైదరాబాదు తిరిగివెళ్లిపోమని అదేశాలు అందిన మరుక్షణమే గ్రవుండ్ క్లియరెన్స్ దొరికి, మీడియావాళ్లు చాలాసేపు "వుత్కంఠగా" యెదురు చూసింతరవాత, సురక్షితంగా దిగిందట ఆ విమానం!

రేపణ్నించీ ఆయన "విమానాలు కూడా--జెట్ ఎయిర్లూ, స్పైస్ జెట్లూ, కింగ్ ఫిషర్లూ--యెక్కను" అని ప్రకటిస్తాడేమో!

అది కాదు విశేషం!

రెండురోజులనించీ, సీ ఆర్ ఆర్ కాలేజీ గ్రవుండులో హెలీపాడ్ వద్ద "ట్రయల్ రన్ లు" చేస్తున్నారట. (రాజమండ్రి నుంచి యేలూరు హెలికాప్టర్లో రావాలి ఆయన!)

అదీ పెద్ద విశేషం కాదు.

"మంత్రి పితాని", సీ ఎంగారూ, పెద్ద నాయకులూ తరచూ యేలూరు వస్తూంటారు కాబట్టి, "శాశ్వత ప్రాతిపదికన" జిల్లాలోని ముఖ్యమైన పట్టణాల్లో హెలీపాడ్లు నిర్మించాలనీ, వాటికి అనువైన స్థలసేకరణ వెంటనే జరిగేలా చూడాలి అనీ, జిల్లా కలెక్టరు కి సూచించారట!!!!!!

బాగుందా??

అన్నట్టు, ఇవాళే మరోచోట ఇంకో ముఖ్యకార్యక్రమం జరగబోతోంది. "తమిళనాడు" లో (అసలు జనాలకి అలవాటైన పేర్లు మార్చేసి, కొత్తపేర్లు పెట్టవలసిన అవసరం యేమైనా వుందా? అనేది వేరే విషయం. ఓ నవాబుగారు ఓ పట్టణానికి "మహబూబ్ నగర్" అని పేరు పెట్టినా, జనాలు అప్పటికీ ఇప్పటికీ దాన్ని "పాలమూరు" గానే వ్యవహరిస్తున్నారు! మనుమసిధ్ధి పాలించిన "విక్రమసిం హపురం" అన్నా, ఆంగ్లేయులు పేరెట్టిన "కో కెనడా" అన్నా యెవరికైనా అర్థం అవుతుందా???) జయలలితా....తన యెన్నికల వాగ్దానాల్లో భాగంగా, అనేక స్థాయుల్లోని పాఠశాలల్లోని విద్యార్థులకి ఓ 68 లక్షల మందికి(!)--నిజంగా నిజం--ల్యాప్ టాప్ లు "వుచితంగా" అందించే కార్యక్రమానికి శ్రీకారం చుడతారట! ఈ యేడాది 9 లక్షల 12 వేల "ఎల్ టీ" లు (అంటే ల్యాప్ టాప్ లు--లిబరేషన్ టైగర్స్ కాదండోయ్!) పంపిణీ చేస్తారట. మిగతావి వచ్చే "నాలుగేళ్లలో" అందజేస్తారట.

మొత్తం ప్రాజెక్ట్ కి రూ.10,200 కోట్లు అవసరం అయితే, తొలివిడతగా రూ.912 కోట్లు కేటాయించారట. ఈ ఎల్ టీ లు ఈసీఐఎల్ అఫ్ తమిళనాడు కి అప్పగించారట.

ఓసారి నేను ఓ టపాలో--అంకోపరి ఒక్కొక్కటీ 35 వేలో యెంతో వుంటుందేమో అంటే, లక్షా ముఫై ఐదువేలు వుంటుంది అన్నాడో నిపుణుడు. మరి ఇప్పుడు 10/15 వేలకే యెలా అందిస్తున్నారో! (అండర్ ఇన్వాయిసింగ్ కాదుకదా?)

జూలై నెలలో భారీ యంత్రపరికరాల విభాగంలో "వ్యతిరేక" వృధ్ధి రేటు నమోదవడంతో, మొత్తం పారిశ్రామిక వృధ్ధి రేటు 3.3 శాతానికే పరిమితమయ్యిందట. కానీ నిపుణులు ఈ గణాంకాలు "నమ్మబుల్" గా లేవు అంటున్నారు!

మన ఆర్టీసీ వారికి బుర్రలో ఓ బల్బు మెరిసిందట ఇన్నాళ్లకి. బస్సులకి రిజర్వేషన్ చేసేటప్పుడు, ఓ బస్సులోని సీట్లు మొత్తం నిండిపోతే, వెయిటింగ్ లిస్ట్ లో కూడా రిజర్వ్ చేస్తారట. ఇంకోబస్సుకి సగం సీట్లు నిండినా, ప్రత్యేక బస్సు వేసి అందులో పంపిస్తారట. యేబస్సుకి రిజర్వ్ చేసుకున్నారో సరిగ్గా అలాంటి బస్సునే పంపిస్తారట. మరి "అలాంటి" బస్సులు సరిపడా తెస్తారా?

అలాగే, రైల్వే వాళ్లకి కూడా ఓ మెరుపు మెరిసి, తత్కాల్ టిక్కెట్ల బుకింగ్ కి, వుదయం 8 నుంచి 9 వరకూ, యేజంట్ లాగిన్ రద్దుచేశారట! ప్రతీ రైల్వే జోన్ లో 200 నుంచి 500 మంది యేజంట్లు వున్నారట! ఇప్పుడు తత్కాల్ టిక్కెట్లు బాగానే దొరుకుతున్నాయట సామాన్యులకి. సౌత్ సెంట్రల్ రైల్వే లోనైతే యేజంట్ల వ్యవస్థ పూర్తిగా రద్దు చెయ్యాలని నిర్ణయించారట!

హమ్మయ్య!

కబుర్లు - 69

2011-09-13T00:28:00.000-07:00

అవీ, ఇవీ, అన్నీ

ముకేష్ అంబానీ ముంబాయిలో "యాంటిల్లా" పేరుతో నిర్మించిన 27 అంతస్తుల నివాస భవనం లోని పనివాళ్ల సంఖ్య 600 ట. వాళ్ల జీతాలు ఒక్కొక్కరికీ 6000 నించి 6500 మధ్య వుంటాయట.

(ఇంతకు ముందే 17 అంతస్తులో యెన్నో వున్న నివాస భవనం వుంది కదా, మళ్లీ ఇదెందుకు అని అడిగితే, ఇది మా సంస్థల వున్నతోద్యోగులకి అని జవాబిచ్చాడోసారి--ఈయనేనో, ఇంకో అంబానీనో.)

పుడితే--గాలి గనులతో సంబంధం వున్న ప్రభుత్వ శాఖల్లోనైనా, అంబానీల ఇళ్లలో పనివాళ్లగానైనా పుట్టాలని చాలామంది అనుకుంటున్నారట!

అరుంధతీరాయ్ అని ఒకావిడవుంది. (అధోగతీరాయ్ అని పేరుపెట్టారో బ్లాగరు ఈమెకి!). యెప్పుడో ఓ పుస్తకం వ్రాసి, అదృష్టం బాగుండో, పైరవీలు పనిచేసో దానికి ఓ ఎవార్డు సాధించింది. తరవాత చెయ్యడానికి పనేమీలేక, పేపర్లకి యెక్కుతూ, వుద్యమకారిణి అని వ్యవహరించబడుతోంది.

అన్నా హజారే వుద్యమం "ప్రపంచ బ్యాంకు అజెండా"కి నకలు అనీ, అలాంటి వుద్యమాలని "నిర్మించడానికి" ప్రపంచ బ్యాంకూ, ఫోర్డ్ ఫౌండేషన్ "నిధులు" అందజేస్తాయి అనీ, హజారేను "ఆరాధ్యుడు" గా ప్రచారం చేశారనీ, అది ఆందోళనకరమైన విషయం అనీ, ఆయన బృందం రూపొందించిన జనలోక్ పాల్ బిల్లు పైనా తనకి అనేక సందేహాలున్నాయి అనీ--రెచ్చిపోయిందట ఓ టీవీ ఛానెల్లో!

చూశారా--యెవరికీ తెలియని విషయాలని ఈవిడ యెలా కనిపెట్టి ప్రచారం చేసేస్తోందో? జనాలు వెర్రి పుచ్చకాయలు అనుకుంటారో యేమిటో ఇలాంటి కుహనా మేధావులు!

"కాస్త నదురుగా వున్న ఓ బ్లాగులో ఓ అడ్డమైన కామెంటు వ్రాసేస్తే, నాకు పాపులారిటీ వస్తుందని అలా చేశాను....నన్ను క్షమించండి" అన్నాడిదివరకో కుర్రాడు. ఆ కుర్రాడికీ, ఈవిడకీ తేడా యేమీ కనిపించడంలేదు నాకు.

మా వూళ్లో, గణపతి వుత్సవాల సందర్భంగా "రాష్ ట్ర స్థాయి సినీ డ్యాన్స్; పాటల పోటీలు" పెట్టారు! బహుమతులు వరుసగా, రూ.1500/-, షీల్డు; రూ.1000/-, షీల్డు; రూ.600/-, షీల్డు; ఇంకా "కన్సొలేషన్" ఇచ్చారట. ఎంట్రీ ఫీజు ఒక్కొక్కరికీ రూ.50/- మాత్రమేనట.

ఇంక యెలా నిర్వహించారో మీరే వూహించుకోండి!

భక్తి వ్యాపారులూ--జిందాబాద్!

"చిరు" కాంగీలో విలీనం అయినా, "తనదైన ముద్ర" కోసం "వ్యూహాత్మకంగా" అడుగులు కదుపుతున్నాట్ట! ప్రత్యేకంగా ఓ క్యాంపు కార్యాలయం యేర్పాటు (అంటే--ఇంతకు ముందు ప్రరాపా ప్రథాన కార్యాలయం పేరు మార్పు!), త్వరలో ఒక టీవీ ఛానెల్ (దీనికి "ఎస్ న్యూస్" అని పేరు పెడతారట. "ఎస్" కి సంబంధించిన సెంటిమెంట్ యేమిటో మరి!) యేర్పాటు, వివిధ కేంద్రాల్లో "ప్రాంతీయ విలీన మహాసభలు" నిర్వహించడం (పనిలో పనిగా బలప్రదర్శనకి వాటిని వేదికలుగా వుపయోగించుకోవడం), ఇంకా ఓ న్యూస్ పేపరు పెట్టడం--ఇలా పడుతున్నాయట ఆ అడుగులు.

యెన్నికల ప్రచారంలోనూ, ఆ తరవాతా, పాటీయా....పిచ్చా....?రోజుకి ఓ అరలక్షమందికి తీర్థ ప్రసాదాలు (అనేక వెరయిటీల్లో) అందించి, కాటాకి వచ్చేసి, కాంగీలో చేరినందుకు వాళ్లు ఇచ్చిన (తొడుక్కునే) కోట్లు--ఈ పథకాలన్నింటికీ సరిపోతాయా? యేమో!

"స్వంత పనుల" నిమిత్తం మలేషియా ప్రయాణం కూడా పెట్టుకొన్నాట్ట.

ఇవన్నీ "అధిష్టానం" సీసీ కెమేరాల్లో రికార్డు అవుతున్నాయనీ, తోక కాదు--దానిలోని వెండ్రుకలు కదిలినా, తోక మొత్తం తెగిపోతుందనీ గుర్తుంచుకొంటాడా?

చూద్దాం!

కబుర్లు - 68

2011-09-11T09:35:00.000-07:00

అవీ, ఇవీ, అన్నీ

"వేమన్న", పాపం తన జీవితమంతా "పరుసవేది" అన్వేషణలోనే గడిపి, తీరా అది పట్టుబడ్డాక విరాగి అయిపోయాడట!

టైము బాగుంటే, మట్టి పట్టినా బంగారం అయిపోతుందంటారు. అలాగే, యేల్నాటి శని సమయంలో బంగారం పట్టుకున్నా, మట్టి అయిపోతుందనీ అంటారు!

"ఇనుము" రాళ్లనీ, ఇనప "మట్టినీ" బంగారంగా మార్చే పరుసవేది విద్యని వంటబట్టించుకున్న గాలి జనార్దన రెడ్డి మాత్రం, "భక్తి" దాకానే వెళ్లాడు. భక్తికి పరాకాష్ట అయిన "వైరాగ్యం" చేరుకోకుండానే, కృష్ణ జన్మస్థానంలో వైరాగ్య బోధ జరిపించాలని ప్లాను వేశారు సీబీఐ వాళ్లు. (యెవరు ఆ యేర్పాటు చెయ్యమన్నారో ఇంకా తేలాల్సి వుంది).

పేపర్లూ, టీవీలూ హోరెత్తి పోతున్నాయి--"గని గజనీ స్వర్ణ విలాసం" వగైరాలతో!

బాగుందండీ--ఆయనకి విద్య తెలిసింది, వుపయోగించుకున్నాడు. భక్తి పెరిగింది--ఇంట్లో పూజా సామాగ్రీ, దేవుళ్ల విగ్రహాలూ అన్నీ బంగారంతో చేయించుకున్నాడు. తిరుమలేశునికి ఓ కిరీటం కూడా చేయించాడు.

ఇప్పుడు, ఆ కిరీటం పెడితే, స్వామికి "శిరోభారం" వస్తుందేమో అని అనుమానం రావడంతో, దాన్ని ప్రక్కన పెట్టారట. దాన్నేం చెయ్యాలో ఇంకా నిర్ణయించలేదట! నిత్యాభిషేకాలతో ఆయనకి "పడిశం" పట్టడం లేదుకదా? మరి శిరోభారం యెందుకు వస్తుందో వాళ్లే చెప్పాలి!

(ఆమధ్య పంచారామాల్లోని శివలింగాలు అభిషేకాలతో "అరిగి" పోయాయని టీవీలు కోళ్లయి కూశాయి. ఫలితం హళ్లికి హళ్లి, సున్నకి సున్న! తిరుమలేశుడు "అరిగి"పోతున్నాడని నేనంటే, మూలవిరాట్టుకి అభిషేకాలు చెయ్యం అన్నారు. అమలవుతోందో లేదో మరి! ముసలాన్ని యెంత అరగదీసినా, ఓ బాణం పుల్లంతైనా మిగలదా--ఫరవాలేదులెండి--అనేవాళ్లూ వున్నారు.)

స్వామికి ఆభరణాలు చేయించదలుచుకున్నవాళ్లు, ముందు తితిదేవారిని సంప్రదించి, వారి అనుమతితో "కొలతలు తీసుకొని", ఆభరణాలు చేయించి మరీ సమర్పిస్తారు. ఈ తతంగం నడిచినప్పుడూ, తిరుమాడ వీధుల్లో కిరీటాన్ని, దేవుడి కన్నా ముందో ప్రత్యేక వాహనమ్మీద వూరేగించినప్పుడు, ఆయన బిల్లులు ఇవ్వలేదు అని యెవరూ పట్టించుకోలేదు. ఇప్పుడు ఆయన 45 కోట్లన్నాడు, మదింపుచేసింది 22 కోట్లు మాత్రమే అంటున్నారు!

కొంచెం తేడా అనిపిస్తే, ప్రతీవాడూ "నన్ను ముట్టుకోకు నామాల కాకీ" అనేవాడే!

మరణశిక్షల్ని రద్దు చేయాలంటున్నారు "సమయానుకూల" వాదులు. నిజానికి, మరణ శిక్ష పడి, అది యెప్పుడు అమలు చేస్తారో తెలియకపోవడం, దినదిన గండంగా బ్రతకడం అనేది, రౌరవాది నరకాలని మించిన శిక్ష! అలాంటిది, యేళ్లతరబడీ క్షమాభిక్ష విఙ్ఞప్తులని, యేవిషయం తేల్చకుండా, జాగు చేసిన, మన సర్వోత్తమ రాజ్యాంగాధినేతలకి యేమిటి శిక్ష? (బహుశా అంబేద్కర్ కి ఈ విషయంలో యెలాంటి కనీస అనుమానం కూడా రాలేదు. వచ్చివుంటే, ఆ శిక్షకి తగ్గ యేర్పాటు చేసి వుండేవాడు రాజ్యాంగంలోనే!)

"అమాయకుల్ని చంపడానికి యేమతమూ అంగీకరించదు. ఢిల్లీ హైకోర్టు వద్ద బాంబు ప్రేలుడు--ఆటవిక చర్య" అన్నాట్ట--యెవరోకాదు పార్లమెంటు మీద దాడిలో కొంతమందిని విచక్షణారహితంగా కాల్చేసి, వురిశిక్షపడి, "నన్ను వురితియ్యండ్రా మొర్రో! లేకపోతే, అద్వానీ ని ప్రథాని చెయ్యండ్రా! ఆయనైతే నన్ను క్షణాల్లో వురి తీయించేస్తాడు!" అని మొరపెట్టుకొన్న "అఫ్జల్ గురు"!

ఇప్పటికి వాడి మతబోధలు వాడి తలకెక్కాయనుకుందామా? లేక....!

"వురుమురిమి, మంగలం మీద పడిందట!"

పాపం రోశయ్య, తాను ముఖ్యమంత్రిగా వుండగా, "అన్ని విషయాలూ అధిష్టానం (అమ్మ) చూసుకొంటుంది. నేను నిమిత్తమాత్రుణ్ని" అంటూ, ఖర్మకాలి, ఓ నిర్ణయం తీసుకొన్నాడట తనంత తానే!

ఇప్పుడదే మెడకు చుట్టుకొనేలా వుంది. ఓ లాయరెవరో "యేసీబీ వారు రోశయ్యకి క్లీన్ చిట్ యెలా ఇచ్చారు?" అంటూ యేసీబీ ప్రత్యేక న్యాయస్థానం ముందు కేసు వేస్తే, క్లీన్ చిట్ కి సంబంధించిన ఆధార పత్రాలని సమర్పించమన్నారట. యెటుపోయి యెటు వస్తుందో! ఈ వయసులో గవర్నర్ గారిని అంత క్షోభ పెట్టడం అవసరమా జగన్నాథులూ? (అవునులే, నాన్న ప్రసాదాన్ని గ్రద్దలా తన్నుకుపోయాడుగా మరి!)

ఆధారమంటే మళ్లీ గుర్తొచ్చింది--బెంగుళూరులో "ఆథార్" గురించి ఇదివరకో టపా వ్రాశానుగా....ఈమధ్య "ఫణిబాబుగారు"--తమ ఆథార్ వివరాల సమర్పణ త్వరలోనే ముగిసిందని ఓ టపా వ్రాస్తే, ఆహా! అని సంతోషించాను. (బాబుగారూ! మీ అనుమతిలేకుండా, మీ పేరు వాడుకోవడం కోసమే ఇక్కడ మీ ప్రస్తావన తెచ్చానని భావించక, క్షమించండి!).

నిన్న (10-09-2011), విజయవాడ ప్రథాన తపాలా కార్యాలయంలో, ఈరోజు "ఆథార్ దరఖాస్తులని సాయంత్రం 5.30 కి" జారీ చేస్తామని "పక్షం" రోజులకి ముందే ప్రకటిస్తే, అప్పటికి ఓ 1500 మంది అక్కడికి చేరారట! వున్న వొకేవొక్క కవుంటరు తెరవగానే--తోపులాట, తొక్కిసలాట, ప్రథాన ద్వారం అద్దాలూ, పూలకుండీలూ ధ్వంసం, ముగ్గురికి అద్దమ్ముక్కల గాయాలు, ఓ వృధ్ధుడు సొమ్మసిలడం, వూపిరాడక అనేకమంది చిన్నారులూ, మహిళల ఆర్తనాదాలూ, ఇవన్నీ మూడు గంటలపాటు కొనసా....గడం, పోలీసులెవరూ లేకపోవడం, వెరశి--200 మందికి కూడా దరఖాస్తులు అందించలేకపోవడం........ఇదండీ జరిగినది!

ఆ ప్రకటన జారీ చేసినవాడెవడో, వాడికి--నేనిదివరకు "అజ్మల్ కసబ్"కి విధించమన్న శిక్ష --విధిస్తే, మీకేమయినా అభ్యంతరమా?!

ఆలోచించండి మరి!

కబుర్లు - 67

2011-09-01T10:26:00.000-07:00

అవీ, ఇవీ, అన్నీ

నిన్నో, మొన్నో, బోధి వృక్షం క్రింద నిద్రించినట్టున్నాడు మన కి కు రె. చాలా బాగా ఙ్ఞానోదయం అయ్యింది ఆయనకి.

"రైతుకి కనీసం 70-80 శాతం ఆదాయం వస్తేగానీ, గిట్టుబాటుకాదు--ఆదిశగా 'కేంద్ర, రాష్ట్ర ' ప్రభుత్వాలు ఆలోచించకపోవడం తప్పే!" అంటున్నారు.

మరి తానూ ఓ రాష్ట్ర ప్రభుత్వానికి దిశానిర్దేశకుడూ, ముక్కుమంత్రీ అని మరచిపోయారా?

మన"సు" కవి చెప్పినట్టు, 'యెదటి మనిషికీ చెప్పేటందుకే నీతులు వున్నాయి" అందామా?

కరప్షన్ పితామహుడు కరుణ, మంచి సమయంలో వుద్యమం మొదలెట్టించాడు--వురిశిక్ష రద్దు చెయ్యాలి అని. (రేప్పొద్దున్న రాజాకీ, కనిమొళికీ వురి వేస్తారేమో అని భయమేమో! అదే కాకుండా, సాక్షాత్తూ "రాజీవ్" హంతకులకి ఆ శిక్ష పడింది కదా.....ఇంతకన్నా కాంగీల మీద కక్ష తీర్చుకోడానికి ఇంకేం అవకాశం వస్తుంది?!)

పచ్చివెలక్కాయ పడింది కాంగీల గొంతులో!

వుద్యమం వుధృతం అవుతోంది. సరే.

మేమూ వున్నామంటూ, కమ్మీనిస్టులు తయారయ్యారు(ట). యెప్పటినించో ప్లాన్ చేసుకొన్న వాళ్ల మీటింగులని ఇప్పుడు నిర్వహిస్తున్నారట--వురి కి వ్యతిరేకంగా!

అన్నా దీక్ష తరవాత యేమిటి? లోక్ పాల్ తరవాత యేమిటి? అనేవాళ్లకి నేను చెప్పేది--వురిశిక్ష రద్దు చెయ్యండి. దాని స్థానంలో--నాలుగు రోడ్ల కూడళ్లలో, పదునైన కత్తితో, వాళ్ల గొంతుకలు కోసే (జబా అనో యేదో అంటారు.....కోళ్లని అలా నరకడాన్ని మన "ముస్లిం సోదరులు")......శిక్షని ప్రవేశపెట్టండి--అని!

యేమంటారు?

తాజా కలం: ఈనాడువారు తాము "ముస్లిం సోదరులు" అనే ప్రత్యేక "జాతి"ని "డీ రికగ్నైజ్" చేసినట్టున్నారు--ఇవాళ్టి (01-09-2011) పేపర్లో, ఫోటోల క్రింద "ముస్లింలు" అని మాత్రమే వ్రాశారు! కీపిటప్ ఈనాడూ!

కబుర్లు - 66

2011-08-30T10:15:00.000-07:00

అవీ, ఇవీ, అన్నీ

పాపం కి కు రె మొదటిసారిగా (ముక్కుమంత్రిగా) తనపేరుమీద "యువకిరణాలు" అనే పథకం ప్రవేశపెట్టాలని ముచ్చటపడితే, బొచ్చె దానికి ముందు "రాజీవ్" పేరు చేర్చేవరకూ వూరుకోలేదు.

ఇప్పుడేమో బొచ్చె పర్యటనలు మొదలెడితే, "మీ ప్రభుత్వానికీ, నీ పదవికీ ఆక్సిజన్ అందించిన మా చిరు ఫోటో పెట్టుకోకుండా వెళతావా? ఖబడ్దార్!" అంటున్నారు.

పాపం అధిష్టానానికి వొంట్లో బాగాలేదు, ఓ మూడు నెలలు మన వుద్యమానికి సెలవు ప్రకటిద్దాం--అన్నాట్టో పెద్దమనిషి.

వుద్యమం చల్లబడుతున్నట్టు కనిపిస్తోంది, ఇంక రాస్తా/రోడ్డు రోకోలతో పని కాదు, "ఢిల్లీ వెళ్లే" రైళ్ల రోకోలూ, "విమానం" రోకోలూ చేద్దామంటున్నాడు--అప్పట్లో చందారెడ్డి చెంచా కొండా లక్ష్మణ్ బాపూజీ!

కొంతం (మం)దిలీపులు యెవరో సమాలోచన వాళ్లో యెవరో--రాజకీయుల మాటలని కొన్ని దశాబ్దాలనుంచీ కోట్ చేస్తూ, '600 మంది అమాయకులు ఆత్మాహుతి చేసుకున్నారు......అవి ఆపడానికి కృషి చేద్దాం....' అనడాన్ని కొనియ 'ఆడుతున్నారు '!

బీజేపీవాళ్లు--కాంగీవాళ్లు "యెవరైనా తమకి అనుకూలంగా వున్నన్నాళ్లూ నెత్తికెత్తుకొంటారు, వ్యతిరేకమైతే, కోర్టులనీ, సీబీఐ నీ వుసికొల్పుతారు" అంటే, ఇదో మేచ్ ఫిక్సింగ్ అంటున్నారు కొంతమంది!

జర్నలిస్టులకి, నాయకులని వెర్రిమొర్రి ప్రశ్నలేసి, "నోకామెంట్లు" రాబట్టడం తప్ప తెలియడం లేదు. "గురువా.....శిష్యా..."; "బాబాయ్.....అబ్బాయ్"; "మామా....అల్లుడూ..." లాంటి క్యామెడీ--అనేక పేర్లతో వ్రాసే వాళ్లు మార్క్ టులీ లాంటివాళ్లని ఆదర్శంగా తీసుకుంటే బాగుండును.

(యమర్జెంటు) కబుర్లు - 65

2011-08-19T09:45:00.000-07:00

అవీ, ఇవీ, అన్నీ

ఈ మధ్య సణుగుడు మానలేదుగానీ, ప్రచురణ కుదరలేదు. ఇదిగో ఇప్పుడు మొదలు.

అర్జెంటుగా సణుక్కున్నవి--జనలోక్ పాల్, అన్నా హజారే అరెస్టు, దీక్ష, జగన్ మీద విచారణలూ, ఇలా చాలా వున్నాయి మరి.

పాపం అధిష్టానానికి కేన్సరో యేదో వచ్చి, విదేశంలో ఆపరేషన్ చేయించుకుని, త్వరగానే కోలుకుంటోందట. ప్రజల పూజలు ఫలించి, పాపం క్షేమంగా తిరిగి వస్తుందని ఆశిద్దాం.

ఆవిడ ఓ కమిటీని వేసిందట--తన బదులుగా. వాళ్లేమి సలహా ఇచ్చారోగానీ, పి చ్చిదంబరం రెచ్చిపోయాడు. జోక్ యేమిటంటే, అన్నా హజారేనీ, కేజ్రీవాల్ నీ అరెస్టు చేసి, రాజా ప్రక్కనా, కల్మాడీ ప్రక్కనా బంధించారట! జైలు అధికారిణిగా ఖైదీల కోసం అనేక సంస్కరణలు ప్రవేశపెట్టిన కిరణ్ బేడీని అదే జైల్లో పెట్టారట!

జనాగ్రహానికి వెరచి మళ్లీ విడుదల చేశారట. బాగానే వుంది కానీ, అసలు విషయం వదిలేసి, అన్నా 7 రోజులా, 14 రోజులా, 21 రోజులా--యెన్ని రోజులు దీక్ష చెయ్యచ్చు అనేదానిమీద ఆయనకి అనుమతి ఇవ్వడానికి చర్చలు! రాం లీలా మైదానంలో ఆయన దీక్ష. 9 రోజుల వరకూ ఖచ్చితంగా యేమీ ఫర్వాలేదు అని ఆయన వైద్యుడి ప్రకటన.

అసలు ఈ ప్రభుత్వానికీ, పార్టీలకీ యేమైనా బుధ్ధి వుందంటారా?

ఈ లోపల ప్రథానిని లోక్ పాల్ పరిథిలో వుంచాలని వొకడూ, అఖ్ఖర్లేదని వొకడూ, న్యాయపాలిక ని మినహాయించాలని వొకడూ, అఖ్ఖర్లేదని వొకడూ--ఇలా మేథావుల ప్రకటనలు! పార్లమెంటులో ప్రైవేటు బిల్లు పెడతానంటున్న వరుణ్ గాంధీ. యేబిల్లయినా నెగ్గినప్పుడు కదా.....ప్చ్! అంటున్నవాళ్లూ. అసలు ఇంత అవసరమా అంటున్నవాళ్లు! అవసరమైతే "పార్లమెంటు మెంబర్లనే" మార్చాలి అని కొందరి సూచనలు! గుడుగుడుగుంచం అంటూ అక్కడికే చేరాలి! అదే--యెన్నికలు! దానికోసం వుద్యమాన్ని కొనసాగించాలని నా కోరిక!

ఇదివరకు జస్టిస్ రామస్వామిని అభిశంసించడానికి ముఖం చాటేశారు కాంగీలు. ఇప్పుడు జస్టిస్ సేన్ ని అభిశంసించడానికి యేర్పాట్లు చేశారు. ఆయన మాత్రం ఓ చీఫ్ జస్టిస్ కుట్ర వల్లే ఇదంతా జరుగుతోందని వాపోతున్నాడు! జనలోక్ పాల్ పరిథిలో వుంటే ఈ బాధలు లేకపోవును కదా?

రాజశేఖర్రెడ్డి మీదా, జగన్ మీదా ఆరోపణలు కొత్త కాదు. అనేక సాక్ష్యాధారాలతో సహా పత్రికలు కథనాలు ప్రచురించాయి. దేనికైనా టైము రావాలి అన్నట్టు--ఇప్పుడు రాష్ట్ర వున్నత న్యాయస్థానం గట్టిగా చెపితే, సీ బీ ఐ రంగంలోకి దిగి, సోదాలూ, గట్రా! ఆ జడ్జీలు అక్కడే వున్నంతకాలం బాగానే వుంటుంది. మారితే? యేమో! అందుకే జనలోక్ పాల్ పరిథిలోకి న్యాయ పాలికలు కూడా వుండాలన్నది!

తెలంగాణా వాళ్లు "సకలజనుల సమ్మె" అంటున్నారు. వుద్యోగులే సమ్మెకి సిధ్ధంగా లేరట! మరి సకల జనులు యెవరి మీద సమ్మె చేస్తారు? తమ మీద తామేనేమో!

చూద్దాం!

కబుర్లు - 64

2011-07-09T11:53:00.000-07:00

అవీ, ఇవీ, అన్నీ

మన బుర్రోవాదుల బుర్రల్లోని ఆలోచనలు యెన్ని వెర్రితలలు వేస్తున్నాయో చూడండి!

సామాన్యులకి యేడాదికి 4 గ్యాస్ సిలిండర్లు సరిపోతాయట. అందుకని, ఐదో సిలిండరు కావాలనేవాళ్లకి ఒక్కోటీ రూ.800/- కి తక్కువకాకుండా అమ్మాలట. అప్పుడు సబ్సిడీ భారం తీరిపోతుందటా!

అసలు ఈ గొడవంతా యెందుకు? ఆ గ్యాసు కంపెనీలని ప్రతీవూళ్లోనూ చిల్లరకొట్లు తెరిచి, వాళ్లకిష్టం అయిన రేటుకి సిలిండర్లు అమ్ముకోమంటే వొదిలిపోతుందికదా? దీపం పథకాలూ వగైరా చెట్టెక్కి, అందరూ యెండుపుల్లలతో వంటలు ప్రారంభిస్తారు? హబ్బే! గ్యాసు యేజన్సీలు రద్దుచేస్తే, మా పలుకుబడీ, సంపాదనా యేమికాను? అంటారు రాజకీయులు!

మళ్లీ దానికీ "ఆథార్" సంఖ్యే ప్రమాణమట!

ఇంక ఈ ఆథార్ యెలా పాము మెలికలు తిరుగుతూ నడుస్తోందో చూశారా? ఇప్పటి వరకూ మనకి యెన్ని రకాల "కార్డులు" వున్నాయో గమనించారా?

ఆథార్ సంఖ్య కోసం బెంగుళూరు లాంటి మహానగరంలో, ఓ 12 పోస్టాఫీసులని యెంపికచేసి, అన్ని లక్షలమందినీ అక్కడే అప్లికేషన్లు తీసుకోమన్నారట. తీరా రెండురోజుల్లో ఇచ్చిన అప్లికేషన్లకి సంఖ్యలు కేటాయించాలంటే రోజుకి గరిష్ఠంగా 50 వేసుకున్నా, (ఆ 50 పూర్తయ్యేవరకూ కొన్ని వందలమంది పడిగాపులు పడాలట!) 2012 జనవరి నెలాఖరువరకూ జారీ పూర్తి కాదట! అందుకని అప్ప్లికేషన్లని ఇవ్వడం మానేశారట!

ఇంక అప్లికేషన్ తోపాటు ఒక "గుర్తింపు" పత్రమూ, ఒక "నివాస ధృవీకరణ" పత్రమూ, ఇంకా ఫోటోలూ, వేళ్లూ, కళ్లూ వగైరాలు తీసుకెళ్లాలట! (పిచ్చి కుదిరితేగానీ పెళ్లి కాదు, పెళ్లైతేగానీ పిచ్చి కుదరదు అన్నట్టు, ఆ జాబితాలలోని కార్డులు పొందడానికి "ఆథార్" కావాలట. ఆథార్ కావాలంటే, ఆ పత్రాలు వుండాలట!). ఆ జాబితాలు పరికించండి......

గుర్తింపు పత్రాల జాబితా--పాస్ పోర్ట్; పాన్ కార్డ్; రేషన్ కార్డ్; వోటరు కార్డ్; డ్రైవింగ్ లైసెన్స్; గవర్నమెంటువారు జారీచేసిన ఫోటో గుర్తింపు కార్డ్; వుపాధి హామీ జాబ్ కార్డ్; గుర్తింపు పొందిన విద్యాసంస్థ జారీ చేసిన కార్డ్; ఆయుధ లైసెన్స్; ఫోటోతో వున్న బ్యాంక్ ఏటీఎం కార్డ్; ఫోటో వున్న క్రెడిట్ కార్డ్; పెన్షనర్ ఫోటో కార్డ్; స్వాతంత్ర్య సమరయోధుల గుర్తింపు కార్డ్; ఫోటో వున్న రైతు పాస్ బుక్; హౌసింగ్ వాళ్లిచ్చిన ఫోటో కార్డ్; పోస్టల్ వాళ్లిచ్చిన ఫోటో, చిరునామా వున్న కార్డ్--ఇవేమీ లేకపోతే, ఓ గ్రూప్ 'ఏ' గెజిటెడ్ అధికారి, తన లెటర్ హెడ్ మీద, ఫోటో తో ఇచ్చిన గుర్తింపు పత్రం! (యెన్నయ్యాయో నేను లెఖ్ఖపెట్టలేదు!).

ఇంక, నివాస ధృవీకరణ పత్రాల జాబితా........(మళ్లీ) పాస్ పోర్ట్; రేషన్ కార్డ్; వోటరు కార్డ్; డ్రైవింగ్ లైసెన్స్; పెన్షన్ గుర్తింపుకార్డ్; స్వాతంత్ర్య సమర యోధుల గుర్తింపు కార్డ్; ఫోటోతో వున్న రైతు పాస్ బుక్; బ్యాంక్ స్టేట్మెంట్/పాస్ బుక్; పోస్టాఫీసు యెకవుంట్ స్టేట్మెంట్/పాస్ బుక్; ప్రభుత్వం వారు జారీచేసిన గుర్తింపు కార్డు; విద్యుత్ వినియోగ బిల్లు; నీటి వాడకం బిల్లు; టెలిఫోను ల్యాండ్ లైన్ బిల్లు; ఆస్థి పను రసీదు (ఇవన్నీ కూడా మూడు నెలలకుమించి పాతవి కాకూడదు??!!); ఇన్స్యూరెన్స్ పోలసీ, ఫోటో తో మరియూ అధికార్ల సంతకాలతో బ్యాంకు వారు తమ లెటర్ హెడ్ మీద జారీచేసిన వుత్తరం; యేదైనా రిజిస్టర్డ్ కంపెనీ తన లెటర్హెడ్ మీద ఫోటోతో జారీచేసిన వుత్తరం; గుర్తింపు పొందిన విద్యా సంస్థ ఇచ్చిన వుత్తరం; వుపాధి హామీ జాబ్ కార్డ్; ఆయుధ లైసెన్స్; హౌసింగ్ బోర్డ్ గుర్తింపు కార్డు; ఒక ఎంపీ గానీ, ఎమ్మెల్యేగానీ, గ్రూప్ 'ఏ' గెజిటెడ్ అధికారిగానీ చిరునామా ధృవీకరిస్తూ ఇచ్చినవుత్తరం; పంచాయతీ సర్వోన్నతాధికారి ఇచ్చిన పత్రం; ఇన్‌కం టేక్స్ యెసెస్మెంట్ ఆర్డరు; వాహన రిజిస్ట్రేషన్ సర్టిఫికెట్; రిజిస్టర్ అయిన క్రయ/లీజు/అద్దె యెగ్రిమెంట్; పోస్టలు వారిచ్చిన నివాస ధృవీకరణ పత్రం; రాష్ట్ర ప్రభుత్వం వారిచ్చిన కుల/డోమిసైల్ సర్టిఫికెట్ (ఫోటో తో వున్నది). (ఇవికూడా యెన్నో నేను లెఖ్ఖపెట్టలేదు!).

ఇవికాకుండా--పుట్టిన తేదీ ధృవీకరణకోసం--జనన ధృవీకరణ పత్రం; ఎస్ ఎస్ ఎల్ సీ సర్టిఫికెట్; పాస్ పోర్ట్; గ్రూప్ 'ఏ' గెజిటేడ్ అధికారి తన లెటర్ హెడ్ మీద ఇచ్చిన జనన తేదీ ధృవీకరణ పత్రం.

(హమ్మయ్య! జాబితాలు పూర్తయ్యాయి. కానీ, నాకు రెండు....కాదు....మూడు సందేహాలు--ఈజాబితాల్లో వున్న కార్డుల్లో యే వొక్కదానిలో అయినా మన చిరునామా వుంటుందా? ఒకవేళ వున్నా అది ఖచ్చితంగా సరిగ్గా వుంటుందా? మనం ఆ చిరునామాలో యెన్నాళ్లు వుంటామో గ్యారంటీ వుదా?--ఇదీ మొదటి సందేహం. రెండోది, యెవరైనా వీటిలో యేదో ఒక ధృవపత్రం వొకటి రెండు రోజుల్లో--అదీ పైసా ఖర్చు చెయ్యకుండా (ఫోటోలకి తప్ప) సాధించగలరా? ఇంక మూడోది--అవన్నీ వున్నవాడికి, లేదా యేదో ఒక గుర్తింపు పత్రం, నివాస ధృవీకరణ పత్రం వున్నవాడికి "ఆథార్" అవసరం యేమిటీ?

ఈ సందేహాలకి తెలిసీ యెవరైనా సమాధానం చెప్పలేదో, వాళ్ల తల వెయ్యి వ్రక్కలు కాకమానదు--అనడానికి నేను భేతాళుణ్ని కాదు. అర్థరాజ్యం, కూతుర్నిచ్చి పెళ్లీ అనడానికి మా పెసిగాణ్నీ కాదు! ఒక్కటి మాత్రం చెప్పగలను--నా చేతిలో వుంటే ఇలాంటి ప్రణాళికలూ, నిర్ణయాలూ చేసే బుర్రోవాదులని, బిషప్ హేటో లెవెల్లో.......%$*^(@!.!

అదీ సంగతి!

ఇంకా చాలా వున్నాయి సణగడానికి కానీ వోపీలేదు......మరోసారి!

కబుర్లు - 63

2011-07-05T10:46:00.000-07:00

అవీ, ఇవీ, అన్నీ

అయ్యింది--ఎంపీలూ, ఎమ్మెల్యేలూ, ఎమ్మెల్సీలూ, ఇంకొంతమందీ కలిసి ఓ వందమంది తమ పదవులకి రాజీనామాలు ఇచ్చేశారు. రాజ్యాంగ సంక్షోభమేదీ రాలేదుగానీ, పదవుల సం"క్షామం" మొదలయ్యింది. మన యెమ్మెల్యేలే ఓ 300 మంది వున్నారనుకుంటా. వారిలో మూడో వంతుమంది కూడా రాజీనామా చెయ్యకపోతే, ఇంకేమి సంక్షోభం? దానిక్కూడా స్పీకర్లు అందుబాటులో లేని సమయం యెంచుకున్నారు! వాళ్లు వచ్చేలోపల, ఓ రెండురోజులు తెలంగాణా బందూ, తరవాత వుత్తరాదినుంచి దక్షిణాదికి రైళ్ల రాకపోకల బందూ, తరవాత 'హైదరాబాదు మినహా' ఇతరచోట్ల 'వంటావార్పూ'--ఇలా కార్యక్రమం ప్రకటించేశాడు.

అసలు ఇలాంటివాటికి అవకాశం యెందుకు ఇవ్వాలి? రాజీనామా ఇచ్చిన మరుక్షణమే అవి అమోదంపొందినట్టు భావించి, వారికి వుండే సకల సౌకర్యాలూ రద్దు చెయ్యాలి. ఇంకా, ఒక్క ఆరోగ్య కారణాల మినహా, మరెందుకు రాజీనామా చేసినా, తరువాత ఆ స్థానానికి యెన్నికలకయ్యే ఖర్చు రాజీనామా చేసినవాడిదగ్గరనుంచే వసూలు చెయ్యాలి. అప్పుడుగానీ వీళ్ల నాటకాలకి తెరపడదు.

రాజీనామా ఇచ్చినవాళ్లు అడుగుతున్నది యేమైనా టన్నులకొద్దీ బంగారమా? మణిమాణిక్యాల్లాంటి భాగ్యమా? యేదో.......తెలంగాణా ఇస్తే ఇవ్వండి, లేకపోతే మా రాజీనామాలు ఆమోదించండి......అనడుగుతున్నారంతేగా? ఆమాత్రానికి సదరు స్పీకర్లూ, ప్రభుత్వాలూ, అధిష్టానం "ఆమోదించాం పొండి" అనేస్తే, గొడవొదిలిపోను కదా? అఖిలపక్షాలూ, యేకాభిప్రాయాలూ ఇవన్నీ యెందుకు? ఈలోపల బందులూ అవీ అంటూ ఓ పదో పాతికో మంది అమాయకులు బలయ్యేవరకూ చోద్యం చూడ్డానికా? యేడిసిన్నట్టే లేదూ వ్యవహారం?

కల్మాడీ గారి టీపార్టీ పుణ్యమాని, ఇంకో ముగ్గురో యెందరో తిహార్ జైలు అధికారులని కూడా సస్పెండు చేశారట. వాళ్లని బదిలీ చెయ్యడానికి "అండమాన్" వగైరాచోట్ల ఖాళీలు లేవేమో! కానివ్వండి. ఇప్పటికైనా సెల్లులకి తాళాలూ గట్రా వేస్తున్నారా? రాత్రిళ్లు చికెనూ, మందూ పార్టీలు కూడా చేసుకొంటున్నారా? మరోసారి ఇంకో జడ్జి గారెవరైనా యే అర్థరాత్రో అకస్మాత్తు తణిఖీ నిర్వహిస్తేగానీ బయటపడవేమో?!

ఈ మధ్య రైళ్లగురించి సణగడంలేదు--మమతాదీ ముఖ్యమంత్రి అయిపోయి, రైల్వేల గురించి పట్టించుకొనేవాడూ, వెలగబెడుతున్నాం అనే నాథుడూ లేకుండా పోయాడు. ఏ సీ కంపార్టుమెంట్లలో అనేక బొద్దింకలూ, పురుగులూ స్వైరవిహారం చెయ్యడం స్వానుభవమైనా, ఆ చిన్న విషయం బహిరంగంగా యేమి సణుగుతాములే అని వూరుకున్నాను. ఇప్పుడు మళ్లీ నిన్న (04-07-2011), చెన్నై నుంచి నిజాముద్దీన్ వెళ్తున్న "దురంతో"లో, బొద్దింకలూ, పురుగులతో వంటిమీద దద్దుర్లు వచ్చినా సహించి, యెలుకలతోకూడా సహవాసం చెయ్యడానికి అలవాటుపడ్డా, విజయవాడ వచ్చేసరికి "పాచికంపు" కొడుతున్న భోజనం పెట్టడంతో సహనం నశించి రెచ్చిపోయిన ప్రయాణీకులు రైలుని ఓ రెండున్నరగంటలపాటు నిలిపేసి, ఆందోళన చేశారట. "దురంతో" చార్జీలతో, మామూలు కోచ్ లు వెయ్యడమేమిటి? అని నిలదీసినవాళ్లకి అధికారులు "అది తమచేతుల్లో లేదు" అని నచ్చచెప్పారట. బోగీలని వీలైనంతవరకూ శుభ్రపరిచేలా చేసి, పంపించారట!

అసలు, తెలివి వెర్రితలలు వేసి ఇలాంటి రైళ్లని ప్రవేశపట్టారని అందరూ అన్నా, తన పంతం నెగ్గించుకొంది మమతాదీ! వాళ్లకి మనం రోడ్లమీద వెళుతున్నప్పుడు చూసే "వేగముకన్న క్షేమము మిన్న"; "ఆలస్యంగా బయలుదేరి 'స్వర్గానికి ' పోయేకంటే, త్వరగా బయలుదేరి గమ్యం చేరడం మంచిది" లాంటి నినాదాలు యెక్కడైనా కనిపించాయో లేదో? వచ్చిన రైలుని కనీసం శుభ్రపరిచే ఆస్కారం కూడా లేకుండా, వెంటనే తిరుగు ప్రయాణం ప్రారంభించి, స్టేషన్లలో ఒకనిముషం మాత్రమే ఆగుతూ, పరుగులు పెడుతూ, ప్రయాణీకులు క్రిందకి దిగడానికి లేకుండా, యెక్కువరేట్లతో నాసిరకం తిళ్లు పెడుతూ, అనువుగాని సమయాల్లో, 'మెయింటెనెన్సు ' పేరుతో అరగంటా, నలభై ఐదు నిమిషాలు ఆపేస్తూ, యేమాత్రం అనువుగాని సమయాల్లో గమ్యం చేరుస్తున్న "దురంతో"; "సూపర్ ఫాస్ట్" లాంటి రైళ్లవల్ల యెవరికి యేమి వొరుగుతోంది? చక్కగా అనువైన సమయంలో బయలుదేరి, టిఫిన్లూ, భోజనాల సమయంలో వచ్చే స్టేషన్లలో వాటికి యేర్పాట్లు చేసి, కొంచెం యెక్కువసేపు ఆపి, గమ్యస్థానం కూడా అనువైన సమయాల్లో చేరిస్తే అందరికీ అనుకూలంగా వుంటుంది. ప్రతీ స్టేషను ముందూ "ఔటర్"లో కాసేపు ఆగడం యే రైలుకీ తప్పడం లేదు. ఆ సమయాలని (మనభాషలో) రెగ్యులేట్ చేస్తే యెంతబాగుంటుంది? (రైల్వే భాషలో రెగ్యులేట్ అంటే అక్కడితో ఆ రైలుని ఆపెయ్యడం!).

పైగా చాలామంది ఇళ్లనుంచి తెచ్చుకొన్న ఆహార పదార్థాలు తినేసి, చెత్త బోగీల్లో పారెయ్యడం, చాక్లెట్ రేపర్లూ, వేరుశెనగ తొక్కలూ, కమలా పళ్ల తొక్కలూ, త్రాగేసిన నీళ్ల/బటర్ మిల్క్ కవర్లూ, ఖాళీ ప్లాస్టిక్ సీసాలూ (ముఖ్యంగా ఏసీ బోగీల్లో) సీట్లక్రిందకి తోసెయ్యకపోవడంవల్ల మూడొంతులు పారిశుధ్య సమస్య తీరుతుంది కదా? ప్రతీ రైల్వే డివిజన్ హెడ్ క్వార్టర్లోనూ ఓ బోధి వృక్షం మొలిచి, పెరిగి, పెద్దదైతేనేగానీ, వాటి క్రింద రైల్వేవాళ్లకి ఙ్ఞానోదయం అవదేమో! మనమేం చెయ్యగలం.....ప్రార్థించడం తప్ప!

నల్లధనం విషయంలో సుప్రీం కోర్టు చివరాఖరికి విసుగు చెంది, ఓ వున్నతస్థాయి ప్రత్యేక దర్యాప్తు బృందాన్ని నియమించేసిందట. ఇంక ఇతర దర్యాప్తు సంస్థలన్నీ ఆ సంస్థ క్రిందే పనిచెయ్యాలని ఆదేశించిందట. ముఖ్యంగా "అధికారులనుంచి నోటీసులు అందుకున్నవారి పేర్లు బహిర్గతం చెయ్యవలసిందే" అందట. హమ్మయ్య. ఓ ములుగర్రపోటు తగిలిందన్నమాట ప్రభుత్వ వృషభానికి. ఇప్పుడేమి జరుగుతుందో వెండితెరపై చూద్దాం!

కబుర్లు - 62

2011-07-03T10:22:00.000-07:00

అవీ, ఇవీ, అన్నీ

మొన్న సాయి యజుర్ మందిరంలోని ఖజనాని లెఖ్ఖించాక కూడా, ఆ గది తాళాలు సత్యజిత్ దగ్గరే వున్నాయట. (పేపర్లో రత్నాకర్ అని వ్రాశారా? యేమో గుర్తు లేదు. యెవరైతేనేం?). మళ్లీ నిన్న ఇంకో గదితెరిచి చూస్తే, అందులో సుమారు ఓ కేజీ బంగారం, ఓ రెండువందల కేజీల వెండీ, వజ్రాల వుంగరాలూ, వెండీ ఇతరపాత్రలూ దగ్గరదగ్గర ఓ 80 లక్షల విలువైన వస్తువులు 'దొరికాయట'. ఇంకా ఆ మందిరంలో యెన్ని గదులున్నాయో!

ఇంక, ఆయన దేవుడా కాదా అనే విషయంలో కాదనేవాళ్లూ; అయినా కాకపోయినా అనేవాళ్లూ; అవును అనేవాళ్లూ యెప్పుడూ వున్నారు. ఇప్పుడు కొత్తగా, అబ్దుల్ కలాం, రతన్ టాటా, వాజపేయీ లాంటి కొంతమంది (దాదాపు ఓ యాభై మంది) ప్రముఖుల పేర్లు ప్రస్తావిస్తూ, వాళ్లందరూ ఆయన్ని సందర్శించి, ఆశీస్సులకోసం పడిగాపులు పడేవారు కాబట్టి, నిజంగా ఆయన దేవుడు కాకపోతాడా? ఆయనకి యేవో మహిమలు వుండకపోతాయా? అనేవాళ్లు కొంతమంది తయారయ్యారు. వాళ్లకి ఇదివరకే సమాధానం చెప్పినవాళ్లు వున్నారు, ఇప్పుడు మళ్లీ, "వాళ్లందరూ తమ తమ వేరు వేరు 'అవసరాలకోసం '; వేరు వేరు 'యెజెండాలకోసం '--ఇలా వెళ్లేవారు తప్పితే, ఆయన మహిమల వల్లకాదు అనీ చెపుతున్నారు.

మొన్నీమధ్య ఓ బ్లాగులోనో వ్యాఖ్యలోనో ఒకాయన ఓ కొత్త విషయం చెప్పాడు. దేవులపల్లి కృష్ణశాస్త్రి అప్పుడెప్పుడో సాయి గురించి యేదో వ్రాశాడు అనీ, అందుకే ఆయన "నోరు పడిపోయింది" అనీ! ఇదెక్కడి దారుణమైన విషయమో! నాకు తెలిసీ, ఆయనకి గొంతు కేన్సరో యేదో వచ్చి, మాట్లాడలేకపోయేవారనీ, చాలా శ్రమతీసుకుని మాట్లాడినా, స్పష్టంగాలేక బొంగురుగా వుండడంతో వినేవాళ్లకి అర్థం చేసుకోవడం కష్టం అయ్యేది అనీ, అలా మాట్లాడడానికి ఆయన నొప్పితో బాధపడేవారనీ, అందుకే కాయితాన్నీ కలాన్నీ ఆశ్రయించేవారనీ, అయితే మాట పూర్తిగా పోవడం జరగలేదు అనీ విన్నాను. మరి సిన్మాల్లో సాయి వేషం వేసిన వాళ్లకీ, మాటలు వ్రాసినవాళ్లకీ, ఆ పాత్రని యెదిరించినవాళ్లకీ, సినిమా తీసినవాళ్లకీ యేమైనా అయిందోలేదో మరి!

మొన్నొక జడ్జి గారు తిహార్ జైలుకి అకస్మాత్తుగా తనిఖీకి వెళ్లేటప్పటికి, అక్కడ జైలరుగారు వారి కార్యాలయంలో సురేష్ కల్మాడీ తో బిస్కెట్లు తింటూ, టీ త్రాగుతూ, పిచ్చాపాటీ మాట్లాడుతున్నారట--సాధ్యమైనంత వినయంగా! ఇంక మిగిలిన 2జి స్కాం ముద్దాయిలు సెల్ తాళాలు తీసి వుండగా, యధేచ్చగా విహరిస్తున్నారట! ఈ విషయంలో జడ్జిగారు సుప్రీంకోర్టుకి నివేదిక యేమిచ్చారో ఇంకా తెలీదుగానీ, ఆ జైలరుగారిని వెంటనే "అండమాన్" కి బదిలీ చేశారట! అబ్బే......అదేమీ కాదు, ఆయనకి కొన్ని నెలల క్రితమే అక్కడికి బదిలీ అయ్యింది, యెలాగూ నిన్ననే వెళ్లాల్సి వుంది, అందుకని వెళ్లిపోయారంతే--అన్నారట కొన్ని జైలువర్గాలు. వుద్యోగుల విషయంలోనైనా, అధికారులవిషయంలోనైనా, "బదిలీ శిక్ష కాదు" అనే సూత్రం వల్లెవేస్తూ వుంటాయి మేనేజ్ మెంట్లు. మరి ఇదేమిటో?

చాలా కాలానికి, యెంపికచేసిన పత్రికా యెడిటర్లముందు అయినా నోరు విప్పాడు ప్రథాని అని కాంగీవాళ్లూ, ప్రభుత్వం వాళ్లూ సంతోషిస్తూంటే, బాంబు పేలినట్టు బంగ్లా ప్రభుత్వంవారు మన రాయబారిని పిలిచి, "దీని సంగతేమిటి?" అని నిలదీశారట! ఆయన నీళ్లు నములుతూ, వచ్చెయ్యవలసివచ్చిందిట! ఇంతకీ, మన ప్రథాని, బంగ్లాదేశీయుల్లో నాలుగోవంతుమంది అదేదో ముస్లిం సంస్థలో సభ్యులో, సానుభూతిపరులో అనీ, వాళ్లు భారత్ కి బధ్ధ వ్యతిరేకులు అనీ, వాళ్లు పాకిస్థాన్ ఐ ఎస్ ఐ వాళ్లేమి చెపితే అది చేస్తారు అనీ వ్యాఖ్యానించారట! (యే సందర్భంలోనో ఆ యెడిటర్లెవరూ మనకి చెప్పనేలేదు!). తీరా బాంబు పేలినంతపని అయ్యాక, బంగ్లా పౌరలంటే మాకు యెంతో గౌరవం, ప్రజాస్వామ్యబధ్ధంగా యెన్నికైనా బంగ్లా ప్రభుత్వం బలంగా వుండాలనే మేము కోరుకుంటాం, వాళ్ల అంతర్గత వ్యవహారాల్లో జోక్యం చేసుకోవడం మా అభిమతం కాదు--ఇలా అంటూ, సంబంధంలేని వ్యాఖ్యలు చేస్తూ, పొర్లుదండాలు పెట్టవలసి వస్తోందట! అందుకు బాధ్యుడైన అధికారిగురించి "విచారిస్తున్నారు" అనుకొంటా!

కేరళలోని పద్మనాభస్వామి దేవాలయం నేలమాళిగలోని ఆరు రహస్య అరల్లో, ఇప్పటికి సి; డి; ఎఫ్ అరల్ని తెరిస్తేనే, దాదాపు 50,000 కోట్ల విలువైన (కేవలం బంగారం, రాళ్లూ వగైరాల విలువ మాత్రమే--పురాతనత్వం విలువ కాకుండా) సంపద వెలుగుచూసింది అనీ, దాంతో, 40,000 కోట్ల ఆభరణాలు గల బాలాజీ ని అధిగమించిందనీ అన్నారు. ఇప్పుడు 'ఏ' అరని తెరిస్తే, వెలుగు చూసిన సంపదతో మొత్తం 75,000 కోట్లకు చేరిందట. బి అరని 1872 వ సంవత్సరం నుంచీ యెప్పుడూ తెరవలేదట. అది కాకుండా, ఇ అరని కూడా ఇంకా తెరవాలట. మొత్తం అయ్యేటప్పటికి ఇంకెన్ని రోజులు పడుతుందో, మొత్తం సంపద లెఖ్ఖ యెన్ని కోట్లకు చేరుతుందో?

ఆర్థికమంత్రి ముఖ్య ఆర్థిక సలహాదారు కౌశిక్ బసు కూడా, చిల్లర వ్యాపారాల్లోకి విదేశీ ప్రత్యక్ష పెట్టుబడులని యెంత తొందరగా ఆహ్వానిస్తే అంత త్వరగా ద్రవ్యోల్బణం తగ్గుతుంది, కానీ ఓ నిర్ణయం తీసుకోవలసింది ప్రభుత్వమే అంటున్నాడు. (మనం యేమి చేసినా ద్రవ్యోల్బణం తగ్గదు, దాని పెరుగుదల రేటు మాత్రమే తగ్గుతుంది--అని ప్రాథమిక సూత్రాన్ని కూడా మధ్యలో గుర్తుచేశాడు!). స్వపన్ దాస్ గుప్తా అయితే, ఆ ప్రతిపాదనకి వ్యతిరేకంగా ఆందోళన చేస్తున్నవారి చిత్రం ప్రచురించిన తన వ్యాసంలో, భారతీయులు 'ప్రపంచం మనని యెవరికోసం బ్రతికిస్తుంది?' అంటూ మారకుండా వుండిపోతే, మరో పాకిస్తాన్ అయిపోవడం ఖాయం అన్నాడు.

అసలు ఈ బెంగాలీ బాబులంతా వొకేలా ఆలోచిస్తారేమో? అరవబాబులు వీళ్లకి సరిగ్గా వ్యతిరేకం. దేశం గురించి పట్టించుకోకుండా, వాళ్లపని వాళ్లు చూసుకొంటారు! మధ్య వచ్చిందల్లా, మనలాంటివాళ్లకే చచ్చే చావు!

కబుర్లు - 61

2011-06-30T02:27:00.000-07:00

అవీ, ఇవీ, అన్నీ

చాలా కాలం తరవాత మన ప్రథాని నోరు విప్పాడు--పిచ్చి 'దంబరం' కూడా ఆయన తరచూ నోరు విప్పితే బాగానేవుంటుంది అన్న తరవాత.

నలుగురో ఐదుగురో హేమాహేమీల్లాంటి పత్రికా యెడిటర్లు ఆయన మనసులో వున్నది బయటపెట్టించలేకపోయారు. (ఓ మార్క్ టుల్లీ లాంటివాళ్లెవరైనా ప్రయత్నిస్తే బాగుండును). ఆయన యెప్పుడూ చెప్పేవే చెప్పారు. యెవరో మీడియాకి తప్పుడు ఆరోపణలతో సమాచారం ఇస్తున్నారు అనీ, మీడియా తానే ఫిర్యాదుదారూ, దర్యాప్తు సంస్థా, న్యాయ మూర్తీ పాత్రలని పోషిస్తోంది అనీ అన్నారు.

ఆ ప్రముఖ మీడియా ఎడిటర్లకీ సిగ్గు లేదేమో! సరిగ్గా నిలదీసిన దాఖలాలు లేవు. జూనియర్ విలేఖరులే మెరుగనిపించారు.

లోక్ పాల్ పరిధిలోకి తనను చేర్చడానికి అభ్యంతరం లేదు కానీ, తన మంత్రివర్గ సహచరులే వొద్దంటున్నారు అన్నాడట. మంత్రివర్గ సహచరుల మీద తనకి నియంత్రణలేదు అనడానికి ఇంతకన్నా ఋజువు యేమి కావాలి? మళ్లీ, నల్లధనం, ద్రవ్యోల్బణం ఆందోళనకరమే గానీ, తనదగ్గర 'మంత్రదండం' యేమీ లేదు అనీ, పెట్రో ధరల విషయంలో కూడా 'అద్భుత దీపం' లేదు అనీ, అన్నాడట. ఇలాంటి పిచ్చి మాటలు వినీవినీ చెవులు తడకలు కట్టలేదూ? రేప్పొద్దున ఆ పిల్లరాజు చేత 'నాదగ్గర మంత్రడం, అద్భుత దీపం ఇంకా చాలావున్నాయి' అని ప్రకటింపచేసేస్తారేమో! దేశ ప్రజలకి దేవుడే దిక్కేమో!

కొత్త విషయం ప్రణబ్ ఆఫీసు బగ్గింగ్ గురించి, మొన్న సెప్టెంబరులో ఆయన అనుమానం వ్యక్తం చేశారు, ఐ బీ చేత దర్యాప్తు చేయించాము, వాళ్లు అదేమీ లేదన్నారు. అయినా ప్రణబ్ మంత్రిత్వ శాఖ నుంచి యేదైనా వస్తే, హోం శాఖనుంచి 'లూప్' చెయ్యకుండా నాకే చెప్పమన్నాను! అన్నారట. ఇంక మేడం గారి గురించి అడిగితే, 'కిసుక్కున నవ్వి', నా ప్రభుత్వం చేసిన మంచిపనులు అన్నీ ఆవిడవల్ల జరిగినవే, చేతకాని పనులు అన్నీ నేనే చేసినవే! అన్నారట. మరి డిగ్గీ రాహుల్ ప్రథాని అవ్వాలంటున్నాడు కదా? అంటే, నాకు ఈ వుద్యోగం ఇచ్చారు. వుద్యోగం వున్నన్నాళ్లూ నేనే చేస్తాను. యువతరం ఆ వుద్యోగానికి రావలసిందే. మేడం ఇప్పటివరకూ నీ వుద్యోగం పీకేస్తానని అనలేదు. ఒకవేళ అంటే, నిక్షేపంగా పదవీ విరమణ చేస్తాను. అని వినయం వొలకబోశాడు. ఆయన "నికమ్మా"త్వానికి ఇంతకంటే నిదర్శనాలు యేమి కావాలి? పైగా మళ్లీ పదిహేనురోజులకోసారి నోరు విప్పుతారట--యెంపిక చెయ్యబడ్డ మీడియా ప్రతినిధుల ముందు! యెందుకూ? ఖర్చులూ, సమయం దండగ! ఆయన చెప్పిన, చెపుతున్న, చెప్పబోయే విషయాలు యెవరికి తెలియవని???!!!

ప్రణబ్ మంత్రివర్గం చేతిలో వుండే ఆదాయపన్ను శాఖ క్రిందవుండే 'ఎన్‌ఫొర్స్ మెంట్ డైరక్టరేట్' లాంటి ఐదో ఆరో దర్యాప్తు సంస్థలకి తగిన 'మౌలిక వసతులు' లేకపోవడంతోనే, ఓ ప్రైవేటు సంస్థని వినియోగించాము అనీ, ఆ సంస్థ 16 చోట్ల "మెత్తటి పదార్థాన్ని" కనుగొంది అనీ, అది బబుల్ గమ్ ఖచ్చితంగా కాదు అనీ, ఆ విషయంలో ఆ కార్యాలయాల్లో పారిశుధ్యం నిర్వహించే అధికారినీ, పనివాళ్లనీ సస్పెండు చేశాము అనీ, ప్రభుత్వ దర్యాప్తు సంస్థల ప్రతినిధి అదేదో "గుప్తా" అనేవాడు ప్రకటించాడట! మన ఆదాయ పన్ను శాఖా దానిక్రింద దర్యాప్తు సంస్థలూ కూడా "నికమ్మా"లేనన్నమాట! మరి బాధ్యులైనవాళ్లని ప్రశ్నించి, ఆ పదార్థాన్ని యెవరు పెట్టమన్నారు, ఆ పెట్టమన్నవాళ్లని ప్రశ్నించి, ఆ పదార్థంలోని నొక్కులూ వగైరా గుర్తులవల్ల అక్కడేమి అతికించారు, యెన్నాళ్లు, యేమి సమాచారం సేకరించారు, యెవరికి ఇచ్చారు--ఇలాంటివేమీ కనుక్కోవాలని కూడా ఆ నికమ్మాలకి తోచడం లేదు! ఆ పనులు చేయించినవాడినీ, అలాంటి వెధవల్నీ ఓ పట్టు పడితే, మంత్రదండాలూ, అద్భుతదీపాల అవసరం వుంటుందంటారా?

తెలంగాణాకి 'గూర్ఖా లేండ్' తరహా......అని యెవరో (పిచ్చి 'దంబరమే' అంటున్నారు) పిత్తితే, మళ్లీ కేసీఆర్, తన 'రాజకీయ పార్టీల తో చర్చలలో' భాగంగా మళ్లీ తెలంగాణా కాంగ్రెస్ నేతలతో, జానారెడ్డి ఇంటికివెళ్లి మంతనాలు సాగించాడట. అందరూ రాజీనామాలు చేస్తే, 'రాజ్యాంగ సంక్షోభం' వస్తుంది అనీ, అప్పుడు తెలంగాణాని వొడిసిపట్టుకోవడం చాలా వీజీ అనీ, ఒకవేళ అలాంటి సంక్షోభమేమీ రాకపోయినా, వాళ్లందరూ తెరాస టిక్కెట్లమీదో, స్వతంత్రులుగానో పోటీచేస్తే, ఇతరులెవరూ బరిలో నిలవరు అనీ, మళ్లీ వాళ్లనందరినీ నెగ్గించే బాధ్య తాను చూసుకుంటాను అనీ (పనిలో పనిగా జానారెడ్డిని ముఖ్యమంత్రిని చేస్తాను అనీ) హామీలిచ్చేశాడట. జానారెడ్డి యెగిరిగంతేసినా, మిగిలినవాళ్లు 'విస్తృత సమావేశం' నిర్వహించి, అప్పుడు చెపుతాం అన్నారట. వాడిమాటలు నమ్మెయ్యడానికి--పోటికి నిలవకుండా వుండడానికి తెరాస, ఐకాస నాయకులూ, కుక్కతోకపట్టుకొని గోదారి ఈదగలము అనుకోడానికి కాంగీ నేతలూ 'వెర్రిపప్పలు' లా కనిపిస్తున్నారేమో వాడికి! అప్పుడే కొంతమంది ఎంపీలూ, రాజ్యసభ సభ్యులూ--మేము రాజీనామాలు చెయ్యం, మీరూ మీరూ చూసుకోండి అనికూడా అనేశారట. తననీ, కోదండరాం నీ, వేదికపైనున్న నేతలనందరినీ "జైళ్లలో" పెట్టినా భయపడం అని జయశంకర్ సంస్మరణసభలో ప్రకటించాడట. దొంగాడా చెయ్యి కొరుకుతావన్నట్టు, కి కు రె అలాంటి పిచ్చిపని చేస్తే, మళ్లీ తెలంగాణాని అగ్నిగుండం చేసేసి, సామాన్యులకీ, విద్యార్థులకీ బొందలుపెట్టి, ఆనందిద్దామనుకుంటున్నాడు పాపం! ఈ సారి సంక్షోభం రాదు అనీ, 356 అని పెద్ద పెద్ద అంకెలు హైరరాబాదంతా ఆకాశంలో కనిపిస్తున్నాయి అనీ అంటున్నారు రాజకీయ నిపుణులు. మరి వాడికి యెందుకు కనపడడంలేదో?

"నేనింక సినిమాలలో ముఖ్యమంత్రిగా నటించను. నిజం ముఖ్యమంత్రిగానే చూడాలని ప్రజలు ఆశగా యెదురుచూస్తున్నారు" అని ప్రకటించిన చిరంజీవి, అందాకా, వచ్చే కేంద్ర మంత్రివర్గ విస్తరణలో యే నౌకాశ్రయాలశాఖో కేటాయిస్తే ప్రస్తుతానికి అడ్జస్ట్ అయిపోతానన్నా, "మాలో మేమే కొట్టుకు ఛస్తున్నాం! క్యూలో చివర నిలబడితే, అక్టోబరు నెలాఖరుకి యేమైనా ఫలితం వుండొచ్చు" అన్నారట అసలువాళ్లు. మరేమి చేస్తాడో?

హోదా, పరపతి గల నేరస్తులమీద దర్యాప్తూ, విచారణా యేమాత్రం జరగకపోవడంతో, దేశంలో చట్టబధ్ధ పాలన చట్టుబండలు అవుతోంది అంటూ ఆయనెవరో సుప్రీం కోర్టులో 'పిల్' దాఖలు చేస్తే, కోర్టుకూడా 'విచారిస్తూ', లా కమిషన్ వారూ, ప్రభుత్వమూ 'సమగ్ర నివేదిక' ఇవ్వాలని ఆదేశించిందట. బాగానే వుంది. సదరు కమిషన్ వగైరాలు యేమి నివేదిక ఇస్తారో మళ్లీ వాయిదానాటికి చూడాలి.

(ఈ న్యాయాలయాలూ, అక్కడనడిచే 'తతంగాలూ' సామాన్యులెవరికీ అర్థం కాని చిదంబర రహస్యాలు. వాటి విషయంలో ఇంకో టపా వ్రాస్తాను.)

అమరనాథ యాత్ర మొదలయ్యిందట. కొన్ని సార్లు, సంవత్సరానికోసారి యేర్పడే ఆ మంచులింగం చిన్నదిగానే వుండడం, త్వరగా కరిగిపోతూండడం లాంటి కారణాలతో, ఆ ప్రదేశంలో ఓ రాతి లింగాన్ని ప్రతిష్టిస్తే, మంచు కరిగిపోయినా దేవుడున్నట్టు వుంటుందని వో ప్రతిపాదన వచ్చిందట--ఆ ప్రభుత్వంలో పెద్దలనుంచే అనుకుంటా. (హిమాలయాలని కూడా వదలకుండా, బంగారు తాపడాలూ అవీ చేశేసి, నిత్యాన్నదానాలూ అవీ ప్రవేశపెట్టీసి, బాగా డబ్బుచేసుకోవచ్చని గొప్ప ప్లానే వేశారు కానీ, అక్కడి ఆలయ పూజారులూ, మతపెద్దలూ "ససేమిరా" అన్నారట. ఆ లింగుడు అంతవరకూ అదృష్టవంతుడే!

ఇంకో గొప్పవిషయం యేమిటంటే, కేరళ పద్మనాభస్వామి ఆలయం నేలమాళిగలో, ఇన్నాళ్లూ తెరవకుండా వుంచిన ఆరు అరల్లో, ఓ మూడింటిని తెరిపిస్తే, సుమారు 700 కోట్ల విలువైన బంగారు, రత్నాల ఆభరణాలూ, అలంకరణ వస్తువులూ లభించాయట. అలా తెరవాలని చెప్పి, సుప్రీంకోర్టే పుణ్యం కట్టుకొంది. ఆ లెఖ్ఖంతా పారదర్శకంగానే జరిగిందంటున్నారు. బృందంలో యేడుగురు సభ్యులూ, అందులో ఇద్దరు కేరళ హైకోర్టు మాజీ న్యాయమూర్తులూ వున్నారట. మరి అది నిజమైన పారదర్శకతేనా, సత్యసాయి ట్రస్టు లాంటిదా? యేమో--సుప్రీంవారే తేల్చాలి.

కబుర్లు - 60

2011-06-26T12:37:00.000-07:00

అవీ, ఇవీ, అన్నీ

డీజల్ ఓ 3 రూపాయలూ, వంట గ్యాస్ ఓ 50 రూపాయలూ, కిరోసిన్ ఓ 2 రూపాయలూ మాత్రమే పెంచడంతో సరిపెట్టారు సర్కారువారు. అంతేకాక, తమ రాబడిలో ఓ 49,000 కోట్లు మాత్రమే వుదారంగా కోత పెట్టుకొని సంతృప్తి పడ్డారు. యేమాత్రం సంతృప్తి లేని, ఇనుకుడు కుండీల్లాంటి పొట్టలుగల ఆయిల్ కంపెనీలు మాత్రం, ఇంకా ఓ లక్షా ఇరవైవేలో యెన్నో కోట్లు నష్టాలు మూటగట్టుకుంటూనే వున్నాయట. అదీ అంతర్జాతీయ చమురు ధరలు బ్యారల్ 100 డాలర్లకన్నా తగ్గిన సమయంలో! రాష్ట్రాలు కూడా వుదారంగా తమ రాబడుల్లో కోతపెట్టుకోవచ్చని సలహా కూడా ఇచ్చారు. మమతాదీ అప్పుడే కోత పెట్టేసుకొంది గానీ, మహారాష్ట్ర, ఆంధ్ర లాంటివాళ్లు 'ససేమిరా' అంటున్నారు. ఇంక ద్రవ్యోల్బణం మాట దేవుడెరుగు!

డిగ్గీ సింగ్ "రాహుల్ ప్రథాని పదవికి అర్హుడు" అని మాత్రమే అన్నాను. అయినా ఇప్పుడు ఆ పదవి ఖాళీ లేదుగా?! అన్నాట్ట. అంటే, ఖాళీ చేయించే పని చూడండ్రా అని తన తోటి భజంత్రీగాళ్లకి పురమాయిస్తున్నాడా? పిచ్చి 'దంబరం' పేపర్లో చూసేవరకూ సీబీఐ ప్రణబ్ ఆఫీసుల బగ్గింగ్ విషయంలో దర్యాప్తు జరుపుతోంది అని నాకు తెలీదు--అన్నాడట. అదేమి హోమో! అదేమి మంత్రో! నిజంగా సీబీఐ దర్యాప్తు సాగిస్తోందా? మరి ప్రైవేటు సంస్థ దర్యాప్తు సంగతేమిటి? అంతా "అంధేర్ నగరీ, అన్ భుజ్ రాజా" వ్యవహరం లా వుంది! మోక్షానికి 2014 దాకా ఆగాలా?

మంత్రివర్గానికీ, పార్లమెంటుకీ సమర్పించబోయే "లోక్ పాల్" బిల్లులో, పౌరసమాజం సూచనలని పొందు పరిచే అవకాశం యెంతమాత్రం లేదు అనీ, అది ప్రభుత్వం ప్రతిపాదించిన పాత బిల్లు కూడా కాదు అనీ, దేశానికి యేది మంచిది అనుకుంటే అది చేసే స్వేచ్చ అన్నా హజారేకి యెప్పుడూ వుంటుంది అనీ--ప్రకటించేశాడు క 'పిల్సి 'బల్! పౌర సమాజం, ప్రజా సమూహం "ఈజిప్టు" తరహాలో వీళ్లకి గట్టిగా బుధ్ధి వచ్చేట్టు చెయ్యవలసిన సమయం ఆసన్నమైంది. ఇంకా ఓ ఇరవై రోజులు సమయం వుంది కాబట్టి, ఆ దిశలో విజృంభించాలని బ్లాగర్లకి నా విఙ్ఞప్తి!

నేనన్నట్టే చాలామంది నల్లధనాన్ని "స్విస్" బ్యాంకుల్లో వెతకనఖ్ఖరలేదు, దేశంలో వెతికితే చాలు అంటున్నారు. నిజానికి, స్విస్ బ్యాంకులు ఖాతాల్లో దాచుకున్న సొమ్ముకి నూటికి సంవత్సరానికి 1% మాత్రమే వడ్డీ చెల్లిస్తాయి! వాములు మేసే స్వాములకి ఇవి తిన్నాక పళ్లలో చిక్కుకున్నంత కూడా కాదు! అందుకనే వాళ్లు ఆ ఖాతాలని "ఫండ్స్ పార్కింగ్" కోసమే తాత్కాలికంగా వాడుకొని, అక్కడనుంచి విదేశాలలోని తమ దొంగ ఖాతాల ద్వారా మన దేశానికి తరలించి, తెల్లధనం గా చెలామణి చేస్తూ, భారతీయ కుబేరులుగా "ఫోర్బ్స్" మేగజైన్ కి యెక్కుతున్నారు. కోరలు లేని "ప్రివెన్షన్ ఆఫ్ మనీ లాండరింగ్" లాంటి చట్టాలూ, అవగాహన లేని దర్యాప్తు సంస్థల వుద్యోగులూ, ఒకవేళ వున్నా, పైవాడి అదేశాలకి యెదురుచూడ్డానికి అలవాటు పడడం--ఇలాంటి వాటివల్ల అవి నిష్ప్రయోజనంగా మారాయి. అలాంటివాళ్ల భరతం బట్టడానికి పౌర సమాజం యేమి చెయ్యగలదు? జన లోక్ పాల్ బిల్లు చట్టం అయ్యాక, ఈ పని మొదలెడదాం. బారాందే! నువ్వుకూడా వెయిటూ!

ఓ పాతిక సంవత్సరాల క్రితం, బ్యాంకులు "వుత్పత్తి రంగానికే ఋణాలు" (ప్రొడక్టివ్ క్రెడిట్) ఇచ్చేవి. ఆ రోజుల్లో, పెరుగుతున్న జనాభాకి సరిపోయే "మకాన్"ల ఆవశ్యకత గ్రహించిన ప్రభుత్వం, నేషనల్ హౌసింగ్ బ్యాంకుని స్థాపించి, గృహ నిర్మాణ రంగాన్ని ప్రాథాన్యతా రంగం లో చేర్చి, బ్యాంకులని కూడా ధారాళంగా ఆ రంగానికి అప్పులు ఇవ్వమంది. తరవాత, సంస్కరణల పుణ్యమా అని, "మౌలిక వసతుల రంగం" (రోడ్లూ, పవర్ ప్లాంటులూ, విమానాశ్రయాలూ వగైరా) ప్రాధాన్యత గుర్తించి, పెట్టుబడులని ఆ వైపు మళ్లించారు. సందట్లో సడేమియాగా బ్యాంకులు ప్రాధాన్యత అసలు ఇవ్వకూడని రంగాలు (మద్యం తయారీదారులూ, వాటి హోల్ సేల్, రిటెయిల్ వ్యాపారులూ, మోటర్ సైకిళ్లూ, కార్లూ తయారుచేసే ఫ్యాక్టరీలూ, ప్రైవేటు విమాన యాన సంస్థలూ--ఒకటేమిటి--సిగరెట్లూ, బీడీలూ, గుట్కాలూ తో సహా అందరికీ ఋణాలు ఇచ్చేశాయి). ఇప్పుడు "వృధ్ధి రేటు" లో భాగంగా అవన్నీ లెక్కించబడుతున్నాయి! ఇప్పుడు ద్రవ్యోల్బణానికి అడ్డుకట్ట వేస్తే, "వాటి" వృధ్ధి రేటు తగ్గిపోతుందికదా? అదీ మన పాలకుల బెంగ! నరసాపురం లాంటి చిన్న వూళ్లలో కూడా, ఇళ్లు కట్టించుకుంటూ, తమకి ఓ పోర్షన్, అద్దెకివ్వడానికి ఓ పోర్షన్ నిర్మించేసి, పార్కింగుల ప్రసక్తి లేకుండా ప్రహరీ గోడలు నిర్మించేసుకొని, ఇప్పుడు కార్లు కొనేసి, పదిహేనడుగుల సిమెంటురోడ్డులో కూడా, ఇళ్లముందు అగ్గిపెట్టెల్లా రోడ్డుమీదే పార్కింగ్ చేసేస్తున్నారు! అదీ మన వృధ్ధి! విమానాశ్రయాల్లో మౌలిక వసతులు పెంచకుండా, ప్రైవేటు విమాన సంస్థలని ప్రోత్సహించి, వాళ్లు చేస్తున్న సర్కస్ ఫీట్లూ, జిమ్మిక్ లూ వినోదంగా చూస్తూంది ప్రభుత్వం. ప్రభుత్వ విమానయాన సంస్థ "ఎయిర్ ఇండియా" (దాంట్లో ఇండియన్ ఏయిర్ లైన్స్ ని విలీనం చేసి) తో ఇష్టం వచ్చినట్టు ఆడుకున్నాడు, ఆడుకుంటున్నాడు ప్రఫుల్ పటేల్. ఇది 2జీ స్కాము కన్నా పెద్దది! మరి ఈ వృధ్ధి రేట్లకోసం యేడుద్దామా? ద్రవ్యోల్బణం గురించి యేడుద్దామా? దువ్వూరివారూ! యేమంటారు?

1980 లలో, చైనాలో ప్రపంచ ప్రఖ్యాత కంపెనీల సీ ఈ వో లు సైతం, సైకిళ్లపై తమ కార్యస్థానాలకి వెళ్లేవారు. నగరాల్లో పీక్ అవర్ ట్రాఫిక్ అంతా సైకిళ్లదే! అవన్నీ న్యూస్ రీళ్లుగా మనదేశంలో సినిమాలలో చూపించేవాళ్లు. ఆశ్చర్యపోవడం మావంతు! ఇప్పుడు అదే చైనాలో, సైకిళ్లు కనుమరుగయ్యాయి! బొంబాయి, ఢిల్లీ, కలకత్తా, చెన్నై, బెంగుళూరు లోలా, ఐదారు లేన్లలో కార్లు వెళుతూండడం, ట్రాఫిక్ జాములూ--షరా మామూలే చైనాలో కూడా. ఇప్పుడు బెంగుళూరు లాంటి నగరాల్లో, ముఖ్యమైన రహదారుల్లో, సైకిళ్లని ప్రోత్సహించాలని కంకణం కట్టుకున్నారట కొంతమంది అత్యుత్సాహులు! వుదాహరణకి, జయానగర్ లాంటి "జీ బీ లింగప్పలు" వుండే ప్రాంతంలో, "ప్రత్యేక సైకిలు ట్రాక్ లు" యెర్ర రంగులో యేర్పాటు చేస్తారట. బాగుంది. "ఫైవ్ స్టార్ హోటళ్లకి కారుల్లోనే వెళ్లాలా? సైకిళ్లమీద రాకూడదా?" అని ప్రశ్నిస్తున్నారట కొంతమంది. అనేక రెస్టారెంట్లముందూ, ఫుడ్ కోర్టుల ముందూ, ప్రస్తుతానికి ఓ "ఐదు" సైకిళ్లు పార్కింగ్ చేసుకొనే సదుపాయం కల్పిస్తారట. త్వరలో పార్కింగ్ సౌకర్యాన్ని వందా, వెయ్యీకి పెంచుతారట! "పెళ్లి కుదిరితేగానీ పిచ్చి తగ్గదూ, పిచ్చి కుదిరితేగానీ పెళ్లి అవదూ"; "పిచ్చి ముదిరింది, తలకి రోకలి చుట్టండి!" అనీ ఇలాంటి సామెతలు గుర్తుకు రావడంలేదూ? మన దేశ వృధ్ధి రేటేమయిపోను? సైకిలు ప్రమోషన్ లాబీలేమైనా యాక్టివేట్ అయ్యాయా? సీబీఐ దర్యాప్తుకి ఆదేశించాలా? అయితే యెవరూ? ఇవన్నీ శేష ప్రశ్నలు.

కబుర్లు - 59

2011-06-24T10:25:00.000-07:00

అవీ, ఇవీ, అన్నీ

(యేమిటో--ఈ మధ్య యెంత సీరియస్ విషయాలు యెంతగా సణిగినా, తెలుగు బ్లాగర్లెవరూ సీరియస్ అవడంలేదు యెందుకో మరి!)

కాంగీ కార్యదర్శి డిగ్గీ సింగ్, "రాందేవ్ కి పట్టిన గతే అన్నాకీ పడుతుంది" అని హెచ్చరించాడట! మళ్లీ "థూ నా బొడ్డు" అని, "రాం దేవ్ నేమి చేసినా, అన్నానేమి చేసినా, మా పార్టీకి సంబంధం లేదు. స్థానిక వ్యవస్థే చూసుకుంటుంది అన్నానంతే" అన్నాడట. అంటే షీలా, నువ్వు చూసుకో అని చెప్పడమా? (మొన్నోరోజు వీడే, "రాహుల్ ఇంక పెళ్లి చేసుకొని (వాడికి 41 యేళ్లిప్పుడు!), ప్రథానమంత్రి అయిపోవలసిన రోజు దగ్గరకి వచ్చేసింది" అని, మళ్లీ నేనలా అనలేదు అనేశాడు!) అన్నా దీక్ష అంటే ఓ సారి రుచి చూశాడుగా! అందుకే, ఆయనకాకుండా, ప్రశాంత్ భూషణ్ గానీ, కేజ్రివాల్ గానీ దీక్ష చేస్తే బాగుంటుంది అని కూడా అన్నాడట! వాడికి దీటుగా, "అన్నా చేస్తున్నాడా, ఇంకొకరా అన్నది కాదు ప్రశ్న. యెవరు చేసినా 'దేశ ప్రజానీకం యవత్తూ' దాని వెనక వుందని మరచిపోవద్దు!" అని జవాబిచ్చాడు అన్నా. బుధ్ధి తెచ్చుకుంటారా?

చిత్రమైన విషయమేమిటంటే, ప్రభుత్వం ప్రవేశపెట్టదలుచుకున్న లోక్ పాల్ బిల్లు లో, అవినీతి చేసినవాడికంటే, వాడిమీద ఫిర్యాదు చేసినవాడికి యెక్కువ శిక్ష విధించవచ్చట! ప్రభుత్వ కర్మచారులందరినీ లోక్ పాల్ పరిధిలోకి తెస్తే, ఓ 40 లక్షలమంది కేంద్ర వుద్యోగులూ, 80 లక్షల మంది రాష్ట్ర వుద్యోగులమీదా మొత్తం 1 లక్షా 20 వేల ఫిర్యాదులు వస్తే, లోక్ పాల్ వుక్కిరిబిక్కిరి అయిపోతాడట! (అంటే, లోక్ పాల్ బిల్లు రాగానే ఖచ్చితంగా "అందరు" కర్మచారులపైనా ఫిర్యాదులు వస్తాయని గట్టి నమ్మకం అన్నమాట ప్రభుత్వానికి!). అసలు ఆ గొడవెందుకు? ఓ సారి లోక్ పాల్ యేర్పడ్డాక, వాడే చూసుకుంటాడు కదా--యే ఫిర్యాదుని, యెన్ని ఫిర్యాదులని యేమి చెయ్యాలో? ఇంక శిక్షల విషయానికొస్తే, ఓ స్పెషల్ కోర్టు ఫిర్యాదు పనికిమాలినది అని తలిస్తే, ఫిర్యాదీకి 'కనీసం ' 2 సంవత్సరాల శిక్ష విధించవచ్చట. వుదాహరణకి ఓ వూళ్లో యువజన సంఘం వాళ్లు, స. హ. చట్టం క్రింద దరఖాస్తుచేసి, మా సర్పంచ్ ఇంత తినేశాడు అని ఫిర్యాదు చేస్తే, స్పెషల్ కోర్టు వాళ్లు "ఠాట్! అది బోగస్ ఫిర్యాదు" అని సంఘం లో అందరికీ తలా రెండేళ్లూ శిక్ష వేసెయ్యచ్చట. సర్పంచ్ ఆ పరిధిలోకి రాడు కాబట్టి, వాడికి శిక్ష వుండదట! యెంత బాగుందో కదూ!

యజుర్వేద మందిరం లో వున్న నగదూ, బంగారం వగైరా లెఖ్ఖించేశారు. కానీ, ఆ మందిరం తెరిచిన వెంటనే, ఓ ముఫ్ఫై ఐదున్నర లక్షలు, ఓ ట్రస్ట్ మెంబరు, ఓ కారులో బెంగుళూరు తరలిస్తూండగా, చెక్ పోస్ట్ లో పట్టేశారు! అవి ఓ 12 మంది భక్తులకి చెందినవి అనీ, వాళ్లు పోలీసు స్టేషన్ కి వెళ్లి, ఋజువులు చూపించి, తీసుకెళతారనీ, బాబా వారసుడు రత్నాకర్ ప్రకటించాడట. ఇంతవరకూ వాటిని యెవరూ తీసుకెళ్లలేదు. పోలీసులు విచారిస్తున్నారు! ఇంకా, రెండు గోనె సంచుల్లో 5 కోట్లో, 10 కోట్లో కుక్కేసి, ఓ వోల్వో బస్సులో తరలిస్తూంటే, పట్టుకున్నారట. దాని సంగతి యేమయిందో మరి పత్రికలలో కుడా రావడంలేదు. మధ్యలో, జగన్, తన అనుచరులూ, వారి పాద రక్షలూ సహా, సాయి మందిరంలో రత్నాకర్ ని కలిసాడట. యేమి చర్చించారో రహస్యం!

ఓ తొమ్మిది నెలల క్రితం, ప్రణబ్ గారి ఆఫీసులో, ఓ 16 చోట్ల దొంగ కెమేరాలూ, టేపులూ పెట్టిన వైనం ఆయనే గమనించి, వెంటనే ఆ విషయం దర్యాప్తు చెయ్యమని ఓ ప్రైవేట్ సంస్థకి అప్పగించారట! ఆ దొంగ కెమేరాలు హోం మంత్రిగారే పెట్టించాడు అని చెవులు కొరుక్కొంటున్నారట. లేకపోతే, దర్యాప్తు సీబీఐ కే అప్పగించేవారుకదా? అని క్రొశ్నిస్తున్నారు. నిజమే కదా? తొమ్మిది నెలల తరవాత, ఆ పదహారుచోట్లా వున్నది "బబుల్ గం" మాత్రమే అనీ, దాంట్లో పెద్ద విచారించవలసిన అగత్యం లేదనీ ప్రభుత్వ వర్గాలు అంటున్నాయట! (బబుల్ గం నవిలేసి, దాంతో యేమేమి చెయ్యచ్చో "జెఫ్ఫ్రీ ఆర్చర్" కథలూ, నవలలూ చదవండి). ఆర్థిక మంత్రే టాయిలెట్ లో యేమి చేస్తున్నాడో బయటివాళ్లు వీడియోలు చూస్తున్నారంటే, సామాన్యులకి దిక్కెవరు?

మొన్నోరోజు అదేదో "దాస్ గుప్తా" అనే ఆర్థిక నిపుణుడి వ్యాసం వొకటి చదివాను. ఆర్థిక సంస్కరణల తరువాయి భాగం అమలు చెయ్యడంలో ప్రభుత్వం అనవసరంగా ఆలస్యం చేస్తూంది అనీ, కైర్న్-వేదాంత మీద యేడాది పైగా నాంచుతోంది అనీ, పోస్కో వ్యవహారంలో రాజకీయాలకి ఆస్కారం ఇచ్చి, ప్రాజెక్టుని అలస్యం చేస్తోంది అనీ, చిల్లర వ్యాపార రంగంలోకి విదేశీ ప్రతక్ష పెట్టుబడులని యెంత తొందరగా ఆహ్వానిస్తే అంత త్వరగా ద్రవ్యోల్బణం తగ్గి, వృధ్ధి రేటు పెరిగిపోతుంది అనీ--ఇలా అమూల్యాభిప్రాయాలని వెలిబుచ్చాడు. ఈయన యెవరి కొమ్ము కాస్తున్నాడో తెలుస్తూనే వుంది కదా? ఇంకా, ఈయనే అనుకుంటా, రతన్ టాటా గత సంవత్సరంలో 16 దేశాల్లో కోట్లాది పెట్టుబడులు పెట్టాడనీ, మనదేశంలో ఒక్క పైసా కూడా పెట్టుబడి పెట్టలేదు అనీ, అది దేశం లోంచి పెట్టుబడి 'యెగిరిపోవడంతో' (ఫ్లైట్ ఆఫ్ కేపిటల్) సమానమనీ అన్నాడు. మరి బ్రిటిష్ ఈస్టిండియా కంపెనీవాళ్లు ఓ నాలుగువందలేళ్లక్రితం మనదేశం లో పెట్టుబడులు పెట్టడం పెట్టుబడి 'యెగిరిపోవడమే' అనుకున్నారా? సంపద తమ దేశానికి "యెగిరి రావడం" అనుకున్నారా?! యేమిటో ఈ ఆర్థిక నిపుణులు!

కర్ణాటక ముఖ్యమంత్రి ఎడ్డి ఊరప్ప (తన పేరు "యెడ్యూరప్ప" అని మాత్రమే ప్రచురించాలని ఆయన యెన్నికవగానే మీడియా వాళ్లకి ఆఙ్ఞ జారీ చేశాడు) తనతో 'సఖ్యంగా' వుండమని చెప్పడానికి యెవరినో తనదగ్గరకి పంపించాడని కుమార స్వామి అన్నాడు. వెంటనే, మర్నాటి పేపర్లో, యెడ్యూరప్ప ఓ ప్రకటన ఇచ్చాడు--కుమార స్వామి అదే ఆరోపణ, ధర్మస్థల మంజునాథ స్వామి ఆలయంలో "ఆన" పెట్టాలనీ, తానుకూడా ఆ ఆరోపణ అబధ్ధమని "ఆన" పెడతాననీ, డేటూ టైమూ చెప్పమనీ! మొత్తానికి రేపు 27 న ఇద్దరూ అక్కడ ఆనలు పెట్టడానికి యేర్పాట్లు చేస్తున్నారు! జనాలు పిచ్చోళ్లు అనుకోబట్టిగానీ, మంజునాథుడిమీద అంత భయమూ, భక్తీ, నమ్మకమూ వుంటే, అసలు యెవడైనా గడ్డి యెందుకు కరుస్తాడు? ఇదో రకం రాజకీయం మరి!

కబుర్లు - 58

2011-06-18T11:06:00.000-07:00

అవీ, ఇవీ, అన్నీ

ప్రపంచ ప్రఖ్యాత భారతీయ ఇంగ్లీషు రచయితా, కవీ "ప్రీతీష్ నందీ" మొన్న ఓ ఆర్టికల్ వ్రాస్తూ, ప్రపంచ ప్రఖ్యాత కార్టూనిస్ట్, "పీనట్స్" ఫేం "ఛార్లీ షూల్జ్" యొక్క "కామన్ ప్లేస్" కాన్సెప్ట్ గురించి వివరిస్తూ, "ఇది క్విజ్ కాదు" అంటూ ముందు కొన్ని ప్రశ్నలూ, తరవాత కొన్ని ప్రశ్నలూ సంధించాడు. మొదటివి, నిజంగా క్విజ్ మాస్టర్ల ఫేవరిట్, క్విజ్ లో పాల్గొనేవాళ్ల "ప్రైజ్ క్వేశ్చన్సే". ఉదా:- ప్రపంచంలోని 5గురు గొప్ప ధనవంతుల పేర్లూ; గత ఐదు సంవత్సరాల్లో, యేడాదికి ముగ్గురు చొప్పున యెన్నికైన "మిస్ ఇండియా"ల్లో, ఓ ఐదుగురి పేర్లూ; ఓ ఐదుగురు భారత రత్నాలూ; ఐదుగురు గొప్ప "బ్యాట్స్ మెన్" పేర్లూ; ఓ ఐదుగురు "నోబెల్ విజేతల" పేర్లూ--ఇలాంటి చక్కని ప్రశ్నలు! (ఇలాంటి వాళ్లందరినీ మెజారిటీ ప్రజలు వాళ్ల జీవితకాలం లోనే మరచిపోతూంటారు. వాళ్లు కొంతకాలం మాత్రమే "మెరిసి" తరువాత "ఫేడ్" అయిపోతారు.) ఇంక, రెండో విభాగం ప్రశ్నల్లో, మనలో యెవరికి వారికి మాత్రమే సమాధానాలు తెలిసేవి. ఉదా:- మీ చదువుకి దోహదం చేసిన కొంతమంది వుపాధ్యాయుల పేర్లు; మిమ్మల్ని కష్ట కాలం లో ఆదుకొన్న కొంతమంది స్నేహితుల పేర్లు; మిరు ప్రేమించిన/మిమ్మల్ని ప్రేమించిన వ్యక్తుల పేర్లు (వాళ్లిప్పుడెక్కడున్నారో సైతం మీకు తెలియక పోయినా); మిమ్మల్ని అభినందించిన, ప్రత్యేకంగా గుర్తించినవాళ్ల పేర్లు; మీరు సంతోషంగా గడపగల ఓ ఐదుగురి స్నేహితుల పేర్లు--ఇవీ! వీటిలో అన్నింటికీ చాలా మంది ఓ ఐదుగురి పేర్లైనా చెపుతారు. యెంత, సమయానికి గుర్తుకు రాని నాలాంటి వాళ్లయినా, కనీసం ఇద్దరి ముగ్గురి పేర్లు చెప్పగలం! యేతా వాతా తేలేదేమిటంటే, మొదటి విభాగంలోని ప్రశ్నలకి సమాధానంగా వచ్చే వాళ్లని, వాళ్ల జీవితాలనీ, మనం ఖచ్చితంగా ఆదర్శంగా తీసుకొంటాం. స్పూర్తి పొందుతాం. కానీ, వాళ్లకి మన జీవితాంతం కృతఙ్ఞులుగా వుండేంత సీను వుండదు! అయితే, రెండో విభాగం వాళ్లని అస్తమానూ తలచుకుంటాం, వారికి కృతఙ్ఞులుగా వుంటాం, వుండాలి! అదీ "కామన్ ప్లేస్" మహాత్మ్యం! బాగుంది కదూ?

"యజుర్వేద మందిరం"--సత్యసాయి నివాస, వ్యక్తిగత కార్యాలయ సముదాయం. ఆయనని ఆసుపత్రికి తరలించగానే, ఆ గదికి తాళం వేశారట (సత్యజిత్ యేమో!). మొన్న గురువారం ఆ తాళం తెరిచి, 36 గంటలసేపు మదింపు చేశాక, అందులో 11.50 కోట్లకి పైగా నగదూ, 98 కేజీల బంగారం, 307 కేజీల వెండీ లెఖ్ఖతేలాయట. ఇంకా కొన్ని పత్రాలూ వగైరా కూడా వున్నాయట. ఆ మందిర వర్గాలు చెప్పిన సమాచారం ప్రకారం, ఆ మందిరానికి వచ్చిన నగదు, మిషన్లతో లెక్కించి, ప్రతి గంట గంటకీ ఓ బ్యాంకులో జమ చేసేవారట! అలా మొత్తం ఖజానాని ఎస్బీఐ, ప్రశాంతినిలయం శాఖలో జమ చేశారట. బాగుంది. మరి యెంతటి ధనవంతుడైనా, రేపు యెంత నగదు అవసరం అనుకుంటే అంతకు మించి, అదీ తప్పదంటేనే, ఓ లక్షో, రెండు లక్షలో ఇంట్లో వుంచుకుంటాడు. అలాంటిది, అన్ని కోట్ల నగదుని ఆయన తన గదిలో యెందుకు వుంచుకున్నట్టు? అంత బంగారం, వెండీ యెందుకు వుంచుకున్నట్టు? ఆయన ఆసుపత్రిలో వున్నప్పుడు ఆ మందిరంలోంచి కొన్ని విలువైన వస్తువులనీ వగైరా బయటికి తరలించేశారని వార్తలు వచ్చాయి. ఆలా పోయినవి పోగా మిగిలినవే ఇంత మొత్తంలో వున్నాయా? అలాంట్ "హోర్డర్", అది ట్రస్ట్ అయినా సరే, మీద ప్రభుత్వం యేమి చర్యలు తీసుకోవాలి?

ఈ సందర్భంగా రాందేవ్ డిమాండ్లలో వొకటైన "వెయ్యి, ఐదువందల రూపాయల నోట్లని రద్దు చెయ్యాలి" అనే దాని రిలవెన్స్ అందరికీ బోధపడుతుంది అనుకుంటా--ముఖ్యంగా అంతంత నగదు నిల్వ చేసుకొనేవాళ్ల మీద ఆ ప్రభావం తీవ్రంగా వుంటుంది--మన స్థూల దృష్టికి. కానీ.....ఇదివరకోసారి అగ్రరాజ్యాల వొత్తిడికి లోబడి, అప్పటికి చలామణిలోవున్న అతి పెద్ద కరెన్సీ నోటు (రూ.1,000/-) లని "అన్నింటినీ" రద్దు చేశారు ఇందిరా గాంధీ టైములో! కాని, దానివల్ల దేశ ఆర్థిక వ్యవస్థ మీద పడిన ప్రభావం దాదాపు మృగ్యం అనే చెప్పాలి. కారణం--ఆ రద్దు ఫలానా రోజునించీ అమల్లోకి వస్తుందని ప్రకటించి, హోర్డర్లు కానివారికి అసౌకర్యం కలుగకుండా--వారిదగ్గరవున్న నోట్లని ఓ ధృవపత్రం సాయంతో బ్యాంకులలో డిపాజిట్ చేసుకోవచ్చని వెసులుబాటు కల్పించడమే! దాంతో అనేక నోట్లు వలలోనుంచి తప్పించుకున్నాయి! అలా తప్పించుకోగా మిగిలిన నోట్లతో మా వూళ్లో మార్వాడీల్లాంటివారు సిగరెట్లూ, చుట్టలూ వెలిగించుకొంటూ, పేపర్లకి కూడా యెక్కారు! బ్యాంకులవాళ్లు మాత్రం--యెవరు చెల్లించారు, వాళ్ల చిరునామా యేమిటి, వాళ్లకి ఆ నోట్లు యెక్కడనుంచి వచ్చాయి, ఆ నోట్ల నెంబర్లూ, వగైరా అనేక వివరాలతో రికార్డులు నిర్వహించలేక చచ్చారు! తరవాతైనా ఆ వివరాలని వుపయోగించుకున్నారా అంటే, అదీ లేదు! అందుకే అదో ప్రహసనం. అందుకే ప్రభుత్వం వాటిని రద్దు చెయ్యడానికి తటపటాయిస్తోంది--కాదు--ససేమిరా అంటున్నారు!

ఇలా వ్యవస్థలోని నగదుని డీ మానెటైజ్ చేసి, నల్లధనాన్ని ప్రభావశీలంగా రద్దు చెయ్యాలంటే ఒక చక్కని మార్గం వుంది. అదేమిటంటే--రిజర్వ్ బ్యాంక్, 0 నుంచి 9 లోపల ర్యాన్‌డమ్‌గా ఒక అంకెని యెన్నుకొని, (వుదాహరణకి 5) ఆ అంకె నోటుమీదుండే నెంబరు చివరలో వుంటే యే డినామినేషన్ నోటైనా, ఫలానా రోజు (4, 5 రోజుల సమయం ఇవ్వచ్చు) నుంచీ చెల్లవు అని ప్రకటించాలి. సామాన్యులకి ఇబ్బంది కలుగకుండా, తమ దగ్గరవున్న ఆ నెంబరు నోట్లని తమ బ్యాంకు ఖాతాల్లో జమ చేసుకొనే సౌకర్యం కలిగించాలి. మరే ప్రశ్నలూ, వివరాల నమోదూ అఖ్ఖర్లేదు. యేరోజు నుంచీ అవి చెల్లవన్నారో, ఆ రోజుకి బ్యాంకుల్లో జమ అయిన మొత్తం నోట్ల విలువకి సమానంగా కొత్త సిరీస్ లో, కొత్తనోట్లు ముద్రించవచ్చు. వాటిని సమయానుకూలంగా విడుదల చెయ్యవచ్చు. ఇక్కడ వుద్దేశ్యం యేమిటంటే, ఆ ప్రకటించిన తేదీకల్లా దేశంలోని మొత్తం కరెన్సీ లో 10% రద్దయిపోతుంది! అలా నెలకి ఓ అంకె చొప్పున యెన్నుకొని, వాటిని రద్దుచేసుకొంటూ పోతే, పది నెలల్లో మొత్తం కరెన్సీ అంతా బ్యాంకులకి చేరి, కొత్త కరెన్సీ చలామణిలోకి వస్తుంది! దానికయ్యే ఖర్చు ఇంక యే స్కీముక్రింద చేసే ఖర్చుకన్నా చాలా తక్కువగానే వుంటుంది! ప్రయోజనం యేమిటంటే, సాయి ట్రస్ట్ లాంటివాళ్లు గడువు తేదీలోగా చాలా తక్కువనోట్లు మాత్రమే మార్చుకోగలరు! ఇంకా కొంతమంది అయితే, మీలాంటి, నాలాంటి వాళ్ల దగ్గర ఆ నోట్లు కొంత డిస్కవుంట్ తో మార్చుకోగలరు! అంతేగానీ, పెద్దమొత్తాల్లో ప్రభుత్వాన్ని దగా చెయ్యలేరు! బంగారం, వెండీ, రియల్ ఎస్టేట్ వగైరాల మాటేమిటి అని అడగొచ్చు మీరు.....కానీ, వచ్చేనెల ఒకటో తారీఖునుంచీ, నెలాఖరువరకూ చివర 5 అంకెగల యేనోటూ చెల్లదు అనేటప్పటికి, దాని ప్రభావం వాటన్నింటిమీదా కూడా వుంటుంది. చాలా మంది ఆ బాధపడలేక, బ్యాంకు చెక్కులనీ, ఇతరమార్గాలనీ అనుసరిస్తారు....నగదు చెల్లింపులకి బదులుగా! పైగా, మళ్లీ ఆ తరువాత నెల యే నెంబరు నోట్లు రద్దు చెయ్యబడతాయో తెలీదాయె! దెబ్బతో నగదు చలామణీ రంగం పూర్తిగా ప్రభుత్వ/ఆర్బీఐ అధీనంలోకి వచ్చేస్తుంది. 75% పైగా నల్లధనం రద్దు అయిపోతుంది! దమ్ముంటే, ఈ పధ్ధతి అనుసరించమనండి ముందు. ఆ తరువాత విదేశాల్లో నల్లధనం గురించి ఆలోచిద్దాము. (యెలాగూ ఆ ప్రయత్నాలు కొనసా.......గుతూనే వుంటాయి కదా!)

మన ఆర్బీఐ వారు మరోసారి రెపో/రివర్స్ రెపో రేట్లని ఓ పావలా శాతం పెంచారు--ద్రవ్యోల్బణాన్ని నిరోధించడానికి! అయినా ద్రవ్యోల్బణం ఇంకో ఆర్నెల్లపాటు రెండంకెలలోనే కొనసాగే సూచనలు కనిపిస్తున్నాయి. పైగా రంగరాజన్ లాంటివాళ్లు సైతం, పెట్రో వుత్పత్తులమీద ప్రభుత్వ అజమాయిషీ పూర్తిగా తొలగించాలంటున్నారు! ఆ మాటెలా వున్నా, నేడో రేపో డీజెల్, వంటగ్యాస్, కిరోసిన్ల రేట్లూ, మరోసారి పెట్రోలు రేట్లూ తప్పక పెంచబడతాయి! మరి ద్రవ్యోల్బణం యెలా నియంత్రింపబడుతుంది? తాటాకు చప్పుళ్లకి కుందేళ్లు బెదరవు! కాబట్టే, ఒకేసారి రెండో మూడో శాతం రెపో/రివర్స్ రెపో రేట్లే కాకుండా, బ్యాంకుల ఎస్ ఎల్ ఆర్, సీ ఆర్ ఆర్ లని కూడా పెంచేసి, వ్యవస్థకి ఓ షాక్ ట్రీట్మెంట్ ఇవ్వాలన్నది! వృధ్ధి రేటుమాటంటారా? ప్రతీనెలా దాన్ని గణించుకొంటూ తృప్తి పడఖ్ఖర్లేదు! ఆర్థిక సంవత్సర చివరి త్రైమాసికంలో మళ్లీ ఆ రేట్లని పెంచినంతమేరా తగ్గిస్తే, వృధ్ధి రేటు నిలబడడానికి యేమీ లోటు వుండదు. ఒకవేళ కొంచెం తగ్గినా అది ఆరోగ్య సూచకమేగానీ, అనవసర "వాపు" ని చూపించి, బలుపనుకోమనే దౌర్భాగ్యం తప్పుతుంది! ఇంక పెట్రో ధరలకి విరుగుడు "ఆయిల్ పూల్" మాత్రమే!

వింటారా?

(యమర్జంటు) కబుర్లు - 57

2011-06-17T23:12:00.000-07:00

అవీ, ఇవీ, అన్నీ

తాటిపట్టెల్లాంటి తమ నాలుకలని కూడా యెన్ని మెలికలు తిప్పగలవో--మన గుంట నక్కలు--అని అస్తమానూ అశ్చర్యపోవడం మనవంతు!

మొన్న 15-06-2011న జన లోక్ పాల్ విషయంలో, ప్రభుత్వ, పౌరసమాజ ప్రతినిధుల చర్చలు ఫలించలేదు కానీ, మళ్లీ 20, 21 తారీఖుల్లో మళ్లీ చర్చించాలని మాత్రం వొప్పుకున్నారట. "అప్పటికీ యేకాభిప్రాయం రాకపోతే, 'ఇరుపక్షాల వాదనలతో' 'ఒక ' చిత్తు ప్రతి (డ్రాఫ్ట్) కేబినెట్ కి సమర్పిస్తాం" అన్నాడు క 'పిల్సి 'బల్. ఇంకా వివరిస్తూ, "మా ఆశప్రకారం, పౌర సమాజం వాళ్లు తీవ్ర విభేదాలున్న ఆంశాలపై 'ఒక' ప్రతిని మాకిస్తారు. విభేదాలు వున్నాయని 'మేమనుకుంటున్న' అంశాలపై 'ఒక' ప్రతిని తయారుచేసి, అప్పుడు 'యేకాభిప్రాయానికి రావడానికి ' ప్రయత్నిస్తాము" అన్నాడు. (ప్రశాంతి భూషణ్ మాత్రం, "మౌలిక విభేదాలు చాలా వున్నాయి కాబట్టి, ఇంక మంత్రివర్గమే నిర్ణయం తీసుకోవాలి" అన్నాడు.)

ఓ నక్క "వూళ" పెట్టగానే, మర్నాటికల్లా మిగిలినవి యేమన్నాయో చూడండి! ప్రభుత్వం 'మీ డిమాండ్లు అన్నీ తీరుస్తాం' అని చెప్పింది కాబట్టి, ఇదివరకు నా దీక్ష విరమించాను, ఇప్పుడు ఆ వాగ్దానాలపై మళ్లీ వెనక్కి పోతోంది కాబట్టి, మళ్లీ ఆగష్ట్ 16 నుంచీ దీక్ష చేస్తాను" అని హజారే ప్రకటించడం పాపమట. "ప్రభుత్వం, దేశానికి ఓ మంచి చట్టం చేసివ్వడం అనే ఒక గొప్ప అవకాశాన్ని చేతులారా పాడుచేసుకోడమే కాకుండా, నాటకం ఆడుతూంది. ప్రభుత్వ బిల్లు 'జోక్ పాల్ ' బిల్లు మాత్రమే!" అని కేజ్రీవాల్ అనడం మహా పాపమట! ప్రభుత్వం మాత్రం, జూన్ 30లోగా బిల్లు ప్రతిని 'ఆశించినప్రకారం, పౌరసమాజం సహకారంతో' సిధ్ధం చేయడానికి దృఢ సంకల్పంతో వున్నాము" అని ప్రకటించిందట! (దీని నోరు యేదో?)

గుంటనక్కలు మూడు, త్రిగళగీతం ఆలాపించాయట! (పిచ్చి 'దంబ 'రం; క 'పిల్సి 'బల్; సల్మాంకుర్ 'షిద్ ' లు!). ఈ చివరినక్క, "ప్రభుత్వం 'మేము ' నడిపిస్తూంటే, నిర్ణయాలు 'బయట ' జరిగితే, ఇంక ప్రభుత్వం యెందుకు?" అందట! (ఆ అహంకారమే వద్దంటూంది పౌర సమాజం!). రెండో నక్క, "ప్రభుత్వానికి సమాంతరంగా వేరే నిర్మాణాన్ని సృష్టించలేము. ప్రభుత్వం తనంతటతాను తన 'అధికారాన్ని ' యెందుకు వదులుకోవాలి?" అందట! (అధికారం తలకెక్కి, దిగకపోతేనే పౌరసమాజం కళ్లెర్రజేస్తోందిరా మూర్ఖా!). "ఓ ప్రక్క బెదిరిస్తూ, చర్చలు జరపడం కుదరదు" అని కూడా అందట. "ప్రపంచంలో యెక్కడా ఓ ప్రతిని తయారు చెయ్యడానికి 'వుపవాసం ' ఓ మార్గమని నేననుకోను!" అందట మొదటి నక్క, తన తాటిపట్టెని వెకిలిగా వ్రేళ్లాడేస్తూ! (మీచేత మూడు చెరువుల నీళ్లు త్రాగించడానికి 'వుపవాసమే' సరైన మార్గం కదరా? 'పళ్లన్నీ'యప్ప!)

ఈ మూడూ కాకుండా, వేరేప్రక్కనుంచి, ఓ మీసాలు వ్రేళ్లాడేసుకునే నక్క వీ'రప్ప ' "అదొక్కటే పౌరసమాజమా? ఇంకాకొన్ని పౌరసమాజాలున్నాయి! ప్రభుత్వం 'జాతీయ యేకాభిప్రాయం ' కోరుతోంది" అని తన గణిత, సాంఘిక శాస్త్రాల పరిఙ్ఞాన్ని బయటపెట్టుకొంది! పైగా, "మొత్తం 40 అంశాల్లో, 34 అంశాలపై యేకాభిప్రాయం వుంది. అయినాసరే, చర్చించకుండా దీక్ష చేస్తాను అంటే, ఆయన ముందే నిర్ణయించుకున్నట్టు!" అని తెలివిని ప్రదర్శించింది! (పౌరసమాజం వొకటేననీ, దాని ప్రతినిధులు వేరువేరుగా వుండొచ్చనీ కనీస ఙ్ఞానం లేదా? పౌర సమాజం చెప్పేది జాతీయ యేకాభిప్రాయం కాదా? అసలైన ఆ "ఆరు" అంశాలపై చర్చించే ప్రసక్తే లేదని భీష్మించిందెవరురా దరిద్రుడా?).

అసలు ప్రభుత్వం తరఫున "మీ డిమాండ్లకి ప్రభుత్వం అంగీకరిస్తోంది" అని చెప్పి, "అన్నా" చేత దీక్ష విరమింపచేసింది ఇవే గుంటనక్కలు కాదూ? వీళ్లందరికీ రాజైన "నీలిరంగు నక్క" వూళపెడితే యెక్కడ ఛస్తానో అని నోరు విప్పదు! ఆ నక్కని అడవికి రాజుని చేసిన ఇటలీ దేవత "చివరికి"గానీ నోరు విప్పదు--అటో ఇటో తేలేదాకా!

అతి ప్రమాదకర విషయం యేమిటంటే, కేపిటలిస్ట్ సమాజ ప్రతినిధి--టైమ్‌స్ ఆఫ్ ఇండియా--"అన్నా హజారే నేతృత్వంలోని ఒక ఫ్యాక్షన్" అని మొయిలీ అన్నాడని రిపోర్టు చేసింది! ఆయన అన్నాడో, వీళ్లే వాడినోట్లో ఆ మాటలు కుక్కారో! ఫ్యాక్షనిష్టులూ.....జాగ్రత్త!

నా విఙ్ఞప్తి--ఈజిప్టు తరహా అంటూ అయ్యవారిని చెయ్యబోయి కోతులని చెయ్యక, ఈ గుంటనక్కల మెలికలు తిరిగే తాటిపట్టెల వ్యవహారాలని మీ శాయశక్తులా ప్రచారం చెయ్యండి! "అన్నా" ముందు వీళ్లందరూ యెందుకు మోకరిల్లరో చూద్దాం!

జై భారత్!

కబుర్లు - 56

2011-06-14T01:22:00.000-07:00

అవీ, ఇవీ, అన్నీ

అయ్యింది.....'బారాందే' దీక్ష యెనిమిదోరోజున గుంటకట్టి గంటవాయించేసింది. ఆయనకన్నా సీ'నియరూ', 'జీవన కళా' గురువూ, సూడో శ్రీ శ్రీ, ఆయన్ని ఆఙ్ఞాపించి మరీ దీక్ష విరమింపచెయ్యవలసి వచ్చింది. చిరంజీవి రాజకీయ బాలుడు అనుకుంటే, ఈయన రాజకీయ పసిబాలుడు అని ముందే చెప్పాను! ("మేడం గారు మీ డిమాండ్లకి వొప్పుకుంటే, మీరు దీక్ష విరమిస్తారని నమ్మకం కలిగేందుకు ఓ వుత్తరం రాసి ఇవ్వండి" అన్న గుంటనక్కల మాటలని నమ్మేసి, విరమణ వుత్తరం ఇచ్చేసి, తీరా అది వాళ్లు బయటపెట్టేసేసరికి, "మోసం చేశారు" అని మొత్తుకొంటే యేమి లాభం?) ఇంకా కొమ్ములే మొలవని పొట్టేలు, యేకంగా మేరుపర్వతాన్నే ఢీకొంటే, యేమవుతుంది?

ఆయన గాలి తినైనా బతికేస్తాడు కానీ, కనీసం నాలుగురోజులు యెంతమంది నిలబడగలరు అని కూడా సణిగానిదివరకే! ఆయనేదో 'సాయుధ దళాలు' అన్నాడనే వంకతో, ఐదోరోజే మిగిలిన సెంటర్లలో "దీక్షాపరులు" దుకాణాలు సర్దేశారు! రవి శంకర్ కూడా, ప్రభుత్వ ప్రతినిధులని ఆయన తో చర్చించేలా చేద్దామని ప్రయత్నించి, ఛీ కొట్టించుకొన్నాడు!

కొసమెరుపేమిటంటే, రాజకీయపార్టీలవాళ్లు "హమ్మయ్య! మళ్లీ ఇప్పుడప్పుడే అవినీతిమీద పోరాటం చేసే సాహసం చెయ్యరెవరూ!" అని సంబర పడుతున్నారట. అందుకే దేనికైనా సమయం సందర్భం వుండాలన్నది.

వృధ్ధ జంబుకం, ప్రణబ్ "యెన్నికైన ప్రజా ప్రతినిధులని 'పౌరులు' ఆఙ్ఞాపించజాలరు!" అంటున్నాడు. అసలు కీలకం అంతా "యెన్నికైన" లోనే వుంది, ఆ సన్నాసులు 24 గంటలూ అవినీతిలో మునిగి తేలుతూ, నేర చరిత్రని పేజీలకి పేజీలు పెంచుకుంటూపోతూ, తమ అవినీతికి వ్యతిరేకంగా తమనే చట్టం చేసుకోమంటే వెధవ నాటకాలు ఆడుతున్నారు అనేకదా పౌరసమాజం మొత్తుకుంటున్నది? అందుకే కదా "జనలోక్ పాల్" కావాలంటున్నది? మొన్నటి వరకూ (మార్చ్ నెల వరకూ) ప్రథాని కూడా జనలోక్ పాల్ పరిథిలోకి రావాలన్న ఈ జంబుకం, మిగిలిన గుంటనక్కలూ, ఇప్పుడు 'ససేమిరా' అని యెందుకంటున్నట్టు? మరోసారి "అన్నా హజారే" వుద్యమించినా, బారాందే బాటలోనే ఆ వుద్యమాన్ని యెదుర్కోవచ్చు అని ఓ ధీమా యేర్పడిపోయినట్టుంది వీళ్లకి! "దేన్‌దార్దాన్‌దే" అని వాళ్లకి తెలీదనుకోను! ఇక్కడ మేరుపర్వతం "అన్నా" అని మరిచిపోవద్దు అని నా హెచ్చరిక వాళ్లకి. అసలు ఈ జంబుకాల దరిద్రం మన దేశానికి యెప్పుడు వదులుతుందో మరి! (అందుకే "అన్నా" తన తరువాతి వుద్యమంలో భాగంగా యెన్నికల సంస్కరణలని కూడా యెన్నుకున్నాడు!)

జైపాల్ రెడ్డి "మా పార్టీ ప్రాంతీయ, వుప ప్రాంతీయ తత్వానికి వ్యతిరేకం" అని వక్కాణించేశాడట. ఐదురాష్ట్రాలో యెన్నో యెన్నికలైపోయాయి, బారాందే దీక్ష భగ్నం అయిపోయింది, జనలోక్ పాల్ విషయం లో ఇంక అధిష్టానం మాటలని వల్లించడం తప్పితే వాళ్లు చేసే పనేమీ లేదు, చిదంబరం, మొయిలీల్లాంటివాళ్లకి చేతినిండా పని లేదు--ఇంకేం చెయ్యాలి? ఆంధ్ర దేశం గొడవల్లేకుండా వుంది! అందుకని, తెలంగాణా వారికి "గూర్ఖా లేండ్" తరహా ప్యాకేజీ ఇస్తాము, రాష్ట్రాన్ని సమైక్యంగానే వుంచుతాము, శ్రీ కృష్ణ కమిటీ కూడా అదే చెప్పింది" అని ప్రకటించి, మళ్లీ అగ్గి రాజేస్తారట! (వీళ్లిలాంటి ప్రకటనేమీ చెయ్యకపోతే కొంపేమైనా మునుగుతుందా ఇప్పుడు?) బాగుందికదూ రాజకీయం?

"డీ ఎం కే వాళ్ల అవినీతికి వ్యతిరేకంగా తమిళ ప్రజలు ఇచ్చిన తీర్పు" అని జయలలితా డబ్బా కొట్టేసుకొంటోంది. కాంగీ వాళ్లు వంతపాడుతున్నారు. రాజా, కనిమొళి, దయానిధి వంటివాళ్లకి శిక్షలు పడతాయని నమ్మకం వచ్చేసింది ఆవిడకి. అందుకని, తన వంతుగా ప్రభుత్వానికి యేమేమి షరతులు పెట్టాలో ఓ పెద్ద లిస్టే తయారు చేసుకొందట! అసలు పెద్ద గీత ప్రక్కన చిన్న గీతే కానీ, ఆవిడమాత్రం యేమి తక్కువ తింది? ఆ రోజుల్లో అవినీతి కొన్ని లక్షలకే పరిమితం అయ్యేది కాబట్టి ఆవిడ లక్షల్లోనే చేసేది. అదే కరుణానిధి టైములో ఆవిడే ముఖ్య మంత్రి అయ్యుంటే, కోట్ల కోట్ల లోకి పాకిపోయేది కాదూ? యెందుకొచ్చిన గురివెంద రాజకీయాలు!? కట్ట కట్టి వీళ్లందరినీ బంగాళాఖాతం లో పారేసే రోజు వస్తుందేమో--2014 లోగానే!

ఇంక మన రాష్ట్రం లో "కి కు రె" కి రోజులో, నెలలో దగ్గరపడ్డట్టున్నాయి.....బొచ్చె ని పీ సీ సీ అధ్యక్షుణ్ని చేయ్యగానే, ఒకటే గోల.....మొత్తం పదవుల్లో రెడ్లు యెంతమంది, కాపులెంతమంది, (కమ్మోళ్లందరూ టీ డీ పీ అని లెఖ్ఖ కాబట్టి వీళ్ల గొడవ లేదు), ఇంకొంతమందికి పదవులిస్తే అప్పుడు కాపులెంతమంది, రెడ్లెంతమంది, (బీసీ, ఏస్ సీ ల మాటేమిటి?) అందులో మళ్లీ కోస్తాకెన్ని, రాయల కెన్ని, తలంగాణాకెన్ని.....చిరంజీవి వస్తే యెలాగ? రాకపోతే యెలాగ?......ఇలా వొకటే గొడవ! రేపు గూర్ఖా లేండ్ ప్రకటన వస్తే, అప్పుడు చూడాలి వీళ్ల లెఖ్ఖలు!

రాక్షసీ! నీపేరు రాజకీయమా? అన్నరెవరో ఇదివరకే!

(యమర్జెంటు) కబుర్లు - 55

2011-06-06T10:36:00.000-07:00

అవీ, ఇవీ, అన్నీ

"అడుక్కుంటున్న ఆంధ్రా యూనివర్సిటీ"
"మణిశంకర్ అయ్యర్....."
"దయానిధి మారన్....."
"డీజల్ ధరలు......"
"రాం జేఠ్మలానీ.....కాశ్మీర్...."
"యూనిఫారాలూ, ఎన్ సీ సీ,......"
"స్పీకర్ల యెన్నికా"
"జగన్ వర్గం పిల్లాటలూ....."
"రాం దేవ్ దీక్షా"

....అబ్బో! యెన్ని వున్నాయో సణుక్కోడానికి! 24 గంటలూ సరిపోవు! ఈ సణుగుళ్లతో నాబుర్రే కాదు, అవి విన్నవాళ్ల బుర్రలు కూడా ఖరాబయిపోతాయేమో! అయినా సింపుల్ గా సణిగెయ్యాలి.....అలవాటయిన ప్రాణం కదా మరి?!

ఒకమ్మాయి, ఎం సీ యే లో 2008-09 లో యూనివర్సిటీ స్థాయిలో "బంగారు పతకం" విజేతగా నిలిస్తే, "మాదగ్గర రూ.3,240/- యే వున్నాయి. మిగతా రూ.7,760/- నువ్విస్తే, బంగారు పతకం చేయించి, నీకు 'బహూకరిస్తాం '. లేకపోతే లేదు" అని వ్రాసిందట--ప్రత్యేక రిజిస్ట్రార్, డాక్టర్ 'సో అండ్ సో'!

సిగ్గూ యెగ్గూ లేని రా నా లని మించిపోతున్నారీ "కర్మచారులు"! అదే నేనైతే, నా జీతంలోంచి ఆ డబ్బు ఖర్చుపెట్టి, గుట్టుగా ఆ పతకం చేయించేసేవాణ్ని. లేదా, ఓ రోల్డు గోల్డు పతకం కొనేసి, ఆ అమ్మాయి కాళ్లా వేళ్లా పడి, ఇప్పటికి ఇది తీసుకో అమ్మా.....రేపెప్పుడైనా వర్సిటీ కి డబ్బు వున్నప్పుడు, నిజం పతకం చేయించి, గుట్టుగా మీకు అందజేస్తాను....మా పరువు తీయొద్దు! అని బతిమాలేవాణ్ని.

మహామహులు కట్టమంచి రామలింగా రెడ్డి, సర్వేపల్లి రాధాకృష్ణన్, బుల్లెయ్య లాంటి వాళ్ల ఆధ్వర్యంలో వెలిగిన యూనివర్సిటీకి ఇప్పుడు యెంత దౌర్భాగ్యం!

దీనికి బాధ్యులెవరో!

కామన్వెల్త్ క్రీడల గురించి 2006లోనే మార్చిలో మొదలెట్టి, అప్పటి కేంద్రమంత్రి మణిశంకర్ అయ్యర్ ప్రథానికి, అనేక సందేహాలు లేవనెత్తుతూ వరుసబెట్టి లేఖలు వ్రాశారట!!! ("నికమ్మా" గారు మాట్లాడలేదట!). స హ చట్టంక్రింద అడిగితే, ఈ సమాచారం బయటపెట్టిందట--ప్ర. మం. కార్యాలయం.

యెంత దు. పో. మీద వానో!

కేంద్ర జౌళి శాఖ మంత్రి దయానిధి మారన్, "నేను టెలికాం మంత్రిగా రాజీనామా ఇచ్చినప్పుడే దర్యాప్తు చేసుకోవాల్సింది. ఇప్పుడైనా, దర్యాప్తు చేసుకొంటే, చేసుకోండి. (నన్నేమీ పీకలేరు)" అన్నట్టుగా మాట్లాడుతున్నాడు.

అన్నట్టు, వీడికింకా చిప్పకూడు అరేంజ్ చేశారో లేదో!

సోకాల్డు (తింగర) ఆర్థిక శస్త్రవేత్త (ముం. కొ.) ల బ్రెయిన్ కంట్రోలు, యూపీయే చేతిలో పెట్టేసినట్టున్నారు.

పీఎమీఏసీ--ప్ర. మం. ఆర్థిక సలహా మండలి ఛైర్మన్ ప్రొఫెసర్ రంగరాజన్--ద్రవ్యలోటుని పరిమితం చెయ్యాలంటే, డీజల్ ధరలపై నియంత్రణ 'పూర్తిగా' యెత్తివేయాలంటున్నాడు! మరి ద్రవ్యోల్బణం మాటేమిటి? అది ఆందోళన కలిగిస్తోంది (ట.). డీజల్ రేట్ల నియంత్రణ తొలగిస్తే, వ్యవసాయరంగం యేమంత వృధ్ధి చెందకపోయినా, సేవల రంగం, పారిశ్రామిక రంగం, ఆ లోటుని తీర్చేసి, వృధ్ధి రేటు పెరిగిపోతుందట! ఓ సారి చేసి చూడండి.....యేమవుతుందో!!!

రాం జేఠ్మలానీ.....2002లో అప్పటి ప్రథాని వాజపేయీ యేర్పాటుచేసిన "కాశ్మీర్ కమీటీ" అధ్యక్షుడూ, శాంతిభూషణ్, మధుకేశ్వర్, ఎం జె అక్బర్ (ఆఖరి యిద్దరూ పాత్రికేయులూ, ఆ ముందటివాడు, అందరికీ తెలిసిన లాయరూ) సభ్యులూనట.

మరి వీళ్లు తొమ్మిదేళ్లనుంచీ యేమి పొడిచారోగానీ, మొన్న హురియత్ కాన్ ఫరెన్సు అతివాదనాయకుడు సయ్యద్ ఆలీషా గిలానీ 'మర్యాద ' చూశాక, కాశ్మీర్ సమస్య పరిష్కారం 'యెంతో దూరం లో లేదు!' అన్నారట.

పోనీలెండి.....బెటర్ లేట్ దేన్ నెవర్ అన్నారుకదా?

ఓ వారంలో పాఠశాలలు తెరుస్తారనగా, ఇంకా పుస్తకాలూ, దుస్తులూ సిధ్ధం కాలేదట. పుస్తకాలు జెరాక్సులు తీయడం మొదలెట్టారట. దుస్తులు, ఆప్కోవాళ్లు నిధులకొరత కారణంగా ఒకజత మాత్రమే అందించగలుగుతుంటే, మిగతా గుత్తేదారులు అదీ లేదట!

స్పీకర్ల యెన్నిక "సవ్యంగా" జరిగిపోయింది. ప్రో టెమ్ స్పీకర్, మనోహర్ స్పీకరుగా, 'మూజువాణీ' గా నెగ్గినట్టు ప్రకటించేశాక, చంద్రబాబు--నేనూ వున్నాను--అంటే, సరే, వోట్లు లెఖ్ఖెడదాం అన్నారట. జగన్ వర్గం వాళ్లు "సీక్రెట్ బ్యాలట్"లో, ఆత్మ ప్రబోధం ప్రకారం వోటు చేద్దామనుకొంటే, కాంగీ రాజకీయపండితులు, అంతకుముందెప్పుడో మ్యానేజ్ చేసుకొన్న కోర్టు తీర్పుల నేపధ్యంలో, "చేతులెత్తే వోటు" కూడా చెల్లుబాటవుతుందని యెన్నికపధ్ధతిని మార్చేయడంతో, చచ్చినట్టు మనోహర్ కే వోటు వెయ్యవలసి వచ్చింది (ట).

ఇంక "అవిశ్వాసం" ప్రసక్తేరాలేదని చంద్రబాబు వెళ్లి గవర్నరు దగ్గర మొరపెట్టుకొంటే, ఆయన ప్రశాంతంగా విని, ఇంకెవరైనా మాట్లాడినా వింటాను అని సంసిధ్ధతని ప్రకటిస్తే, ఇంకెవరూ మాట్లాడం అని వచ్చేశారు!

భలే రాజకీయం! కదా?

ఇంక రామ్ దేవ్ మొత్తం ఆస్థి 8000 కోట్లేనట. లక్షకోట్ల జగనే, వెనకా ముందూ ఆలోచిస్తుంటే, వీడేం పీకుతాడు? మహా అయితే, తనవెనకున్నవాళ్లని మేపలేక, కుదేలయిపోయి, మహాసముద్రంలో కాకిరెట్టగా మారిన ఇంకో చిరంజీవి అవుతాడేమో!......కాకపోతే, ఓ గ్రద్దో, రాబందో రెట్ట అవ్వచ్చు!

స్టేజ్ మేనేజ్ చేసిన (ఆడవాళ్ల సల్వార్ కమీజు దుస్తుల్లో తప్పించుకోడానికి ప్రయత్నం చేశాడంటే, ముందు వుప్పు అందినట్టే కదా? యెవరి చెవుల్లో పువ్వులు పెడతాడు?) పోలీసు చర్యతో ఆ కాస్త దీక్షా భగ్నమే చేసేశారట ఢిల్లీలో! (బలై పోయింది ఓ యాభై, అరవైమంది సామాన్యులే! ఆడవాళ్లతో సహా!)

ఇంకేం మిగిలింది? హళ్లికి హళ్లి, సున్నకి సున్న!

రేపటి సంగతి వెండి తెరపై!

(యమర్జెంటు) కబుర్లు - 54

2011-06-02T11:39:00.000-07:00

అవీ, ఇవీ, అన్నీ

రాజకీయ యెత్తులూ, పైయెత్తులూ!

రాజకీయ క్రీడ అనేది చాలామందికి తెలీదు. అందుకనే చాలామంది బలయిపోతూంటారు. నాలుగు వోట్లు పడి, ఒకటో రెండో పదవులురాగానే, తమకి యెదురు లేదు అనుకుంటారు! కానీ రాజకీయంలో యేదైనా "తాత్కాలికమే".....చిత్త శుధ్ధి వుంటే తప్ప.

రాజకీయ కురువృధ్ధుడు "కరుణా నిధి" ధృతరాష్ ట్రుడిలా నల్లకళ్లద్దాలు పెట్టుకొన్నందుకు, వాడి వంశం అంతా ఇవాళ రాజకీయాలకే బలి అయిపోతూంది.....దయానిధి, కళానిధి మారన్ లతో సహా!

ఇప్పుడు, కొంతం'మం'దిలీపు ల్లాంటివాళ్లు ఓ ముఫ్ఫై యెనిమిదేళ్లక్రితం మేము వున్న స్థాయిలోనే వున్నారంటే, వాళ్లకి అర్థం అవడంలేదు.

నా'గంజ 'నార్దనరెడ్డికి కళ్లముందు మునిసిపల్ ఎలక్షన్లే కనిపిస్తున్నాయి....తెదేపా నుంచి బహిష్కరింపబడి, తనపాట్లు తాను పడుతూన్నాడు. క్రితం యెన్నికలముందు తెలంగాణా కోసం బయటికి వెళ్లిన దేవేందర్ గౌడు యేమి బావుకున్నాడు?

ఇంక, బా'బారాందే'వ్......తన యోగాయేదో చేసుకోక, రాజకీయాలెందుకు వీడికి? ఫేస్ బుక్ లోనూ, ట్విట్టర్లోనూ ఎస్మ్మెస్ లని చూసుకొని, అదంతా తన బలుపు అనుకుంటున్నాడు. బాగానే వుంది. కానీ దేనికైనా సమయం సందర్భం వుండక్కర్లా?

వో ప్రక్క అన్నా హజారే నిరాహారదీక్షతో వుద్యమం చేస్తుంటే, వీడి అనవసర గొరిగింపులు కొన్ని. కాంగీ/యూపీయే తైనాతీ మీడియావాళ్లు వీడి నోట్లో తమ మాటలని కుక్కేసి, కక్కించేస్తున్నారు! ఇదే మొదటిసారికాదు.....నిన్న, "ప్రథాని ని లోక్ పాల్ పరిథి నుంచి తప్పించాల్సిందే" అని అన్నాడని ప్రచురించేశారు. ఇవాళ తాను అలా అనలేదు అంటున్నాడు ఈ రాజకీయ బాలుడు!

వాడు "ప్రైవేటు విమానం"లో ఢిల్లీలో దిగగానే, (తానే ప్రణవ్ ఇంటికి వెళ్లాల్సిన ప్రోగ్రాము! కానీ, ప్రణవే, కొన్నిగంటలముందు వచ్చి వీడిరాక గురించి పడిగాపులు పడ్డాట్ట!--పైనుంచొచ్చిన ఆదేశాల ప్రకారం!) నలుగురైదుగురు "ప్రముఖ" కేంద్ర మంత్రులు వాడిని కలుసుకొని, చర్చలు జరిపారట! మధ్యమధ్యలో మన్మోహన్ విఙ్ఞప్తులట!

"స్పష్టమైన హామీ లభించేవరకూ" లక్షమందితో దీక్షను విరమించేదిలేదని వీడి ప్రకటన!

చెట్టు ముందా, విత్తు ముందా అన్నట్టు, "జనలోక్ పాల్ ముందా? నల్లధనం ముందా?" అంటే, బుధ్ధున్నవాడెవడైనా, 'కొంత ముందుకు వెళ్లిన ' జనలోక్ పాలే ముందు అంటాడు.

ఈ రాజకీయ చంటిపిల్లాడు మాత్రం, "తనకి" మీడియాలోనూ, ప్రభుత్వంలోనూ అంత ప్రాముఖ్యత వచ్చేసినందుకు, మురిసి ముప్పందుమైపోతున్నాడు! తనకు తెలియకుండానే, "రాజకీయ" యెత్తుగడలకి బలైపోడానికి సిధ్ధమౌతున్నాడు!

పౌర సమాజం ఇలాంటివాళ్లని వెలివెయ్యాలి! ఫేస్ బుక్, ట్విట్టర్ మెంబర్లూ! మీ బుధ్ధి వెర్రితలలు వెయ్యకుండా, యెవరూ అలాంటి "ఆమరణ" నిరహారదీక్షలలో పాల్గొన వద్దు!

దయచేసి వినండి......ఇది నా విఙ్ఞప్తి మీకు!

తరవాత మీ యిష్టం!

కబుర్లు - 53

2011-06-01T09:00:00.000-07:00

అవీ, ఇవీ, అన్నీ

జనలోక్ పాల్ బిల్లు విషయంలో, కాంగీ/యూపీయే భభ్రాజిమానాలు, పౌరసమాజ సభ్యులపై బురదజల్లడానికి ప్రయత్నించి, జనాలు "ఛీ" కొట్టగానే, ఇలా లాభం లేదు అని, ఇంక "డైరెక్టు"గా వ్రేళ్లకీ, కాళ్లకీ మారాముళ్లు వెయ్యడం మొదలెట్టారు!

యేమైనాసరే, పౌరసమాజం వాళ్లచేత, "మహాప్రభో! మీరు ఇదివరకు తేదలుచుకున్నారన్న బిల్లే 'సర్వోత్తమం!' దాన్నే ప్రవేశపెట్టండి" అనిపించాలని వీళ్లు కంకణం కట్టుకొన్నారేమో!

లేకపోతే, ప్రక్కనపెట్టిన ఆ బిల్లులో "ప్రథాని"ని కూడా ఆ బిల్లు పరిథిలోకి తెస్తే, ఇప్పుడు "అలా కుదరదు" అనడమే కాకుండా, న్యాయమూర్తులూ, ఓ స్థాయి కన్నా చిన్న అధికారులూ వగైరాలని కూడా బిల్లు పరిధిలోంచి తప్పించాలని అంటున్నారంటే యేమిటీ అర్థం?

"అన్నన్నా హజారె!" అనీ, "ఈజిప్టు తరహా" అనీ మురిసిపోయిన వాళ్లు ఇప్పుడేమి చేస్తారూ?

"సామాన్య వోటరులూ"! ఆలోచించండి!

2014 లోనో, ఇంకో రెండేళ్లు ముందో, ఈ "ఇటాలిబాన్" కాంగీ/యూపీయే వాళ్లని "మీ వోట్లతో" కత్తికొక కండగా నరికి (మొన్న బంగ్లా సోదరులు "యెరుపు" పార్టీలని చేసినట్టు) బంగాళాఖాతంలో సొరచేపలకీ, తిమింగలాలకీ ఆహారంగా కలిపెయ్యవలసిన సమయం దగ్గరకొస్తూందా?

ప్రణాళికలు వెయ్యండి! విజృంభించండి! మీకు పోయేదేమీ లేదు!

(మహా అయితే, మళ్లీ ఇంకో "నిద్దరమొహమోడు" ప్రథాని అవ్వచ్చు......దేశం ఓ పెదేళ్లో యెంతో వెనక్కి పోవచ్చు!.....మళ్లీ ప్రత్యామ్నాయం వెదుక్కుందాం.....ఓ వెలుగు వెలుగుదాం!)

"భలే మామా భలే.....అదే మన తక్షణ కర్తవ్యం" అంటున్నారెవరో!

మరదే కదా?

దబ్బనం యెర్రగాకాల్చి, పొట్టమీద వాతలు పెట్టేస్తే, "బాల పాప చిన్నెలు" (గుక్క తిప్పుకోలేక బిగిసిపోవడం వగైరా) తగ్గిపోతాయనీ, చుట్ట యెర్రగా కాల్చి, నుదుటిమీద "బొట్టు" పెట్టేస్తే, మెదడుకి సంబంధించిన మూర్చ వంటి రోగాలు నివారణ అవుతాయి అనీ, నమ్మి ఆచరించేవారు ఓ యాభై, అరవై యేళ్ల క్రితం!

(ధన్వంతరీ, చఱకుడూ, శుశ్రుతుడూ వగైరాలు ఇలాంటి వైద్యాలగురించి యే గ్రంధాలలోనైనా వ్రాశారో లేదో తెలీదు!)

ఇప్పుడు "ఆందు నిమిత్తం" యేర్పడ్డ మంత్రివర్గ వుపసంఘం వారు, "బహుళ బ్రాండ్--రీటెయిల్ దుకాణాల" లో, విదేశీ ప్రత్యక్ష పెట్టుబడులకి (ఫారిన్ డైరెక్ట్ ఇన్వెస్ట్ మెంట్) అనుమతి ఇవ్వడమే ప్రస్తుత "ద్రవ్యోల్బణానికి" "సరైన" మందు అంటూన్నారట!

అంటే, మ్యాగ్నాలూ, మోర్ లూ, రిలయన్సులూ, బిగ్ బజార్లూ వంటివి "షేర్ మార్కెట్" లోకి వెళ్లిపోయి, వాటి షేర్లని విదేశీ పెట్టుబడిదారులు కొనేస్తే, ద్రవ్యోల్బణం చచ్చినట్టు దిగివస్తుందన్నమాట!

యెవరి చెవుల్లో పువ్వులు పెడతారో? పై చికిత్సలకీ, తుంటిమీదకొడితే పళ్లు రాలతాయనడానికీ దాఖలాలు ఇలాంటివే మరి!

యేమంటారు?

భూటాన్ రాజు జిగ్మే ఖేసర్ నగ్మేల్ వాంగ్ ఛుక్....పెళ్లి చేసుకోబోతున్నాడట. యువకులందరికీ తప్పని శిక్షే అయినా, ఆమె "తన ఆలోచనలు అర్థం చేసుకొని, వెంట నడవగల హృదయం వున్న అమ్మాయి" అని పొంగిపోతున్నాడట.

ఈయన కొంచెం "డిఫరెంట్" రాజుగారట! సాదాసీదాగా వుంటూ, దేశంలోని 20 జిల్లాలనీ చుట్టొచ్చి, పొలాల్లోకి వెళ్లి రైతులని పలకరిస్తూ, వుపాధ్యాయుల, వైద్యుల సలహాలు స్వీకరిస్తూ పరిపాలిస్తున్నాడట.

తన అధికారాలకి తానే కోతపెట్టుకొని, ప్రజాస్వామ్య పధ్ధతిలో యెన్నికలు జరిపించి, భూసంస్కరణలు అమలు చేశాడట.

ఇంకా, పారిశ్రామికంగా, ఆర్థికంగా "దూసుకెళ్లడం" ముఖ్యం కాదు....నా దేశ ప్రజలు యెంత సంతోషంగా వున్నారనేదే ప్రధానం! అంటూ, "గ్రాస్ నేషనల్ హ్యాపీనెస్" సిధ్ధాంతాన్ని అమలు పరుస్తున్నాడట ఈ యువకుడైన రాజు!

అలాంటి రాజుని నిజంగా "దైవాంశ సంభూతుడిగా" కొలవరూ ప్రజలు?

కబుర్లు - 52

2011-05-31T10:02:00.000-07:00

అవీ, ఇవీ, అన్నీ

"హింస" బిల్లు అని వొహటి పుట్టుకొచ్చిందట మన యూపీయే పాలకుల్లో......తమ అవినీతిపూరిత జమానా నుంచి సామాన్యుల దృష్టి మరల్చేందుకూ, ప్రత్యర్థి బీజేపీని ఇరుకులోపెట్టి, చోద్యం చూసేందుకూ!

ఇటాలియమ్మ సోనియా సారధ్యంలోని "జాతీయ భద్రతా మండలి" (ఎన్ ఎస్ సీ) "కుల, మత, ప్రాంత, భాషా పరమైన వర్గాలను లక్ష్యంగా చేసుకొని సాగే హింసను యెదుర్కొనేందుకు (ప్రభుత్వం) కఠినంగా వ్యవహరించాలి" అనే ప్రాతిపదికపై, ఈ ముసాయిదా తయారయ్యిందట!

"1984 ఢిల్లీ సిక్కు వ్యతిరేక అల్లర్లు, 2002 గుజరాత్ ముస్లిం వ్యతిరేక దాడులు, ఒడిస్సాలో క్రైస్తవ వ్యతిరేక దాడులు.....వంటి వాటికి అడ్డు కట్ట వేసేందుకు......" ఆవిడ ఆ బిల్లు తెస్తోందని కొంతమంది "విశ్లేషకులు" భావిస్తున్నారట.

దేశంలో యెక్కడైనా "మత హింస" చెలరేగినప్పుడు దాన్ని అడ్డుకోవటంలో కేంద్రం జోక్యం చేసుకునే "అవకాశం కల్పించడమే" ఈ బిల్లు ప్రత్యేకత(ట).

ఇప్పటివరకూ, యెక్కడైనా శాంతి భద్రతలని పరిరక్షించాల్సిన బాధ్యత, రాజ్యాంగం ప్రకారం ఆ రాష్ట్ర ప్రభుత్వాలదే.

(అందుకే పీవీ జీ బాబ్రీ మసీదు కూలగొట్టేస్తున్నా, ఆ రాష్ ట్ర ప్రభుత్వ 'బాధ్యత' లో జోక్యం చేసుకోలేక పోయాడు!)

మరిప్పుడు, దొడ్డి దారిన రాష్ట్ర బాధ్యతలని వాటినుంచి బలవంతంగా తప్పిస్తూ, ఇంత అర్జంటుగా ఈ బిల్లు తేవలసిన ఆవశ్యకత యేమి వచ్చింది.....ప్రజల దృష్టిని మళ్లించడానికి కాకపోతే?

ఈ ముసాయిదా మెజారిటీ ప్రజల పట్ల వివక్షను ప్రదర్శిస్తోందనీ, టాడా చట్టాలకన్నా ప్రమాదకరంగా వుంది అనీ, భాజపా వారు తీవ్రంగా దుయ్యబడుతున్నారట.

కపిల్ సిబాల్ మాత్రం, మా ప్రభుత్వం ఈ బిల్లు విషయంలో పూర్తిగా కట్టుబడి వుంటుంది అన్నాడట!

ఈ ముసాయిదాపై ప్రజాభిప్రాయాన్ని కోరుతూ, సలహాలూ సూచనలూ ఇచ్చేందుకు (మాత్రమేనా?) జూన్ 4 వరకూ (ఇంకో నాలుగురోజులు మాత్రమేనా?) గడువు ఇచ్చారట!

రాష్ట్రంలో కేసీఆర్, కోదండరాం, నాగం లకి 'తెలంగాణా' ఓ అస్త్రమైతే, సోనియాకి ఈ కొత్త "హింస" బిల్లు ఓ ప్రత్యేకాస్త్రం! హమ్మ...యెంత యెత్తు యెత్తిందీ??!!

బాబులూ.....సూచనలు, సలహాలు వెంటనే ఇస్తారా? "ఇటాలిబాన్" కుట్రకి తలవొగ్గుతారా?

మొదలెట్టండి మరి!

* * *

"అప్రూవరు సాక్ష్యం".....ఇదో చిత్రమైన "న్యాయ సూత్రం" అంతర్జాతీయంగా గుర్తింపు వున్నదీ, అన్ని దేశాల్లోనూ అమల్లో వున్నదీనూ.

అంటే, ఒకడికన్నా యెక్కువమంది ఓ నేరం చేసినప్పుడు, వాళ్లలో వొకడు "అప్రూవరు"గా మారితే, వాడు తన నేరాన్ని వొప్పుకొంటూ, మిగతావాళ్ల నేరానికి కూడా సాక్ష్యం చెప్పి, వాళ్లకి శిక్షపడడానికి సహకరిస్తే, అప్రూవరుకి 'అసలు నేరం' క్రింద కాకుండా, మిగతా నేరాల్లో అతి చిన్న శిక్షని విధింపబడేలా చేస్తామని వాడితో దర్యాప్తు అధికారులూ, వారి పై అధికారులూ, మంత్రులూ, ప్రభుత్వాలూ 'వొప్పందం' చేసుకొని, వాణ్ని సాక్షిగా కోర్టులో ప్రవేశపెట్టడమే--అప్రూవరు సాక్ష్యం!

వుదాహరణకి ఓ హత్య జరిగిందనుకోండి, అందులో నలుగురైదుగురు కలిసి చేశారనుకోండి, వాళ్లలో వొకడు కత్తితో పొడిచాడు, ఇంకొకడు హతుడి పెడరెక్కలు విరిచి పట్టుకొన్నాడు, ఇంకొకడు హతుడు అరవకుండా నోట్లో గుడ్డలు కుక్కాడు, ఇంకొకడు ఆ గది బయట, ఇంకెవరూ రాకుండా కాపలా కాస్తున్నాడు, ఇంకొకడు ఆ యింటి ప్రహరీ బయట నుంచొని, యెవరైనా అటు వస్తే 'విజిలు' వేస్తానని వొప్పుకొని, అక్కడే వున్నాడు.

వీళ్లందరినీ పోలీసులు పట్టుకొన్నారు....వివిధ సెక్షన్ల ప్రకారం, "హత్య, హత్యా ప్రయత్నం, హత్యకి సహకరించడం, కుట్ర, కుట్రలో భాగస్వాములవడం, తప్పించుకోడానికి ప్రయత్నించడం, తప్పించుకోవడం, సాక్ష్యాలని తారుమారు చెయ్యడానికి ప్రయత్నించడం, తారుమారు చెయ్యడం....." ఇలా కేసులు పెడతారు ఆ ఐదుగురిమీదా.

ఇంకా, హత్యల్లో చాలా రకాలున్నాయి--ప్రీ ప్లాన్‌డ్ మర్డర్, కోల్డ్ బ్లడెడ్ మర్డర్, ఇంటెన్షనల్ మర్డర్, అన్ ఇంటెన్షనల్ మర్డర్, ఏక్సిడెంటల్ మర్డర్, మ్యాన్ స్లాటర్, మర్డర్ ఇన్ సెల్ఫ్ డిఫెన్స్, మర్డర్ ఫర్ ఆనర్, సైకోపాతిక్ మర్డర్, స్కిజోఫ్రెనిక్ మర్డర్, స్ప్లిట్ పర్సనాలిటీ మర్డర్......ఇలా కొన్ని వందల రకాలు!

ఈ గొడవంతా యెందుకంటే, 26/11 కేసులో "అప్రూవరు"గా మారిన డేవిడ్ హెడ్లీ అమెరికాలోని షికాగో జిల్లా కోర్టులో అనేక విషయాలు వెల్లడించాడట!

(వివరాలు మీరడిగితే మరోసారి!)

* * *

యెప్పుడు కట్టారో తెలీదుగాని, యేలూరులో 'ప్రాచుర్యం పొందిన' "ధన్వంతరి" మందిరం వుందట. యెవరు, యెప్పుడు, యెలా సంపాదించారోగాని ఆయన కలర్ ఫోటో కూడా ప్రతిష్టించినట్టున్నారక్కడ. పేపర్లో ఫోటో చూస్తే అలానే అనిపిస్తూంది.

చెఱకుడూ, శుశ్రుతుడూ వగైరాల కలర్ ఫోటోల అన్వేషణలో వున్నారో, లేక ఇప్పటికే యెక్కడైనా వాళ్లకీ మందిరాలు కట్టేశారో, పేపర్లో వార్తా, ఫోటో వస్తేగానీ తెలియదు.)

మొన్నెప్పుడో ఓ రోజు, 'పరమహంస పరివ్రాజకాచార్య' మైసూరు దత్తపీఠం 'ఉత్తరాథిపతి' శ్రీదత్త విజయానంద తీర్థస్వామీజీ ఆ మందిరాన్ని సందర్శించిన సందర్భంగా, "ధన్వంతరీ వైద్య భగవాన్"ను సేవించిన వారికి ఆయురారోగ్య అష్టైశ్వర్యాలు సిధ్ధిస్తాయి అని పేర్కొన్నారట. (కార్పొరేట్ ఆసుపత్రులవాళ్లూ, ఆరోగ్యశ్రీ పథకాలూ, 108, 104 లూ యేమైపోవాలో మరి?)

భగవాన్ కు విశేషార్చనలూ, స్వామి అనుగ్రహభాషణం......మామూలే.

అదీ సంగతి.

* * *

అదేరోజు, 138 చక్రాల, రైలంత పెద్ద ట్రాలీ వోటి ఢిల్లీకి వెళుతూండగా, పెరవలి దగ్గర్లో జాతీయరహదారిపై "హోర్డింగులు" అడ్డు వచ్చాయట. ట్రాలీని ఆపేసి, తెలివిగా చక్రాల్లోని గాలిని వీలైనంత తగ్గించి, యెత్తు తగ్గాక, చక్కగా వెళ్లిపోయారట, మళ్లీ గాలి నింపుకొని!

గొప్పేగానీ, దారిలో అనేక వంతెనలు బలహీనంగా వున్నాయి అంటూ మొత్తుకుంటున్న ప్రభుత్వ శాఖలని ప్రక్కనబెట్టి, అలాంటివాటికి అనుమతులు యెవరు ఇస్తున్నారో?

కబుర్లు - 51

2011-05-28T23:43:00.000-07:00

అవీ, ఇవీ, అన్నీ

"బండిపూజలకి" తగినట్టుగా, కొత్త వాహనాలకి కొన్నికోట్లతో, ఓ పెద్ద షెడ్డు వేశారట ద్వారకా తిరుమలపైన శేషాచలం కొండమీద.

కొత్తగా బైక్ లూ, కార్లూ కొనుక్కొన్నవారు వాళ్ల వాహనాలని ఆ షెడ్డులో పెట్టుకొని, శ్రీనివాసునికి "ప్రత్యేక" పూజలు చేసుకొని, వెళితే "శుభ"మట! (ఫోటోల్లో ఆ షెడ్డంతా ఖాళీగానే కనిపిస్తూంది. అసలు ఒకరోజున యెన్నికార్లూ, బైక్ లూ కొనుక్కొంటారు? దాంట్లో కొండమీదకొచ్చి బండిపూజలు చేయించుకొనేవాళ్లెందరు? అంత పెద్ద షెడ్ అవసరమా?)

కానీ, అక్కడవున్న స్వామీ, ఇరువురు దేవేరుల విగ్రహాలూ యెండకి యెండీ, వానకి తడిసీ, చలికి వణికీ కూడా భక్తులని అనుగ్రహిస్తున్నాయట!

బండిపూజలు చేయించుకుంటున్నవాళ్లందరూ--ఇదేమి చోద్యం? అని ముక్కుమీద వేలు వేసుకుంటున్నారట!

ఈ బండి పూజలేమిటో? ప్రత్యేకలేమిటో? పూజలు చేసుకొన్న బళ్లు క్రిందకి వచ్చిన తరవాత యేమవుతున్నాయో? యే యాక్సిడెంట్లో బలవుతున్న బళ్లలో యెన్నింటికి "ప్రత్యేక" పూజలు చేశారో? వీటన్నింటికీ స్టాటిక్టిక్స్ తీసేదెవడు?

"హిజ్రాలు"--అంటే "ఆ మ కా" వాళ్లు. వీళ్లు ముఖ్యంగా విశాఖ, తూగోజి, పగోజి వాళ్లే అయివుంటారు. (వుత్తరదేశంలో ఇలాంటివాళ్లు పెళ్లిళ్లలో, చావుల్లో, మేళాలు కట్టి, పాటలుపాడి, వాళ్లిచ్చినంతపుచ్చుకొని, వెళ్లిపోతారు కానీ, భిక్షాటన చెయ్యరు!)

వీళ్లు ముఖ్యంగా హౌరా నుంచి చెన్నై, బెంగళూరు, హైదరాబాదు, ముంబై వెళ్లే రైళ్లలో స్లీపర్ కోచ్ లలో, యేడెనిమిది మంది జట్టుగా చేరి చేసే అల్లరులు భరించేవాళ్లకే తెలుస్తాయి.

(అలాంటి వాళ్లతో నా ప్రయాణానుభవం, మా మూడో హనీమూన్ అనే మొన్నటి మాయాత్రలో ఢిల్లీ నుంచి సామర్లకోట తిరుగు ప్రయాణంలో వివరిస్తాను. కొంచెం వోపిక పట్టండి.)

వాళ్లకీమధ్య రైల్వే పోలీసులు కౌన్సెలింగ్ నిర్వహిస్తున్నారట. వారి ఫోటోలూ, చిరునామాలూ సేకరించాలని అదేశించారట. ఆడిగినంత సొమ్ము ఇవ్వకపోతే ప్రయాణీకులమీద దాడులకి దిగుతున్న హిజ్రాలనీ, రాత్రివేళ వొంటరిగా ప్రయాణిస్తున్న ఆడవారిమీద దౌర్జన్యంచేసి, నగలూ, ఆభరణాలూ దోచుకొంటున్న హిజ్రాలనీ, తప్పుపట్టి, అలాంటి వాళ్లు వేరెవరైనా తమకు పట్టి ఇవ్వాలనీ, కొత్తగా వస్తున్న హిజ్రాల మీద వోకన్ను వేసి వుంచాలనీ, వారి వివరాలని పోలీసులకి చెపుతూవుండాలనీ, హెచ్చరించారట!

మొన్నోరోజు వాడెవడో హిజ్రాలు తనమీద దాడిచేసి, రైల్లోంచి తోసేశారనీ, క్రిందపడ్డ తాను ఇంకో రైలు క్రిందపడి ఓ కాలు పోగొట్టుకున్నాను అనీ పోలీసులకి కంప్లెయింట్ ఇచ్చాడట.

తీరా రైల్వే పోలీసులు దర్యాప్తు చేసి, వాడు చెప్పిన రైల్లో వాడు అసలు ప్రయాణించనేలేదనీ, వేరే రైల్లో ప్రయాణిస్తూ, స్టాపు లేని స్టేషన్లో దూకేసి, కాలు పోగొట్టుకున్నాడనీ, హిజ్రాల విషయం అంతా కట్టుకథ అనీ తేల్చారట!

ఇలాంటివాళ్లు కూడా వుంటారేమో మరి.

ఓ మూణ్నెల్ల క్రితం ముఖ్యమంత్రి కి కు రె పగోజి లో చింతలపూడి రచ్చబండ పర్యటనకి వస్తే, చేసిన యేర్పాట్లు చూడండి.

ఆయన పర్యటించే రెండు ప్రాంతాల్లో సువిశాలమైన వేదికలు నిర్మించారు.
మొదటి ప్రాంతంలో రచ్చబండ ముగిశాక, రెండో ప్రాంతానికి వెళ్లే రోడ్డుని పంచాయతీరాజ్ శాఖవారు "అగమేఘాలమీద" నూతనంగా నిర్మించారు. చలువపందిళ్లు వేయడంతోపాటు సభావేదికను, రహదారి డివైడర్లను మూడు రంగులతో అలంకరించారు.....1200 పోలీసులు....డాగ్ స్క్వాడ్, బాంబుతనిఖీ బృందాలు, ఓ "ఓఎస్డీ" స్థాయి అధికారితోపాటు 10 మంది ఎస్పీలూ, 40 మంది డీఎస్పీలతొపాటు, ఎస్సైలూ, కానిస్టేబుళ్లూ, హోం గార్డులతో సహా.....భారీ బందోబస్తు నిర్వహించారు. దీనితోపాటు, ఆయన దగ్గరకి యెవరూ రాకుండా, రోప్ పార్టీ సిధ్ధం చేశారు. ఇక్కడి ప్రజా ప్రతినిధులు అధికారులకి "స్పష్టమైన" ఆదేశాలు ఇచ్చారు.

ఇంక, సీఎం భోజనం కోసం, పలావు అన్నం, తెల్ల అన్నం, ఇతర మామూలు వంటకాలూ, గోంగూర పచ్చడి, దొండకాయ ఆవకాయ, గుత్తి వంకాయ కూర, గుమ్మడికాయ కూర, వులవచారు, మజ్జిగ చారు, పిట్ట మాంసం, నాటుకోడి కూర, నాటుకోడి కుర్మా, బొమ్మిడాయ కుర్మా, రొయ్య.....వండి వడ్డించారు(ట).

ఆ ఖర్చులన్నీ యెవరు భరించారు? యెన్ని కొల్లేటి పిట్టలనీ, నాటుకోళ్లనీ, బొమ్మిడాయిలనీ, రొయ్యలనీ చంపారు? వాటిలో ఆయన యెన్ని తిన్నారు? మిగిలినవన్నీ "భోంచేసిన" వాళ్లెవరు?

అసలు అంత అవసరమా?! (వొద్దని రోశయ్య అయినా, కి కు రె అయినా యెందుకు చెప్పరు?)

ఫైనల్ గా వీటివల్ల సామాన్యులకి వొరుగుతున్నది యేమిటి?

కబుర్లు - 50

2011-05-27T09:19:00.000-07:00

అవీ, ఇవీ, అన్నీ

నిన్న (25-05-2011) ఈనాడు ఇదీ సంగతి కార్టూన్ చూశారా?

తానేకాదు, తమవాళ్లందరూ "చెక్క కుర్చీల్లోనే" కూర్చుంటారు అనీ, దానితో ఓ 45 యేళ్లో యెంతో ఆ రాష్ ట్రాన్ని పరిపాలిస్తామనీ కలలు కంటోందిట మమతాదీ.

తానిన్నేళ్లూ కలలు కన్నది బుధ్ధదేవ్ కూర్చున్న ఆ కుర్చీ కోసమే అని మరిచిపోయినట్టుందీవిడ.

నందిగ్రామ్ వగైరాలతో, పర్యావరణం కోసం పోరాటం సాగించామని కూడా ఆవిడ మరిచిపోయినట్టుంది.

తమ వాళ్లకీ, ప్రభుత్వ అధికారులకీ, యంత్రాంగానికీ కొన్ని లక్షల చెక్క కుర్చీలకోసం యెన్ని చెట్లు నరుకుతారో ఇంక!

ఇంకా నయం, రైలు బద్దీలక్రింద ప్రస్తుతం వాడుతున్న కాంక్రీటు స్లీపర్ల స్థానంలో మళ్లీ "చెక్క స్లీపర్లు" వెయ్యమని పురమాయించలేదు! (యేమో....రేపు పురమాయిస్తారేమో....యెవరు చెప్పగలరు?)

వంద ఐదు రూపాయలో యెంతో వుండే ప్లాస్టిక్ కాఫీ/టీ గ్లాసుల స్థానంలో, ఒక్కోటీ రెండు మూడు రూపాయల ఖరీదు చేసే మట్టి ముంతలని ప్రవేశపెట్టిన లాలూ మళ్లీ రైలు యెక్కలేకపోయాడు.

ఒకప్పటి రైలు మంత్రీ, యేదో రాష్ ట్ర ముఖ్యమంత్రీ, కాంగ్రెస్ అధ్యక్షుడూ, కమలాపతి త్రిపాఠీ అలాగే ఓ ప్రత్యేక రైల్లో కాశీ నుంచి గంగాజలాన్ని తెప్పించుకొనేవాడుట వాళ్లింట్లో నిత్యావసరాలకోసం--కడుక్కోడాలతో సహా!

వాళ్ల చరిత్రలెంత దయనీయంగా ముగిశాయో, "తక్కువ ఙ్ఞాపక శక్తి" వున్న భారతీయ వోటర్లు మరిచిపోయినా, "పైవాడు" మరచిపోడు.

రైల్వేలని లాలూ వుధ్ధరించేస్తే, ఈవిడ సముధ్ధరించేసిందిట. ఇంక బెంగాల్ ని వుధ్ధరిస్తుందిట.

బెంగాలీ వోటరుకి కమ్యూనిస్టులకి ప్రత్యామ్నాయం వేరేదీ తోచకపోవడంతో తాను నెగ్గింది గానీ, దీదీ చమక్కులకీ, ఝలక్కులకీ వోటర్లు మురిసిపోవడం వల్ల కాదు అని ఆవిడ యెప్పుడు గ్రహిస్తుందో?

ద్రవ్యోల్బణం దారి తప్పుతోంది....ఆహారతో సహా. రేపు మళ్లీ డీజెల్ లీటరుకి ఓ నాలుగు రూపాయలూ, వంటగ్యాసు ఓ పాతిక నుంచి నలభై రూపాయలూ, కిరోసిన్ కనీసం రెండురూపాయలూ పెంచేస్తారేమో!

రిజర్వ్ బ్యాంకువారు అరకొర చర్యలు తీసుకోవడంతో సరిపెట్టకుండా ప్రభుత్వానికి ఓ రికమెండేషన్ కూడా వెలగబెట్టారుగా!

ఇంక ద్రవ్యోల్బణం నింగినంటక తప్పదేమో.

యెవరేమి చేస్తారో చూడాలి.

సాధారణంగా పిచ్చివాగుడు యెక్కువ వాగడనుకున్న జైరాం రమేష్, "ఐ ఐ టీ ల్లో చదువుతున్న విద్యార్థుల వల్లే వాటి స్థాయి నిలబడుతోందిగానీ, వాటి బోధనా సిబ్బందీ వగైరాల ప్రమాణాల వల్లకాదు" అంటున్నాడు.

దాని భావమేమో?

తితిదే వారు 23 వేలకి పైగా ఆర్జిత సేవా టిక్కెట్లని రద్దుచేశారట. ఇవన్నీ కొన్ని సంవత్సరాలపాటు కొంతమందే రిజర్వు చేసుకున్నవిట.

"ఉదయాస్తమన సేవ" అనేదోటి 2006 లో ప్రారంభించారట. పదిలక్షలు చెల్లిస్తే, ఐదుగురు గృహస్తులకు సుప్రభాత సేవనుంచీ, యేకాంత సేవ వరకూ మధ్యలో అన్ని సేవల్లో పాల్గొనే అవకాశం ఇచ్చేవారట. ఈ టిక్కెట్లు శని, ఆది, సోమ వారాల్లో మాత్రమే, నగదు చెల్లించిన వారికేనట. ఇప్పుడు ఆ సేవా టిక్కెట్ల జారీని రద్దు చేశారట.

బాగానే వుంది. ఈనాడు వారు ఈ "తాజా నిర్ణయం వల్ల భక్తులు ఆవేదన చెందుతున్నారు" అంటున్నారు! (అంత గొప్ప భక్తులెందరిని చూశారో మరి!)

కబుర్లు - 49

2011-05-26T00:06:00.000-07:00

అవీ, ఇవీ, అన్నీ

ఇదివరకోసారి సణిగానో, వ్రాశానో--ఆ రోజు తిరుపతిలో తన పార్టీ పేరు "ప్రజా రాజ్యం" అని ప్రకటించాక, "అభిమానులారా! కదలండి! రాష్ ట్రం దశదిశలా కుళ్లు రాజకీయాలకి వ్యతిరేకంగా పోరాడండి. అవినీతి యెక్కడ వున్నా టాగోరో/స్టాలినో లెవెల్లో విజృంభించండి! మీరు చెయ్యవలసింది నా ఫలనా "టొల్ ఫ్రీ" నెంబరుకి ఫోను కొట్టడమే! తరవాత సంగతి నేను చూసుకొంటాను. అవసరమైతే "లోక్ సత్తా" కార్యకర్తల సహకారం తీసుకోండి!" అని ఓ పిలుపు ఇస్తే, ఇప్పుడు వై యెస్ ఆర్; జగన్; రోశయ్య; కి కు రె--లాంటి బెడదలు మనకి లేకపోవును!

రాష్ ట్రం కొన్ని వేల కోట్లు నష్టపోకుండా వుండును!

అది జరగలేదు. సరే! చిరంజీవి అప్పటి నుంచీ దిగజారుకుంటూ వస్తూ, చివరికి అవినీతిపుట్ట అయిన కాంగీలో చేరి, తగుదునమ్మా అంటూ బెంగాల్, తమిళనాడులకి ప్రచారం కోసం వెళ్లాడు! అంటే, 2జీ నీ, రాజానీ, కరుణనీ, కనిమొళినీ వగైరాలని సమర్థించినట్టేకదా? మనకి నిరాశ కాకుండా యేమి మిగిలింది?

మొన్నీ మధ్య లోక్ సత్తా జేపీ కూడా అదే అన్నాడు--

"ప్రజాస్వామ్యంలో పార్టీలు పుట్టడం, పోవడం సహజమేకానీ, ప్రరాపాను కాంగ్రెస్ లో విలీనం చేసిన తీరు మాత్రం లక్షలాది మందికి వేదనా, నిరాశా మిగిల్చింది. మఖలో పుట్టి పుబ్బలో పోయే ఇలాంటి పార్టీలతో కొత్త రాజకీయం చేయడమంటే కుక్కతోక పట్టుకొని గోదావరి ఈదినట్టే"

.....అని!

* * *

వైద్య ఆరోగ్య శాఖా మంత్రి డీ ఎల్ రవీంద్రారెడ్డి, పోలవరం ప్రాజెక్ట్ పై తాను అడిగే ప్రశ్నలకి (అసలు) సమాధానం (అంటూ) చెపితే, ఆయన (జగన్) కి ముఖ్యమంత్రి పదవి ఇస్తాను....అన్నారు మొన్నెప్పుడో!

"పోలవరం ప్రాజెక్ట్ యే నది మీద కడుతున్నారు? యెక్కడ నిర్మించనున్నారు? పునాది యెవరు యెక్కడవేశారు? స్వతంత్ర భారతదేశంలోనా? బ్రిటిష్ హయాంలోనా? ప్రాజెక్టు సామర్ధ్యం యెన్ని టీఎంసీలూ? విద్యుత్తు వుత్పాదన యెంత? కుడి, యెడమ కాలువలద్వారా యెవరు లబ్ధి పొందుతారు?" అనే ప్రశ్నలు సంధించారు ఆయన!

పదోతరగతి కుర్రాడు సైతం జవాబివ్వగల పై ప్రశ్నలకి, జగన్ 5 లక్షల 45 వేలకిపైగా మెజార్టీతో జవాబిచ్చాడు చాలదా?

* * *

నిన్నో మొన్నో (26-05-2011) "జగన్ విజయవాడలో పోటీ చేస్తే, మా దేవినేని ఉమ 5 లక్షలకి పైగా మెజారిటీతో ఆయన్ని వోడిస్తాడు" అన్నాడో రా నా. (కడపలో వాళ్లే కోట్లు తినాలా? విజయవాడ వాళ్లకి ఆ భాగ్యం యెందుకు కల్పించకూడదు? అని ఆయన వుద్దేశ్యం అయివుంటుంది! యెలాగూ జగనే నెగ్గుతాడని వాడికీ తెలుసు మరి!)

* * *

"నాకు చిర్రెత్తుకొచ్చిందంటే, నా .....వందలకోట్ల ఆస్థినీ అనాధ శరణాలయాలకి రాసేస్తానంతే!" అని బెదిరించాడట వెనకటికోడు తన '......' మంది కొడుకులూ, కూతుళ్లనీ!

తి తి దే రద్దవడంతో, సాధికార మండలి వారు, తమ అధీనం క్రింద వున్న ఆలయాలనన్నింటినీ (తిరుమల తిరుపతి వెంకన్నతో సహా) "పురావస్తు శాఖ" వారికి అప్పగించేస్తామని "తీర్మానమే" చేసేశారు ఇదివరకోసారి!

మొన్న నాలిక్కరుచుకొని, ఆ తీర్మానాన్ని వుపసం హరించుకొన్నారు!

అలా అప్పగిస్తే యేమయి వుండేది?

కబుర్లు - 48

2011-05-24T09:39:00.000-07:00

అవీ, ఇవీ, అన్నీ

"ద్వారకా తిరుమలలో......పులిహోరలో బల్లి!" ఓ సంచలన వార్తా, దానిమీద భక్తుల ఆందోళనా, కొన్ని వేల పొట్లాల భూస్థాపితం!

డాక్టర్లు ఆ పులిహోర తిన్నవాళ్లని పరీక్షించారు.....యెవరూ మరణించలేదు.... యెవరికీ అనారోగ్యం కూడా కలగలేదు!

ఐదు దశాబ్దాలుగా హేతువాదులూ, డాక్టర్ సమరం లాంటివాళ్లూ మొత్తుకొంటున్నది "బల్లి విష జంతువు కాదు. అది వుడుకుతున్న యే పదార్థంలో పడినా, ఆ పదార్థం విషపూరితం కాదు. యెక్కువలో యెక్కువగా దాని చర్మం మీద యేమైనా సూక్ష్మజీవులుంటే, అవి ఆ పదార్థంలో చేరవచ్చు. అయినా, వుడుకుతున్నప్పుడు ఆ సూక్ష్మజీవులుకూడా నశిస్తాయి.

కానీ....శాకాహారులకైనా, అలాంటి జంతువులని తినడం అలవాటులేని మాంసాహారులకైనా, సహజంగా వికారం/వెలపరం కలగడం వల్ల వాంతులు రావచ్చు. ఒక్కోసారి, డిహైడ్రేషన్ వల్ల మరణం సంభవించవచ్చు. అదే కప్పలనీ, పాములనీ, మిడతలనీ, చివరికి తీపి పదార్థం మీద పాకుతున్న నల్ల కండ చీమలతో సహా ఆ పదార్థాన్ని నమిలి చప్పరించే చీనా, కొరియా వాళ్ల లాంటివాళ్లకి అదో 'సర్ ప్రైజ్ గిఫ్ట్' లాంటిది......" అని!

యెవరో అన్నారట, ఇది యెవరో కావాలని చేసిందే అని.

శభాష్! వాడేవడో కనిపెట్టండి. వాణ్ని తిరుమల యాత్రచేయించి, శ్రీవారి దర్శనం తరవాత, శేషాద్రి కొండమీదనుంచి లోయలో తోసేసే శిక్ష విధించండి.

(తరవాత జన్మలో బల్లి అయి పుడతాడేమో!)

అందరూ సంతోషిస్తారు.

కబుర్లు - 47

2011-05-21T12:12:00.000-07:00

అవీ, ఇవీ, అన్నీ

యెలక్షన్లయిపోగానే, పెట్రోలు రేటు పెంచేశారు. డీజల్, గ్యాస్ ధరలు కూడా ఇబ్బడి ముబ్బడిగా పెంచేస్తారట.

అనేకమంది కాలమిష్టులూ, ఆర్థిక నిపుణులూ, నాలాంటివాళ్లూ, ఈ ఆయిల్ కంపెనీలు "రావలసిన లాభాలని రాకపోవడంతో" నష్టాలుగా చూపిస్తున్నాయనీ, ప్రభుత్వ సబ్సిడీ కేవలం వెంట్రుక శాతమేననీ, కేంద్ర, రాష్ట్ర ప్రభుత్వాలు మరింతగా "లాభాలు" పిండుకోడానికే ఈ "బీదార్పులు" అనీ మొత్తుకొంటున్నారు.మీడియావారెవరైనా వాళ్ల "ఆడిటర్ల"నుంచి సమాచారం సేకరిస్తే, "సత్యం ఆడిటర్ల"కి మించిన కుంభకోణాలు బయటికొస్తాయేమో ప్రయత్నించవచ్చుకదా?!

2జీకి మించిన కుంభకోణం మన విమానయానం లో జరిగిందనీ, మంత్రి ప్రఫుల్ పటేల్ దానికి బాధ్యుడనీ నిప్పురాజుకొంది. నిజానికి నాలాంటివాళ్లు మొత్తుకొంటూనే వున్నాము--మన దేశానికి అన్ని "ప్రైవేటు" విమానయాన సంస్థలూ, వాళ్ల విమానాలనబడే "డబ్బాలూ" అవసరమా అని.

మన "డొమెస్టిక్" ఇండియన్ ఎయిర్ లైన్స్ నీ, "ఇంటర్నేషనల్" ఎయిరిండియానీ యెందుకు కలిపెయ్యవలసి వచ్చింది? మేకపోతు గాంభీర్యం ప్రదర్శించి, పైలెట్ల సంఘాలని గుర్తింపు రద్దుచేసి, మీ వుద్యోగాలు తొలగిస్తాం అని బెదిరించి, పిచ్చిపిచ్చి చేష్టలు చేసి, చివరికి వాళ్లకి "దాసోహం" అని, గుర్తింపు పునరుధ్ధరణ నుంచీ వాళ్ల డిమాండ్లు అన్నీ వొప్పుకొని, సమ్మె విరమింపచెయ్యవలసిన అవసరం యెవరికి యెందుకు వచ్చింది? ప్రఫుల్ పాత్ర యేమిటి?

ఎయిర్ పోర్టుల దగ్గరనించీ మన మౌలిక సదుపాయాల గురించి పట్టించుకోకుండా, మన ఎయిర్ ట్రాఫిక్ కంట్రోల్ టవర్ల, వాటి సిబ్బందీ, నైపుణ్యాలని పెంచుకోకుండా, "జెట్"; "స్పైస్ జెట్"; "కింగ్ ఫిషర్" లాంటి సంస్థలకి యెందుకు అనుమతి ఇచ్చారు?

హెలికాప్టర్ల దగ్గరనించీ నిపుణులైన పైలెట్లు, వారికి కావలసిన సమాచారం యెందుకు అందుబాటులో వుండటం లేదు? ఓ రాజశేఖర రెడ్డి, ఓ దోర్జీ, యెందుకు ప్రమాదాలబారినపడి అశువులు కోల్పోవలసి వచ్చింది?

1962 లో చైనా యుధ్ధం సమయంలో మనకి రష్యా వారిచ్చిన "మిగ్" "గ్నాట్" విమానాలనే పైలెట్ల శిక్షణకి యెందుకు వుపయోగిస్తున్నారు? అవి "ఈగల్లా" యెందుకు రాలిపోతున్నాయి? పైలెట్లు యెందుకు మరణిస్తున్నారు?

ఓ ప్రక్క "సుఖోయ్"లూ, ఇంకో ప్రక్క "బోయింగ్ 737"లూ ప్రవేశించినా, ఇంకా మన "డబ్బా" విమానాలనే యెందుకు వాడుతున్నారు? అవి తరచూ యెందుకు మొరాయిస్తున్నాయి?

ఇలాంటి ప్రశ్నలకి జవాబులు మన మీడియా వాళ్లే కనుక్కోవాలి.

ప్రఫుల్ పటేల్ ని నిలదీయండి.....కనిమొళి ప్రక్క సెల్ లోనే వాడినీ కూర్చోపెట్టండి!

అప్పుడైనా విమానప్రయాణీకులకి భద్రత వుంటుందేమో.

మన రాష్ట్రంలో రైతన్నలకి కష్టాలు తీరడం లేదు. ఇబ్బడిముబ్బడిగా ధాన్యం పండించినా, గిట్టుబాటు ధరలు చెల్లించేవాళ్లు లేరట. గోనె సంచులు లేవట. యంత్రాలు వాడటంవల్ల, తేమశాతం పెరిగిపోతోందట.

మళ్లీ ఆ యంత్రాల్లో "సరిగ్గా" 100 గ్రాముల వడ్లు వేస్తేనే సరైన తేమశాతం చూపిస్తాయట. ఇంకొన్ని వడ్లు యెక్కువ వేసినా, తేమశాతం పెరిగిపోతుందట! దిక్కుమాలిన యెలక్ట్రానిక్కూ, డిజిటల్లూ పిశాచాలు మనకెందుకంటారు?

సరే బాగానే వుంది. కానీ, మన ప్రభుత్వాలు, సుప్రీం కోర్టు "పేదలకి వుచితంగా పంచండి" అన్నా, "ఠాట్! వీల్లేదు! యెలకలకీ, పందికొక్కులకీ పెడతాం; ఇంకా ముక్కిపోతే సముద్రంలో పారబోస్తాం" అంటున్నాయి.

మరి మీ దరిద్రగొట్టు నిరసనలేమిట్రాబాబూ! ధాన్యాన్ని "మంటల్లో" పోస్తారా? కృష్ణలో "నిమజ్జనం" చేస్తారా! "ప్రభుత్వా"లకీ మీకూ తేడా యేమి వుంది? అన్నదాత యెపుడూ అన్నదాతే కావాలిగానీ, అన్న "హోత" (హోమం చేసేవాడు) అవకూడదు. బుధ్ధి తెచ్చుకోండి. టమాటాలు కాలనీల్లో, కిలో అర్థరూపాయికి అమ్మారు కొందరు రైతులు. ఇంకా మిగిలితే, పశువులకి మేపారు......అంతేగానీ అగ్నికి ఆహుతి చెయ్యలేదు. వాళ్లని చూసి నేర్వండి.

కోర్టుల పుణ్యమా అని, నిర్బంధ బందులూ, హర్తాళ్లూ తగ్గాయి కానీ, ఇప్పుడు అనవసర "రాస్తా"; "రైల్" రోకోలు! వీటికి అంతం యెప్పుడో?!

మీ శరీరంలో "జీవప్రక్రియ" రెండురోజులో, రెండుగంటలో అఖ్ఖర్లేదు--రెండు నిమిషాలపాటు ఆగిపోతే--సంభవించేదాన్ని "మరణం" అంటారు.

మరి ప్రజల జీవనాడులైన రాస్తాలనీ, రైళ్లనీ కొన్ని గంటలపాటు "రోకో" చేస్తే, జనజీవనం యెలా అస్థవ్యస్థమౌతుందో, యెన్ని మరణాలూ, జీవప్రక్రియ స్థంభనలూ సంభవిస్తాయో యెవరైనా ఆలోచించారా?

హై, సుప్రీం కోర్టులూ--ఇలాంటి వ్రాతలని "పిల్లులు" (అంటే మాత్రలూ, మార్జాలాలూ కాదు) గా స్వీకరిస్తే యెంతబాగుండును?

సర్వే జనాస్సుఖినో భవంతు!

కబుర్లు - 46

2011-05-11T10:48:00.000-07:00

అవీ, ఇవీ, అన్నీ

అయోధ్య కేసు లో సుప్రీం కోర్టుకెళతామన్న పార్టీలన్నీ అలాగే వెళ్లాయి. నిన్న విచారణ ప్రారంభమయింది.

న్యాయవాదులందరూ తమ తమ కక్షిదారుల తరఫున "ప్రిలిమినరీ" వాదనలు వినిపించారు అన్ని కేసుల్లాగే.

కానీ విశేషమేమిటంటే, అత్యున్నత న్యాయస్థానం వారు "అయితే ఆ తీర్పు మీ యెవరికీ నచ్చలేదా?" అని అడిగి, అందరూ "లేదు" అనగానే, "హమ్మయ్య! ఈ వొక్క విషయంలోనైనా మీ మధ్య 'యేకాభిప్రాయం ' వుందన్నమాట" అని జోకారట!

పైగా, "యెవరూ అడగకపోయినా, ఆ స్థలం విభజించాలని అలహాబాదు ధర్మాసనం తీర్పివ్వడమేమిటి?" అంటూ ఆ స్థలం విషయంలోనే కాకుండా, ఆ చుట్టుప్రక్కల ప్రభుత్వం సేకరించిన అరవైనాలుగో యెన్నో యెకరాల విషయం లో కూడా "యథాతథ స్థితి కొనసాగాలని" స్టే మంజూరు చేసిందట--యెవరూ అడగకపోయినా!

యేమైనా అర్థం వుందా?

అందరికీ తీర్పు నచ్చితే, అంత ఖర్చుపెట్టుకొని పై కోర్టుకి యెందుకు వెళతారు? ఒక ముక్కని అంతా తమకే కావాలని దెబ్బలాడుకొంటూంటే, దాని విభజన తప్ప ఇంకేమి పరిష్కారం వుంది? దాని(విభజన)కోసం యెవరు అడుగుతారు?

యెవరి పట్టు వారిది కాబట్టి "రాజీ" మార్గం గా విభజనే బెస్ట్. ఆ మాత్రం తెలీదా అత్యున్నత న్యాయ స్థానం వారికి?

వాళ్ల వుద్దేశ్యం......వివాదం ఇంకో వందో, వెయ్యో యేళ్లు కొనసాగుతూ, "ప్రభుత్వాలకి" తలనొప్పిగా వుంటేనే, అనేకతరాల "న్యాయ" వుద్యోగులూ, వాదులూ, మూర్తులూ కాలుమీద కాలేసుకొని, తమ తరవాత తరాలకి అనుభవించడానికి సరిపడా సంపాదించచ్చు అనా?

సేకరించిన భూమి సంగతి ప్రభుత్వం చూసుకొంటుంది. దాని సంగతి మీకెందుకు?

ఒక్క విషయం మరిచిపోకండి! కక్షిదారుల సంగతెలా వున్నా, సామాన్య ప్రజలందరూ అలహాబాదు న్యాయస్థానం తీర్పుని హర్షాతిరేకంతో స్వాగతించారనీ, ఒక నిట్టూర్పు విడిచారనీ!

లేకపోతే, యెవరికీ పుట్టగతులుండవు.

నిన్న (10-05-2011) రాత్రి యేదో న్యూస్ ఛానెల్ చూస్తూండగా ఓ వార్త చివరి ముక్క విన్నాను ".....తి తి దే వారు ఆ పథకాన్ని అమలు చెయ్యబోమనీ, ఆ విషయంలో నిర్ణయం జరిగిపోయింది అనీ....." న్యాయ స్థానానికి నివేదించారనీ!

నాకు అనుమానం వచ్చేసింది.....ఇంతలోకే యెవరైనా "కదిలే తివాచీ" మీద "పిల్" వేసేశారా.....అదప్పుడే విచారణకి వచ్చిందా, న్యాయమూర్తులు సో కాల్డ్ "ఆగమ పండిత పక్షపాతులా?"......ఇలా!

నిద్రపోయేలోపు మిగిలిన ఛానెళ్లలో ప్రయత్నించానుగానీ, ఆ ప్రస్తావన లేదు.

ప్రొద్దున పేపర్లో చూద్దును కదా....విషయం ఆదికేశవుడి "అనంద.....అనంత....మయం" పథకమట!

ఇప్పటివరకూ దాతలు ఇచ్చిన కొన్ని లక్షలో, కోట్లో డబ్బునీ, కొన్ని కిలోల బంగారాన్నీ వాళ్లకే తిరిగి ఇచ్చేస్తామనీ, వాళ్లు వాటిని వేరే పథకాలకి వుపయోగించుకోమంటే అలాగే చేస్తామనీ హామీ యిచ్చారట.

వాళ్ల నిర్ణయం చాలా బాగుంది. కానీ, ఆ పేరుతో ఇంకెంతో దండుకున్న వాళ్ల మాటేమిటి? దానిమీద దర్యాప్తులూ, శిక్షలూ మాటేమిటి?

మన్మోహన్లా వాళ్లపదవులు పోయాయికదా, అదే పెద్ద శిక్ష వాళ్లకి అంటారేమో!

భక్తులు వత్తిడి తేవలసిన అవసరం లేదూ? ఆలోచించండి!

అన్నట్టు, అజిత్ భరిహోకె అనే పేరు గుర్తుందా? ఇదివరకూ తరచూ వినిపించేది అనేక సంచలన కేసుల్లో....ఓ ప్రత్యేక న్యాయస్థానం న్యాయ మూర్తిగా! నాకు గుర్తు రావడం లేదుగానీ అవన్నీ చాలా ముఖ్యమైన కేసులు.

ఇప్పుడు మళ్లీ ఆయన పేరు వినిపిస్తూంది--ఇంకొన్ని కేసుల్లో--ఢిల్లీ హైకోర్టో, సుప్రీం కోర్టో.....న్యాయమూర్తిగా!

కబుర్లు - 45

2011-05-07T09:42:00.000-07:00

అవీ, ఇవీ, అన్నీ

"సేవ వలన మనకు చేకూరు ఆనంద
మదియె శాంతి సుఖములంది యిచ్చు
శాంతికన్న మిన్న సౌఖ్యంబు లేదయా
ఉన్నమాట తెలుపుచున్న మాట

స్వర్గమనగ వేరు సురలోకమున లేదు
నరుల లోకమందె యమరియుండు
తనదు లోని అహము తా చంపుకొన్న
అది స్వర్గమగును అవనియందు

కష్టసుఖముల నొకరీతి గాంచవలయు
కలిమిలేములు విడదీసి గడువరాదు
కీర్తి అపకీర్తులను నొక మూర్తిగానె
భావమందుంచి మెలగుటే భక్తి పథము"

ఇదేమిటి?

సత్యసాయి ఆశువుగా చెప్పిన కవితలలో ఒకటిగా చెప్పబడుతున్నది. నాకు బాగా నచ్చింది.

"వేకువజాము :

3 గంటలకి దిన చర్య ప్రారంభం. 6 గంటలవరకూ ఓంకార స్మరణ

ఉదయం :

6.00: భక్తుల ఉత్తరాల పరిశీలన, 7.00: అల్పాహారం; 8.00: భక్తులకు ప్రత్యేక దర్శనం; 9.00: భజన కార్యక్రమంలో పాల్గొంటారు; 9.30: విశ్రాంతి. (భోజనం మరి?)

మధ్యాహ్నం :

3.00: భక్తులకి దర్శనం; 3.30: ప్రముఖులతో భేటీ(?!).

సాయంత్రం :

5.00: ప్రశాంతి నిలయంలో నిర్వహించే భజనలో పాల్గొంటారు.

5.30: యజుర్వేద మందిరానికి వెళతారు; 7.00: భోజనం; 7.30: ట్రస్టు వ్యవహారాలను రాత్రి 9 గంటలవరకూ చూస్తారు.

(తర్వాత?! యజుర్వేద మందిరంలో రెండో అంతస్తులో వున్న తన యేసీ శయన మందిరానికి చేరి, వాటర్ బెడ్ పై నిద్రిస్తారు....యేదో సంగీతాన్ని వింటూ!--అని యెక్కడో చదివిన గుర్తు)

ఇదేమిటీ?

సత్యసాయి దినచర్యగా చెప్పబడినది!

* * *

అయ్యప్ప మకర జ్యోతి గుంటకట్టి, గంట వాయించేసింది. అది "కృత్రిమమే" అని దేవస్వోం బోర్డు పెద్ద కోర్టుకి తెలిపింది.

కొన్ని సంవత్సరాలుగా గిరిజనులు అక్కడ మంటలు వేసేవారనీ, తరవాత అక్కడో తిన్నె నిర్మించి, దానిమీద కొన్ని కేజీల హారతి కర్పూరం వెలిగించడం ద్వారా, దేవస్వోం వారు మకర జ్యోతిని వెలిగిస్తున్నారు అనీ, బోర్డు వారు వొప్పుకున్నారు.

అంతే కాకుండా, "ఆ సమయంలో" ఆకాశంలో 'పొడిచే' నక్షత్రమే 'అసలు మకర జ్యోతి ' అని కూడా వొప్పుకున్నారు.

ఆ సో కాల్డ్ జ్యోతి కోసం వెళుతూనో, తిరిగి వస్తూనో, టాటా సుమోల్లోనో, ప్రత్యేక వాహనాల్లోనో, తొక్కిసలాటల్లోనో, లాఠీ ఛార్జీల్లోనో, గాయపడిన, మరణించిన వాళ్లకి యెవరు జవాబుదారీ?

ఆ బోర్డు వాళ్లకి వేలల్లో యేమైనా విదిల్చిందేమో. కానీ, వాళ్లు దండుకొనే దాన్లో వీళ్లకి ఇచ్చిందెంత శాతం?

* * *

దేశంలోనే తొలిసారిగా హైదరాబాదులోని సనత్ నగర్లో ఈఎస్ ఐసీ సూపర్ స్పెషాలిటీ ఆసుపత్రిని నిర్మించారు. (ఈ ఎస్ ఐ అంటే ఎంప్లాయీస్ స్టేట్ ఇన్సూరెన్స్--ప్రభుత్వోద్యోగులకి సెలవు కావలసి వస్తే, మెడికల్ సర్టిఫికెట్లు జారీ చెయ్యడానికి మాత్రమే వుపయోగపడే సంస్థ!) రూ.129.87 కోట్ల నిధులు, 126 పడకల సామర్ధ్యంతో యేర్పాటు చేశారు. (అంటే పడక్కో కోటి పైగా!)

ఇంకా చాలా వార్తుంది......కానీ, ప్రభుత్వ సొమ్ము పడకల పాలేనా?!

మీరే చెప్పాలి.....బిల్డింగుకెంతయ్యిందో, పడకలకీ వగైరాలకీ యెంతయ్యిందో, కావలసిన డాక్టర్లూ, ఎక్విప్ మెంటూ, ఆపరేషన్ థియేటర్లూ, సామాగ్రీ, యేసీలూ గట్రాలు "ఆ కోటిలోకి" వస్తాయో--అవన్నీ ఎక్స్ ట్రాలో--లాంటి ప్రశ్నలకి జవాబులు.

కబుర్లు - 44

2011-05-05T00:51:00.000-07:00

అవీ, ఇవీ, అన్నీ

నేను ఇదివరకు వ్రాసిన ఓ టపాలో వెలిబుచ్చిన భావాలనే ప్రకటిస్తూ, ఎస్ ఎస్ తారాపోర్ (రిజర్వు బ్యాంక్ మాజీ డిప్యూటీ గవర్నరు) ఈనాడులో తన "డిపాజిటర్లతో సయ్యాటలా" అనే శీర్షికతో, 25-04-2011 న ఓ వ్యాసం వ్రాశాడు. చదవకపోతే, ఇప్పుడైనా చదవండి.

ఇంక రిజర్వ్ బ్యాంక్, అత్యంత ధైర్యంతో, ద్రవ్యోల్బణానికి అడ్డుకట్ట వేసే వుద్దేశ్యంతో, రెపో/రివర్స్ రెపో రేట్లని "యేకంగా" (తుమ్మల కిషోర్ "అంచనాలకు" మించి) అర శాతం పెంచేసింది! సీ ఆర్ ఆర్ ని ముట్టుకో లేదు. బాగానే వుంది.

కానీ, "పెట్రో" ధరలు తక్షణమే పెంచాలని సూచించడం యేమిటి?

ఇన్నాళ్లూ మురళీ దేవరా ఆ రేట్లు పెంచాలని ప్రభుత్వానికి లేఖలు వ్రాయడం, మన్మోహన్, మోంటేక్ లు "ఇప్పుడే వద్దు" అనడం, జైపాల్ రెడ్డి కూడా "సమీప భవిష్యత్తు లో పెరగవు" అని హామీలివ్వడం ఇలా జరుగుతూ వస్తోంది.

ఈ విషయం ఆర్బీఐ కి యేమి సంబంధం? ఇదివరకు యెప్పుడూ అలాంటి సలహాలు వాళ్లివ్వలేదే? దువ్వూరివారే యెందుకు ఇచ్చారు? శంఖంలో నీళ్లు పొయ్యమని ఆయనకి యెవరు చెప్పారు?

అలా పెంచకపోతే, ద్రవ్యలోటు రూ.లక్షా యెనభై వేల కోట్లు పెరిగిపోతుందట! ఇంతాజేసి ఓ 2జీ స్కామంతే కదా?! ఆ డబ్బుని ఆ వెధవల దగ్గర వసూలు చేసి, దాంతో "ఆయిల్ పూల్" యేర్పాటు చెయ్యమని యెందుకు "రికమెండ్" చెయ్యరు దువ్వూరివారు? జనాలు లోకువా!

(ద్రవ్యలోటూ, వృధ్ధిరేటూ ప్రభుత్వ తలనొప్పులు. అవి మీకెందుకు? ఇప్పటికీ ద్రవ్యలోటుకి సరిపడా కొత్త కరెన్సీ ప్రింటు చేసి విడుదల చేస్తూనే వున్నారుగా? ఇంకా "డీ మోనెటైజేషన్" కి సంకేతాలు ఇచ్చినట్టు కాదూ?)

(డీ మోనెటైజేషన్ గురించి మరో టపా వ్రాస్తాను త్వరలో).

క్రితంసారి పెంచిన ధరలకే మన చికెన్నారాయణా, నిత్యసంతోషి రాఘవులూ, కిషన్ రెడ్డీ, చంద్రబాబూ అడపాదడపా ఆందోళనలు చేసి, అంతకన్నా "ముఖ్యమైన" విషయాల్లోకి వెళ్లిపోయారు. మరి ఇవాళో రేపో అర్థరాత్రి నుంచీ ఈ రేట్లు "విపరీతంగా" పెరిగితే, అందోళనలు చెయ్యడానికి వీరికి వోపిక వుంటుందా? యేమో!

ప్రస్తుత ప్రజాస్వామ్యంలో ప్రజలు వీఐపీలు కాదు--వీపీలు (వట్టి పిచ్చాళ్లు!).

మన రాజశేఖర రెడ్డి బాటలోనే, అరుణాచల్ ముఖ్యమంత్రి ఖండు దోర్జీ (ఇదివరకు పత్రికలు ఆయన పేరుని "ఖాండుప్ దోర్జీ" అని వ్రాశేవారనుకుంటా) పైలోకాలకి వెళ్లిపోయిన కొన్ని రోజుల తరవాత ఆ వార్తని ధృవీకరించాయి ప్రభుత్వాలు.

మన చిరంజీవి సైతం నిన్న (04-05-2011) న తను ప్రయాణం చేస్తున్న హెలికాప్టర్ తో సహా దాదాపు ఓ గంటపాటు "మాయం" అయిపోయాడట బెం"గాల్లో"!

బాబూ! బ్రతికుంటే బలుసాకు తినొచ్చు. ఇదివరకోసారి పొలాల్లో దిగిపోయావు అని మరచిపోతే యెలా?

నువ్వు పొత్తు కలుపుకొన్న కి.కు.రె. హెలికాప్టర్లే కాదు, విమానాలు కూడా యెక్కడానికి భయపడుతుంటే, తగుదునమ్మా అని ఇలా చెయ్యడం మనకి అంత "అవసరమా?" అహ.....అవసరమా అని?

బీహార్ తరహా చట్టాలు తేవాలి అంటున్నాడు అసదుద్దీన్--హింసకి వ్యతిరేకంగా! తనదాకా వస్తే.......అని అక్బరుద్దీన్ చెప్పాడు మరి!

కబుర్లు - 43

2011-05-02T09:48:00.000-07:00

అవీ, ఇవీ, అన్నీ

ఇదివరకోసారి సణిగాననుకుంటా--పోస్టల్ వాళ్లు ఇచ్చే "నివాస ధృవీకరణ" కార్డుల గురించి.

ఇవి క్రితం నెలలోనే అందుబాటులోకి వచ్చేశాయట. రూ.225/- చెల్లించి, సంబంధిత ఆధారాలతో దరఖాస్తు చేస్తే, 10-15 రోజుల్లో ఈ కార్డు ఇచ్చేస్తారట. 3 సంవత్సరాల తరవాత దాన్ని రెన్యువల్ చేయించుకోవాలట. (ఈలోపల చిరునామా మారితే, కొత్త కార్డు తీసుకోవాలని చెప్పఖ్ఖర్లేదు కదా).

ఈ కార్డులు బ్యాంకుల్లోనూ, పోస్టాఫీసుల్లోనూ ఖాతాలు తెరవడానికీ, డ్రైవింగ్ లైసెన్సులు పొందడానికి, విదేశాలకి వెళ్లే సందర్భంలో పాస్ పోర్ట్ పొందడానికి, దూర ప్రాంతాలకీ, తీర్థయాత్రలకీ వెళ్లే వ్యక్తుల ఆచూకీ తెలుసుకోడానికీ--ఇలా అనేకవిధాలుగా వుపయోగిస్తాయట.

మొన్న అన్నాహజారే అహింసామార్గంలో లక్ష్యసిధ్ధి జరగకపోతే, శివాజీ మార్గం అవలంబించ వలసి వస్తుంది అన్నందుకూ, అంతకన్నా యెక్కువగా నరేంద్ర మోడీ బాగా పాలిస్తున్నాడు అన్నందుకూ అనేక విధాలుగా వాపోయినవాళ్లలో ఓ సీనియర్ మోస్ట్ జర్నలిస్ట్ కూడా వున్నాడు.

ఆయన చెప్పిన వాటిలో "పి చిదంబరం, కపిల్ సిబల్ మరీ అతిగా వ్యవహరిస్తున్నారు. వారి దూకుడుకు ప్రథానమంత్రి ముకుతాడు వేయాలి" అనడం నాకు నచ్చింది.

కానీ, రాజ్యాంగబధ్ధంగా యేర్పడిన "పీ యే సీ" లో సభ్యులు తిరగబడేలా చేసింది మన్మోహనా? సోనియానా? లేక ఇంకెవరైనా తమిళ కోటరీవాళ్లా?

వాళ్లని సమర్థిస్తూ టీవీలకెక్కుతున్న వుండవల్లి అరుణకుమార్లవి నాలుకలా తాటిపట్టెలా?

ఇలాంటివాళ్లకి బుధ్ధి చెప్పడానికి శివాజీ మార్గమైనా సరిపోతుందా?

ఇవన్నీ శేష ప్రశ్నలు.

ఈనాడు వారు "ఒడుదొడుకులు" అని వ్రాస్తున్నారు. నేననుకునేది అది "ఒడిదుడుకులు" అని. తల్లి వొడిలోని పసివాడు దుడుకుగా క్రిందకి జారడానికి ప్రయత్నించడం ఆ తల్లికి ఒడిదుడుకు కాబట్టి. మన తెలుగు బ్లాగర్లేమంటారో?

ఆమధ్య, "కుదుపుల్లేని" దురంతో రైలు పెట్టెలొస్తున్నాయన్నారు. స్వీడన్ నించి దిగుమతి చేసుకున్న "టైట్ లాక్ కపులర్ల"తో అనుసంధానించే పెట్టెలతో ఆ రైలు నడుస్తుందన్నారు. ఆ రైలు ముంబాయి, సికింద్రాబాద్ ల మధ్య నడుపుతారని కూడా అన్నారు.

మరి ఆ దురంతోలు యేమయ్యాయో?

ఆత్మ.....

2011-05-02T01:24:00.000-07:00

.....శాంతి

ఒసామా బిన్ లాడెన్ "చచ్చాట్ట"!

తెలుగు బ్లాగర్లూ......"మిష్టర్! షో రెస్పెక్ట్ టు ది డిపార్టెడ్ సోల్!" అంటారా?

"మే హిజ్ సోల్ రెస్ట్ ఇన్ పీస్" అంటారా?

నేనుమాత్రం వాడి ఆత్మ పాతాళం కన్నా క్రింద ఇంకో లోకమేదైనా వుంటే దాంట్లో శాశ్వతంగా పడివుండి, రౌరవాది నరకాలూ శాశ్వతంగా అనుభవిస్తూ వుండాలి అని కోరుకొంటాను.

నా బ్లాగుమాత్రం శాశ్వతం! (నేనున్నంతవరకూ!)

వాకే???!!!

కబుర్లు - 42

2011-04-29T10:23:00.000-07:00

అవీ, ఇవీ, అన్నీ

మొన్న "గుడ్ ఫ్రైడే" తో, శనివారం సెలవుపెట్టుకుంటే 3 రోజుల లాంగ్ వీకెండ్ కి ప్రణాళిక వేసుకున్న ముగ్గురో యెందరో ప్రభుత్వ వైద్యులు అక్కడెక్కడో గురువారం నాడు యేకంగా 21 మందికి సిజేరియన్ ఆపరేషన్లు చేసేశారట. ఆ గర్భిణుల్లో సోమవారం పురుడు వచ్చే అవకాశం వున్నవాళ్లు కూడా వున్నారట. ప్రైవేటు ఆసుపత్రుల్లో సిజేరియన్లకి పాతికవేలదాకా పుచ్చుకుంటున్నారనుకుంటా. మరి అంత ఖర్చులేకుండా వుచితంగా చేసినందుకు యెవరూ సంతోషించలేదట. పైగా ఆ వైద్యులని సస్పెండు చేశారట! (వాళ్లుకూడా డబ్బులు నొక్కేసే ఆపరేషన్లు చేసి వుంటారంటారా?! యేమో. తెలీదు.)

"విత్తు కొద్దీ పంట" అనీ, "పిండికొద్దీ రొట్టె" అనీ అంటారు.....కానీ ఇది మోసగాళ్లకి కూడా వర్తిస్తుందా? మెదక్ జిల్లా తూప్రాన్ లో, ఆరు నెలల క్రితం ఒకాయన, ఓ నగల దుకాణం ప్రారంభించి, "తులం" (అంటే 11 చిల్లర గ్రాములు) బంగారాన్ని రూ.15-17 వేలకీ, (అప్పటి రేటు గ్రాము రూ.2 వేలు అనుకున్నా, 22 వేలకి పైనే) పది తులాల బిస్కెట్ రూ.1.5-1.70 లక్షలకే ఇస్తాననీ నమ్మించి, కొన్ని లక్షల పెట్టుబడితో, కొందరికి అలాగే అమ్మి, తరవాత, నాకు ఏప్రిల్ లో విదేశాలనించి వోడనిండా బంగారం రాబోతూంది అనీ, ముందుగా డబ్బు చెల్లిస్తే, ఈ నెల 24, 25 తేదీల్లో బిస్కెట్లు ఇచ్చేస్తాను అనీ చెప్పి, ఓ 60 మంది పైగా ఇవ్వగా, ఓ పది కోట్లు వసూలు చేసుకొని, ముందుగా తన భార్యా పిల్లలని వూరు దాటించి, బంగారం తేవడానికి వెళుతున్నాను అని అందరికీ చెప్పి, మాయం అయ్యాడట. ఈ వ్యాపారం తో పాటు కొన్ని "సేవా కార్యక్రమాలు" కూడా చేసేవాడట. కొసమెరుపేమిటంటే, ఓ పోలీసు అధికారి సైతం ఆయన దగ్గరనించి పెద్ద మొత్తంలో బంగారం 'కొనుగోలు' చేశారట!

యెలా వుంది "ఠోకరా?" (దురాశ దుఃఖమునకు చేటు!)

కల్యాణమస్తు కార్యక్రమంలో ప్రోత్సాహకాలకోసం ఇదివరకు చేసుకున్నవాళ్లే మళ్లీ పెళ్లి చేసుకుంటున్నారట! ఇలాంటి వాళ్లని పట్టుకొనే బాధ్యత తహసీల్దార్లకి అప్పగించారట. మే 20న జిల్లాలో జరగబోయే కల్యాణమస్తులో ఓ 5 వేల వివాహాలైనా జరిపించాలని, అందుకోసం 15 మంది అధికారులని నియమించారట.

జిల్లాలో దేవాలయాలకీ, సత్రాలకీ సంబంధించిన భూములూ, ఆస్తులూ చాలామటుకు యేవి యెక్కడ వున్నయో దేవాలయ అధికారులే పోల్చుకోలేకపోతున్నారట. కొన్ని దేవాలయాలకైతే, అధికారులనే నియమించలేదట. విజిలెన్స్ ఎన్ ఫోర్స్ మెంట్ వారు ముమ్మరంగా చేస్తున్న దర్యాప్తులో అలాంటి స్థలాల్లో అనేక వాణిజ్య సముదాయాలూ, హోటళ్లూ వగైరాలు నిర్మించేశారట. కొన్నింటికి రెవెన్యూ వారు పట్టాలు కూడా ఇచ్చేశారట!

సత్యసాయిబాబా మృతికి ప్రభుత్వం సంతాప దినాలు ప్రకటిస్తే, మంత్రి పితాని భూమి పూజలూ, ప్రారంభోత్సవాలు నిర్వహించడమేమిటి అని పలువురు భక్తులు విస్మయం వ్యక్తం చేశారట. (అందుకేగా అన్నది యెవడిగోలవాడిది అనీ, యెవరిపాట్లు వారివి అనీ!)

సమగ్ర శిశు అభివృధ్ధి పథకం (ఐసీడీఎస్) క్రింద చంద్రబాబు ఓ మంచి పథకాన్ని ప్రవేశపెట్టాడు--ఆడపిల్ల పుట్టగానే ఆ తల్లిదండ్రులూ, కూతురి పేర కొంత మొత్తానికి బ్యాంకులొ "కేష్ సర్టిఫికెట్ " రూపం లో డిపాజిట్ చేసి, పాఠశాల లో చేరినప్పటి నుంచీ సంవత్సరానికి రూ.500/-; రూ.1,000/-, ఇలా ఇస్తూ, పెళ్లినాటికి మొత్తం డిపాజిట్ సొమ్ము వాళ్లకి అందేలా యేర్పాటు వుండేది. (దీన్నే ఇప్పుడు ఆయన నగదు బదిలీ అంటున్నాడు).

తరవాత ఆ పథకానికి అనేక మార్పులు చేసి, ఇంకా బాగా అభివృధ్ధి చేశారు. కాంగ్రెస్ ప్రభుత్వం ఈ పథకాన్ని నీళ్లుగార్చి, ఇప్పుడు అసలు ఆ మాటే లేకుండా చేసింది!

ఇప్పుడు నాబార్డ్ సహాయంతో ఆంగన్‌వాడీలకి "భవన నిర్మాణాలు" చేపడతారట! వేల సంఖ్యలో కార్యకర్తలూ, సహాయకుల ఖాళీల్ని, వందల సంఖ్యలో నియోజకవర్గ స్థాయి అధికారుల్నీ భర్తీ చెయ్యడం గురించీ, యేళ్లతరబడీ పనిచేస్తూ ఇప్పటికి అమ్మమ్మలైనా తమ వుద్యోగాలని క్రమబధ్ధీకరించడం లేదు అంటున్న వాళ్ల మొత్తుకోళ్లనీ మాత్రం పట్టించుకోవడం లేదు ప్రభుత్వం!

నాకేటి?.....అనేదానికి సమాధానం వస్తేనే పథకాలు నెరవేరే పరిస్థితి మరి!

కబుర్లు - 41

2011-04-23T09:45:00.000-07:00

అవీ, ఇవీ, అన్నీ

పశ్చిమ బెంగాల్ లో యెన్నికలు ప్రకటించినప్పటినుంచీ 21-04-2011 వరకూ "కోటి" రూపాయల "నల్లధనం" యెన్నికల సంఘం వారు స్వాధీనం చేసుకున్నారట!

ఐదు రాష్ట్రాల్లో పన్ను యెగవేతకి సంబంధించి రూ. 85 కోట్లు గుర్తించినట్టు ఆదాయం పన్ను శాఖ ప్రకటించిందట.

లెఖ్ఖా పత్రాలు లేని రూ. 28 కోట్లు వారు స్వాధీనం కూడా చేసుకున్నారట!

ఇంక కడపలో రూ.1.74 కోట్లు మాత్రమే స్వాధీనం చేసుకొని, 21 కేసులు పెట్టారట.

అక్కడ యువనేత, దీర్ఘకాల ప్రణాళికతో చోటా మోటా నాయకులకి టాటా సుమోలూ వగైరాలు కొన్ని వందల సంఖ్యలో ముందే బుక్ చేసి, కొని, పంచిపెట్టాడట!

ఈ దేశానికి యెంతమంది అన్నా హజారేలు కావాలో!!!

ప.గో.జి. కలెక్టరు 53 రోజులపాటు శిక్షణకోసం ముస్సోరీ వెళ్లవలసి వచ్చినందున, క్రొత్త కలెక్టరుని నియమించారు.

మళ్లీ మామూలే....పేపరునిండా జిల్లాలోని ప్రముఖ అధికారులూ, వుద్యోగులూ, ఇతరులూ ఆవిడకి "పదవీ స్వీకరణ" శుభాకాంక్షల ప్రకటనలే!

ఇదివరకోసారి వ్రాశాను--ఇది మంచి వొరవడి కాదు అని. ఈనాడువారు వేరేవిధంగా వ్యాపారం చేసుకొంటే బాగుంటుంది గానీ, ఇలాంటివి మానేస్తే బాగుంటుంది.

దేవరపల్లి గ్రామంలో ఓ ఆవు ఇప్పుడు ఒక ఈతలో 3 దూడలని (రెండు గిత్తలూ, ఒక పెయ్యా) ఈనిందట! అంతేకాదు--ఇంతకు ముందుగాకూడా ఇలాగే, ఒకదానికన్నా యెక్కువగానే దూడలని ఈనిందట. ఇప్పటివరకూ మొత్తం 7 ఈతలలో, 11 దూడలని ఈనిందట! దూడలకి పాలు సరిపోకపోవడంతో సీసాలతో, పోతపాలు పట్టిస్తున్నారట!

ఈనాడు వార్త ప్రకారం, కొన్ని ఆవులు రెండు దూడలని ఈనడం "తరచూ" జరుగుతుందట! ఇలా మూడు దూడలని ఈనడం మాత్రం "చాలా అరుదు"ట.

"ఫృఏమతో మీ లఛ్మీ"--నాకు తెలుగు ప్రాబ్లెం అంటే నాకన్నా ఈయనకి యెక్కువ తెలుగు ప్రాబ్లెం--అంటూ, హాలీవుడ్ నించి బాలీ వుడ్ కి వచ్చిందట. తెలుగులోని అచ్చులూ, హల్లులూ చలా కష్టపడి స్పష్టంగా పలుకుతున్నట్టు "ఎ"...క్కడ; "ఎ"...లాగ; "మ్మీ"...రు; "న్నే"...ను అంటూ, ద్విత్వాక్షరాలూ, సమ్యుక్తాక్షరాలూ వచ్చేసరికి......చూశారుగా పైన! అదీ! అంతేకాదు.....తనకి కాస్త ఆవేశం వస్తే......"చెయ్లేక్పాత్నారు"; "అడగ్లేక్పాత్నారు" అంటూ తన సహజ శైలిలోకి వచ్చేస్తుంది!

నాకెందుకో ఓ సామెత గుర్తుకి వచ్చింది.... అదే.....

"అడవిలో పుట్టింది, అడవిలో పెరిగింది, మాయింటికొచ్చింది, తైతక్కలాడింది...." అనీ!

మన టీవీలకి యాంకర్ల కొరత యెప్పుడు తీరేనో!

ఈనాడు వారి తెగులు

2011-04-19T10:32:00.000-07:00

పదాడంబరం

ఒక టైములో ఈనాడువారు వార్తలకి శీర్షికలు వుంచడం లో, వార్తలు వ్రాయడం లో మంచి వొరవడి సృష్టించారు.

రాను రాను తలకి రోకలి చుట్టుకున్నట్టు తయారవుతోంది.

వుదాహరణకి ఈ క్రింది పేరాలు చూడండి.

"శ్రీరామ నవమి సందర్భంగా......రామాలయాల్లో గురువారం "ప్రత్యేక" పూజలు నిర్వహించారు. ఉదయం సీతారామచంద్రమూర్తికి "ప్రత్యేక" పుష్పాలంకరణ చేసి, "విశేషార్చనలు" చేశారు. రాత్రి "సుందరంగా" అలంకరించిన పూలరథంపై స్వామివార్లను ఉంచి "వైభవంగా" పొన్న ఉత్సవం నిర్వహించారు. ఉత్సవంలో ప్రదర్శించిన "వివిధ రకాల" నృత్యాలు, ధూం ధడాకా, తీన్‌మార్, బిందుల నృత్యం, కాళికా నృత్య గీతాలు, కోయ నృత్యాలు ప్రదర్శించారు. కార్యక్రమంలో ఆలపించిన సినీ గేయాలు పురజనులను అలరించాయి. "భారీ" ఎత్తున భక్తులు ఊరేగింపులో "ఉత్సాహంగా" పాల్గొన్నారు."

"....షిర్డీసాయి మందిరంలో గురువారం "ప్రత్యేక" పూజలు నిర్వహించారు. ఉదయం బాబాకు పంచామృతాభిషేకం జరిపి "ప్రత్యేక" పుష్పాలంకరణ చేశారు. ....రోడ్డులోని....బాబాకు విబూదార్చనలు నిర్వహించి హారతులిచ్చారు.......లోని కుక్కలవారితోటలోని చెట్టుకింద ముత్యాలమ్మ ఉత్సవాల ముగింపు సందర్భంగా "పలువురు" హాజరై అన్నప్రసాదాలు స్వీకరించారు."

"విశాఖ రైలుకు అదనపు "భోగీలపై" ఎంపీ హామీ"

"పేరుపాలెం నార్తు పంచాయతీ పరిథి అంగజాలపాలెం లోని ఆంధ్రా బ్యాంకులో......"

(ఆంధ్రా బ్యాంకువారి ఆ బ్రాంచిని "పేరుపాలెం బ్రాంచ్" అని ప్రపంచ వ్యాప్తంగా వ్యవహరిస్తారు. అలాంటిది, అసలు బ్రాంచి పేరు వ్రాయకుండా, "ఫలనా పంచాయితీ, ఫలనా స్థలం" అని వ్రాయడం అవసరమా?)

"......శివునికి భక్తులు "ప్రత్యేక" పూజలు నిర్వహించారు. గ్రామంలోని "50 మంది దంపతులు"(??!!) (ఆవూళ్లో వున్నది మొత్తం 50 మంది దంపతులేనా? దంపతులు అంటే 25 జంటలనా? 50 జంటలనా?)......కాశీ యాత్ర పూర్తిచేసుకుని వచ్చారు. ......శివునికి పంచామృతాలతో అభిషేకాలు నిర్వహించారు. అనంతరం లక్ష రుద్రాక్షలతో పూజలు జరిపించారు."

".....అభిషేక పండితులు....పర్యవేక్షణలో....కళ్యాణ క్రతువు నిర్వహించారు."

"సాదాసీదాగా....పట్టిసీమలోని....భూనీల సమేతభావన్నారాయణ స్వామి కళ్యాణం....అర్చకులు, అలయ సిబ్బంది, భజంత్రీల సమక్షంలోనే....ఇటీవల శ్రీరామనవమికి అలంకరించిన మందిరంలోనే, ఎండిపోయిన పువ్వులు, మామిడి తోరణాల మధ్యనే.....నిర్వహించడం "శోచనీయం".....వచ్చే ఏడాదినుంచైనా...."ఘనంగా".....నిర్వహిస్తారని ఆశిద్దాం."

(ముందురోజే, ఆ అలయ అధికారి వొకరు "ఇంతకు ముందు వొకసారి వైభవంగా కళ్యాణం జరిపిస్తూంటే యేదో అపచారం జరిగింది అనీ, అప్పటినించీ వూరికి అరిష్టాన్ని అరికట్టడానికి నిరాడంబరంగా క్షేత్రపాలకుని కళ్యాణం జరిపిస్తున్నాము అని చెప్పిన వార్త ప్రముఖంగా ప్రచురించారు!)

యెలా వున్నాయి ఈనాడువారు మన భాషకి అలంకరిస్తున్న "గిల్టు నగలూ", చదువరులకి వేస్తున్న "పంటిక్రింద రాళ్లు"?

అసలు ఆ విలేఖరులు వార్త వ్రాశాక ఓసారి దాన్ని చదువుకుంటారా? సబ్ ఎడిటర్లు కాపీ తయారయ్యాకన్నా ఓ సారి చదువుతారా? అలాంటివాటికి "సమయం లేనంత" బిజీగా వుద్యోగ విధులు నిర్వహిస్తున్నారా? అని నా సందేహాలు. (నేనైతే వాళ్లని వెంటనే ఇంకో వుద్యోగం వెతుక్కోమనేవాణ్ణి.)